أم زوجي عمري ما شفتها ويا قسي قلبها

السلام عليكم يا حلوات انا لي فتره ادخل هنا واقراء لكم واستفيد من حلولكم وتجاربكم
بس اليوم انا ابيكم تساعدوني لأن طفح الكيل عندي تعبت نفسيآ من أم زوجي
أنا متزوجة من 4 سنين وبعد الزواج بسنه تيتمت وأسكن في منطقة غير منطقة أهلي
السالفة أني يوم تزوجة أم زوجي كانت رافضة زواج ولدها مني ما كانت تبيني وهي حرمة متزوجه غير ابو زوجي وعندها عيال من زوجها الثاني لان ابو زوجي متوفي الله يرحمة
زوجي خطبني وتردد على خطبتي سنتين وابوي واخوي سألو عن الولد والكل الحمدلله من قرايبة يمتدحة لكن مشكلتة أمة اللي ما تبيه يتزوجني وهي عمرها ماشافتني بس كانت تبيه للقرابة على قولتهم
المهم اننا بعد قصة خطبات كثيره الحمدلله كتب ربي أني ما أخذ الا هو وتزوجنا والكل حضر بستثناء أمه وجدته وبعد الزواج أمة قالت له لا أنت ولدي ولا أعرفك حاول كم مره يكلمها ترد وتدعي علينا وتسكر السماعه ( تخيلو تدعي حتى أن ربي ما يرزقنا بعيال ) حاول يروح لها طلعت رجلها على زوجي وقاله لعد نشوفك
المهم أن زوجي جرب كل الطرق عشان يدور رضاها وأنا كل يوم أقول معليه تحمل بكره بكلمها وأن شاء الله بترضى وكل فتره على ذا الحال بس هي ما هي راضيه تقول مدامك معها ما أعرفك انا بعد سنه ونص رزقني ربي بولد جعلة يعوضني يارب وحتى ولدنا ما شافته ولا تبي تشوفه المهم قعدنا سنتين من زواجنا على ها الحال وبا الاخير زوجي قال أحنا مالنا الابعض خلينا نعيش حياتنا عسى ربي يعوضنا
والحمدلله مبسوطين ومرتاحين بس با الاول كنت ازور خالاته وحريم خواله وكنت أحس هذا الشي معوضني لكن قبل رمضان كلمت جدته أم أمه علية قالت لا تجيب حرمتك عند خالاتك لان أمك قالت لهم اذا زارتكم او كلمتكم معد جايتكم يعني أن حرمتك لا تقعد تشتتنا المهم بعد كذا زوجي قال خلاص معدكم شايفينها مع أني ما أشوفهم الا بالشهر مره كلها قهوه وأسلم عليهم و أطلع وهم بنفس عمري كنت أحس بفرحة أن لي أحد ازوره و أشوفه لكن الحين ظليت وحدانيه من تزوجة عمري محد عزمني لو حتى بالكذب حتى خالاته من خوفهم من أمه ما كانو يقولون أنها تجيني كنت أروح لهم وأخذ حلى وأشياء معاي كله عشان مابيهم يقطعوني , والحين العيد بيجي قلت له روح سلمعلى اقاربك وأنا أذا جيت نطلع ونطلع ذا الصغير مسيكين , بس اللي حاز بخاطري ليه على كل ها السنين ربي ما حنن قلبها علي
مع اني والله انسانه اخاف الله والحمدلله من تزوجة زوجي غيرته صار يصلي في المسجد ومداوم على صلاته ومهتمه فيه وصاينته وكل يوم أنصحه على أهله وهي 4 سنين ما حنت حتى تشوف ولده
والله يا بنات اليوم من حر ما فيني قعدت أدعي من قلبي وغصب عني معد قدرت أتحمل حسيت أنها حرمتني من السعاده حتى العيد مو حاسه بطعمه , معقوله فيه أمهات قلوبهم كذا وما يبون السعاده لعيالهم
كل اللي أبيه منكم دعوه صادقة وأن ربي يحفظ لي زوجي وأعوضه عن أمه اللي تخلت عنه عشاني