ابغى مساعدة من الفراشات

تدخلون كذا ولا تساعدوني افا عليكم ماتوقعت الصراحه

اهلين حبيبتي
انا اموت في الاشياء هذي
بس بيني وبينك في حاجات ماتنفع تتسوا في رمضان ايش رايك تأجليه للعيد او قبل رمضان بليله وتقوليلو عشان رمضان جاي حبيت اسويلك عيدميلادك قبل موعدو
**نبدا في الكيكه..
سويلو الكيكه اللي عليها صورتو بس ماتكون في وسط الكيكه لا تكون على الكيكه كلهايعني الصوره بحجم الكيكه طبعا اتفقي مع محل يسويلك هيه واكتبيلو عليها ( عسى عامك سعاده وحب ويفرح بالهنا قلبك ) او ( ياليت العمر يتوقف على حاله هنا جنبك )..
تفضل تكون من الحجم الصغير يعني اختاري اصغر حجم لأنكم بس اتنين وراح تطلع انعم ويكون احلى لو تحطي صورتو وهوه صغير مو وهو كبير اذا عندك الصوره واذا ماعندك اسألي احد من اهلو يعني مامتو او اخواتو وخليهم يعطوكي وحده له وهوه صغير.. والشمعه حطيها كلمه( ILOVE U ) تجيك كل حرف لوحدو وانتي رتبيها ولاتحطيها في نص الكيكه لا خليها على زاوية الكيكه من فوق تطلع اروق واكشخ..
**الأكل..
احسن شي لو يكون خفايف يعني معجنات من الصغار زي البيتزا والسبانخ وفطاير الجبنه وفطايرالهوت دوج وفطاير اللحمه
زي اللي نوزعها في العزايم وساندويشات كمان من النواعم الحجم الصغير ياتسويها او تاخديها من برا جاهزه اذا تعرفي محل يسويهم بس اهم شي يكونو من الحجم الصغير عشان يطلعو مرتبين..
عندي لك طريقه حلوه اذا انتي بتسويهم في البيت او حتى بتاخديهم من برا خدي كل ساندويشه ولفي عليها خيط من البصل الاخضر زي الربطه الفيونكه في النص يطلع شكلها جنان..
وسوي انتي في البيت سلطة المكرونه او اي سلطه انتو تحبوها واذا تبغي سلطه المكرونه قوليلي وانا حاضره اكتبها لك مره لذيذه..
ولاتنسي ورق العنب اذا كان زوجك يحبو وياسلام لو يكون من الحجم الصغير المرتب عشان يناسب الحفله ويتلائم مع اصناف الأكل الباقيه..
طبعا اذا بتجيبي المعجنات والسندويشات من برا لازم ترتبيهم في صحون فخمه عندك وتزينيهم ويفضل يكون صحن كبير فيه كل المعجنات وصحن تاني كبير فيه الساندويشات وصحن لورق العنب وزبديه كبيره شكلها حلو للسلطه والكيكه لازم تطلعيها من كرتونتها بس لاتحطيها في صحن هيه يجي تحتها كرتونه دائريه خليها عليها وحطيها على الطاوله..
ولازم تحطي اربع صحون فاضيه اتنين مسطحين للمعجنات وورق العنب واتنين عاديين للسلطه وملاعق كبيره وشوك كبيره وسكين كبيره للكيكه وشوك صغيره تاكلو فيها الكيكه وملاس صغير عشان تشيلي فيه الكيكه لما تقطعيها..
نجي لترتيب الطاوله..
حطي الكيكه طبعا في النص ورتبي حواليها صحون الاكل وحطي مكان زوجك صحنو وملعقتو وشوكو وزينهم بفوطه صغيره بشكل فني في نص الصحن او تقدري تلفي الفوطه بشكل عادي وتربطيها من النص بالخفيف بشريطه ورديه او اللون اللي تحبيه حسب رغبتك.. وانتي كمان حبيبتي حطي مكانك نفس الشي..
**المشروب..
عندك خيارين اذا تحبو عصير التفاح السيدر يعني اللي فيه غازات سوي ها الطريقه..
حطي قارورة عصير تفاح كبيره ماركة ابل تايزر (مرره رهيبه) في جك قزاز وحطي عليها علبه صغيره صودا او قاروره مياه بيريه صغيره وقطعي شرايح تفاح بقشرها وشرايح اورنج بقشرها كمان وشريحتين ليمون بس كمان بقشرها طبعا التقطيع يكون على شكل دوائر وحطي كمان معاهم اوراق نعناع وكسري الثلج وحطيه عليه بس لازم يتحضر وقتو يعني ماينفع تسويه من اول وتخليه بيروح طعمو انتي جهزي كل الفواكه وخليها مقطعه من اول وحطيها بالجك ووقت ماتخلصي ترتيب الطاول وكل لوازم الحفله صبي عليهم العصير والبيريه والتلج المكسر وحطيه على الطاوله..
