أخواتي بإذن الله بأنتقل على بيت جديد و أبي خبراتكم بكل شي

1. السلام عليكم ورحمة الله وبركاته


2. أول شي راح نبدأ فيه ، أفضل طريقه لنقل العفش وترتيبه بحيث يكون سهل .

السلام عليكم ورحمة الله وبركاته

أخواتي الغاليات ، صباحكم / مسائكم بخير وصحه ، وعافيه وستر ، ورضى من الله سبحانه .
أحبائي ، مثل ماهو مكتوب في العنوان ، إن شاء الله راح أنتقل على شقه جديده شريناها طبعا الحمد لله الشقه كبيره مره ، فيها غرفتين نوم ومجلس حريم ( أو إذا تبينه غرفه نوم أو مكتب ) وصاله كبيره ومطبخ بداخله نخزن مساحته حلوه مره ، وفيها مجلس ومقلط ودورتين مياه ، و الثالثه تبع غرفة النوم الرئيسيه ، وفيها بعد مخزن صغير خارج المطبخ ، بشكل عام الشقه كبيره و الحمد لله .
أنا حبيت أستفسر و أسأل عن كذا شغله ، وياليت ألاقي تفاعل من الكل ، لأن الموضوع راح يستفيد منه الكل بإذن الله .

أول شي راح نبدأ فيه ، أفضل طريقه لنقل العفش وترتيبه بحيث يكون سهل .

وأيضا أبي أسأل عن أفضل الدهانات الجزيره أو رغدان أو أي نوع ثانيه بحيث إن الدهانات تكون ألوانها حلوه وثابته ، و الأهم ما يتصدح الجدار بعد فتره بسببها . و أبي أعرف الألوان اللي تعطي البيت مساحه وكبر ، و أهم شي الألوان الدئمه اللي ماتملين منها ، و أفضل الرسومات أو الطباعه أو التقليم للجدار .
برضه أحب أسأل عن الأرضيات ، بصراحه خاطري بأرضيه خشب أو فينيل ، ياليت تشورون علي بأحسنها و أمنها في الإستخدام و المكان المناسب لتركيبها يعني غرفة نوم أو صاله أو ممر ، لأن بصراحه أبي أنوع بديكور الشقه من كل النواحي ، او هل تنصحوني أخلي أرضيات الشقه كلها سيراميك بس كل قسم له أرضيه مختلفه ولون مختلف ، و أهم شي وش اللون اللي يعطي فخامه الأسود الأبيض المزخرف أو البني وغيره .
أحب أسأل عن المطبخ و هو الأهم ، أفضل المحلات ، وأبي مطابخ يكون تخزين الأغراض فيها مريح ، و الألوان و الخامه ، وتكون عمليه ومريحه ، وهل تنصحوني بالمطابخ اللي دواليبها تفتح على فوق أو أخذ المعروفه . و إذا تعرفون مكان يفصل على الطلب بس مضمون شغله .
الحمامات و إنتو بكرامه ، أفضل الالوان و المحلات الزينه و اللي فيها أفكار جديده .
الأثاث ، أهم شي وش تنصحوني بغرفة نوم أطفالي أنا عندي بنت عمرها سنتين ونص ، وولد عمره سنه و3 شهور ، راح يكونون في غرفه وحده ، أبي أفكار أقدر أجمع بينهم بس تعطي الغرفه منظر حلو .
أبي أسأل عن أفضل المحلات الكنب ، أفضل الألوان ، والقماش ، و نوع الجلسه ، مغربي ، أمريكي ، تركي ، بصراحه المغربيه خيال ، وشفتها عند قريبه لي روعه ، بس إذا فيه شي جديد أفيدوني .
الكهربائيات ، أبي أعرف أفضل غساله ملابس أوتوماتيك ، و النشافه و أبي أعرف أفضل غساله للصحون ، وهل هي عمليه تنظف أو لا ؟ و المكانس البخار الخاصه بالسيراميك ، وش أفضل نوع من ناحيه الإستخدام و النظافه ، وفيه مكنسه أسمها ((( شارك ستيم بلاستر ))) شفت لها دعايه بالقنوات ، مين جربتها ؟ لأنها عجبتني مره .
أبي أسأل عن الأفران الكهربائيه .
أدري كثرت عليكم أسئله ، بس تعرفون هذا بيت العمر إن شاء الله وودي أشتري أشياء ما أندم عليها ، لأن تعرفون ديون ، وقروض ، فما أبي أخسر زياده .
و أشكر كل أخت تشرفني وتعطيني خبره أو تجربه أو فائده ، ولكل من يرفع موضوعي ، أقول لها الله يرفع قدرك دنيا و أخره .
أختكم / ناي ,,,