ماقدرت أفهم زوجي شورو علي يابنات

السلام عليكم ورحمة الله وبركاته
أنا ياجماعه عندي مشكلة وأبي أدخل بالموضوع على طول
أنا مملكة وأكلم زوجي جوال طبعا فارق السن بيني وبين زوجي كبير شوي بيننا 11 سنه
أنا مايهمني هذا الشيء لكن خلافاتنا كثيره وتعبت أحيانا ودي أغير رأيي وأهون عن الزواج لأني عجزت أفهمه بصراحه أنا كل ما أطلب منه شيء يرفض وبعد إصرار مني يقول إذا جيتيني مايصير خاطرك الا طيب
طبعا طلبت غرفه كون أنه كان متزوج ومطلق قبلي ثلاث وعنده ولد ومابي غرفه عقب حريم وعصب وقال ليش توك تتشرطين انا طبعا قلت هذي مايبي لها شروط المفروض من نفسك تجيبها وانا بنت وما اعتقد اي بنت ترضى تسكن عقب احد كفايه ماطلبت تغير البيت او الاثاث فقط الغرفه لكنه رفض وحصل خلاف وزعل لكني رضيت وقلت يابنت كبري عقلك اذا جيته على قولته بيوديني اختار مو مهم الغرفه المهم القلب يرغبني ويحبني وهالمره قال انه بيني البيت وشرى الارض قلت ابي اشارك معك بالتصميم قال انا بصراحه مقرر من قبل بيتي اصممه من كيفي تعجبت وزعلت كونه ماحط لي راي وقال خلاص اذا جيتي وانا مابعد بنيت اخليك تشوفين التخطيط قلت اجي يعني بس البس الفستان واجي عاد هنا ابو الشباب انتفخ وزعل ويقول انتي غلطتي علي بكلمتك بالعلم اني من يوم ماتملكنا وانا مهتمه فيه اقومه لصلاة الفجر وللدوام واحرص اني اداري خاطره ولا ارفض له اي طلب لكني والله احترت وهو الحين زعلان علي وانا تأسفت له وأحبه لكن أحيانا احس انه يبيني بس انصاع وانفذ من غير اي نقاش شورو علي الله يسعدكم وربي انا بس دموع وهم والله يعيني غير هم تجهيز والدراسه كثرة الخلافات واحيانا احسها تافهه بس انا ودي يهتم فيني مدري وش اسوي
أدري طولت عليكم العذر والسموحه