يوميات زوجه رمانسيه بالصدفه

يالسه بروحى فى البيت اجهز العشا حق ريلى اللى بيوصل عقب اشوى واشوى وينقطع التيار الكهربى وابوي شسوى ما لى حل الا اعمل على اضواء الشموع المهم سويت العشا الزين ورتبته على الطاوله وولعت الشموع بشكل اوك ودشيت اتسبح وعادى الحياه وايد اوك وطبعا فى الحمام الشموع شغاله وفاتحه الباب ترانى بروحى والا اشوف ويه فى الظلام يطالع بسم الله وانتفض ويضحك زوجى يقول ماشاء الله مستويه رمانسيه اليوم "بل" اقول حق عمرى رومانسيه كيف قال الشموع هاذى تصدقين والله مانى بفاتح الليتات واحليله يحسبنى استهبل وبنده الليتات بالعماله وثانى يوم فديتنى يابلى هديه ليش عيبته هاذى الحركه مالت امس يحسبنى صج مسويه حفله عشان رومانسيه وانا ولا فى بالى الا افك عمرى منه
حياكن الله يا احلى فرشات هذا الموقف صار وياي ودوم يصير وياي عشان جى حبيت ادش واكتب لكم يومياتى يوميات زوجه .... رومانسيه بالصدفه وبغيت كل منكن صار لها نفس الموقف تشاركنى الكتابه
اتذكر يوم يالسه اطرش مسج حق اربيعتى هاذى اغنيه وايد رومانسيه ما ادرى اي بس سمعتها فى الرادو قمت نسختها واطرش جان انسى واطرشها حق زوجى وايي من الصاله يحضنى واقوله اشفيك اليوم قال والله وايد حلوة رسالتج عيبتنى صراحه "بل" الرساله وصلته هو ما وصلت حق اربيعتى واشوف الا انا بذكائى الخارق مطرشتها حقه " فديته فى بالى ترا"
اتذكر يوم اخوى الكبير ماشاء الله حصل على درجه الدكتوراه وحبيت اشتريله هديه بس هديه متكلفه قمت اشترى واشترى واشترى شو عطور ومااقلام ودبابيس حق الدشداشه وما ادرى شو ولفيتهم وكلش اخبيهم واخليهم فى الكبت لين اعطيهم اياه فى اليوم الثانى واطلع اسير المطبخ الا وايي اشوف زوجى فاتح الهدايا ويطالعنى بنظره طفوليه فديتج كل هذا لى انا فديت زوجتى الرومانسيه اللى تفكر فينى
"بل" طالعته وبطيت حلجى وبطيت عيونى كنى شايفه فلم رعب وقلت اوف قال شو قلت نسيت اعطيهملك بس حبيت اسويلك مفاجاه واتفشلت ما ادرى بيسوى جذى مسكين حسبهم له انا ترا دوم اسوى جى اخبى هداياه بينى ملابسى فى الكبت والا يفتح الهدايا ويقول مشكورة وانا اقول بكل هدوء "يو ار ولكم"
من هاذى المواقف وايد اتعرض لها واحس فى يوم من الايام بيصير لى جى من الرومانسيه اللى زوجى يحلم بها ومحسبنى واحليله قمه الرومانسيه عندى وايد مواقف بحكيها لكن
فديتكن والمايك مع اللى بعدى وامانه امانه امانه كل اللى دشت و قرت موضوعى ترد ولو بدعاء
ام عبدالله