أنا وصحبتي بالعامية المصرية

1. شدت دراعي بغشومية بس وفي عينيها حنية

أنا وصحبتي ..
أنا ليا واحدة صحبتي لا دي حبيبتي
قالت يوم خليني أشيل عنك هموم
مسكينة هي كمان كتفها شايل ومن تقل الهموم مايل

• يا حبيبتي كل واحد علي همه قادر ربك لما بيصيب بيصبر قبل ما بيبلي ويقدر

صرخت فيا بعنترية

• يا بت ما يهمكيش صحبتك ياما اتحملت علشان تعيش

صحبتك ياما قاست وعلي كله برجليها داست ارمي همومك عليا ولا تنعي للدنيا هم ولا ليا ده الهم لما بيتقسم بيقل ويصغر وعليكي وعليا ما بيأثر .

• طب يا صحبتي شيلي عني شوية وأشيل عنك شوية داننا اللي ليكي وانتي اللي ليا ..بس خدي بالك مني واوعي يوم تتخلي عني

شدت دراعي بغشومية بس وفي عينيها حنية

• وده برضه كلام تقوليه ليا
• طيب طيب ما تزعليش دنا من غيرك مقدرش أعيش ..يالا يا اختي خدي حبة من همي
• هاتي يا نني العين ...ياه ده انتي همك تقيل
• مش قلت لك ..
• بس ولا يهمك

وفي يوم التفت حواليا وما لقيت صحبتي ديا اتصلت بيها ودورت عليها اللي قالي دي تعبانة واللي قال دي نايمة ولا دريانة

• خير يا صحبتي رحتي فين من مودتي
• أه يا حبيبتي بالله عليكي ما تأخذنيش ...أه اصل الدنيا دارت وعليا وقفت وما دارت

طبطبت عليها وبوست راسها وكمان ايديها ورسمت علي وشي أحلي ابتسامة وقلت لها بحنية

• ارمي همومك عليا ولا تنعي للدنيا هم ولا ليا

صحبتك ياما قاست وعلي كله برجليها داست...وعجبي
مع تحياتي
firefly