والكاسات طبعا لازم تكون شي مو عادي يعني حاجه فخمه وملفته وشكلها يفتح النفس اذا الكاسات اللي عندك شكلهم عادي روحي خذيلك كاستين بس وخليهم للمناسبات يعني لازم الكاسه تكون زي اللي نشوفهم في بعض المطاعم اللي تجيك من فوق واسعه ومن تحت ضيقه وتكون طويله او اللي تكون لها قاعده..
المهم انتي خدي الكاسه وزينها يعني اربطي عليها شريطه نفس اللي حتربطيها على المنديل اللي حيكون فوق الصحن
وفي طرف الشريطه علقي كرت صغير او ورقه صغيره اكتبي فيها عباره تعجبك او كلمه بينك وبينو وسويها في شريطه المنديل وشريطة الكاسه اللي على الكاسه ممكن تكتبي فيها كلمه مره رهيبه بتخليه يتجن اكتبي فيها (حبيبي أبغى الثلجه اذا جات بين شفايفك) واللي على المنديل ياتكتبي فيها كلمه (احبك حبيبي) او (ياليت تأكلني حاجه من شفايفك العسل)..
ولا تنسي تزيني الكاسات من فوق بالفاكهه يعني شريحة تفاح او اورنج او فراوله عشان تشكلي في الالوان..
والمشروب التاني..
اذا انتو تحبو ( بلو كوكتيل ) ..
حطيلو هوه البلو كوكتيل يجي لونو ازرق
وانتي البنك كوكتيل يجي لونو بينك يعني وردي
وحطي على كاستو شريطه ورديه وعلى كاستك شريطه سماويه يعني تعكسي الالوان
وطبعا لابد من التلج المكسر يعطي شكل حلو في الكاسه وبروده حلوه كمان..
@@على فكره لازم تحطي مفرش من الشيفون على الطاوله يكون بلون شرايط المنديل واحلى لو يكون وردي طبعا حطيه بطريقه مو مرتبه يعني زي المعفس ووزعي بين الصحون شموع صغيره على الطاوله وانثري كمان على الطاوله بتلات ورد طبيعي لونهم ابيض ووردي اذا المفرش اللي بتحطيه وردي بس لاتكثري حطي شويه بس عشان تعطي لمسه بسيطه مع الشموع..
**ميوزيك وقت الحفله..
جهزي كاسيت من اول سجلي فيه الاغاني اللي تناسبك يعني مثلا من وجهة نظري
اول الكاسيت عزف هابي بيرث دي تكون بس عزف وهااديه مره يعني وقت مايخش زوجك تكون هذي الميوزيك شغاله
بعدها تجي اغنيه لعبدالكريم عبدالقادر هيه قديمه بس مره حلوه حق عيد ميلاد يقول فيها (اهني اليوم بك انت عشانك من مواليده) وياليت لو ترقصيلو انتي لوحدك على هذي الاغنيه وهوه بيقعد يطالع متفاجأ بكل شي حولو
بعد ماتخلصي فقرتك ههه طفي الكاسيت وروحو للطاوله وطبعا اللمبات تكون طافيه من اول من قبل لايخش زوجك ومايكون في غير الشموع هيه اللي مولعه بس اللي على الطاوله واذا المكان كبير تقدري توزعي كم شمعه على الارض كمان او في الزوايا المهم بعد ماتخلصي رقص خديه من يدو وخليه يطفي الشمعه واول مايطفيها قوليلو كل سنه وانت حبيبي يارب الله لايحرمني منك وبوسيه بطريقتك طبعا ههه المهم بعدين شغلي الكاسيت تاني مره وحتكون انتي حاطه اغنيه هاديه مره عشان ترقصوا عليها سلو يعني تقدري تحطي (اجمل احساس) او (كل القصايد) او (غمض عينيك)
وبعد ماتخلص الرقصه تروحو للطاوله طبعا وتقطعوا الكيك وتحتفلوا بطريقتكم وراقبي ملامحو وتعابيرو لما يقرا البطاقات المكتوبه على الكاسه والمنديل راح ينهبل عليهم مره
وانتي طبعا دلعيه واكليه وشربيه مره بيدك ومره حطي الاكل في فمك وعطيه اياه بشفايفك واذا انتي من الوزن الخفيف قومي واجلسي في حضنو واقعدي ادلعي عليه زي البيبي وحطي يدك حولين رقبتو المهم كل الاشياء هذي انت عارفتها مايحتاج اقولك..
** ايش تلبسي..
ياليت لو يومها يكون شكلك طفولي وتكوني لابسه تنوره ميني جيب لونها وردي وتوب يكون ابيض مع وردي او اسود مع وردي
يعني التنوره تكون قصيره مره وتكوني لابسه في رجلك الله يكرمك بوت رياضه لونو وردي مع شراب قصير ابيض وفيه وردي او يكون وردي يعني شكلك سبور مره واذذا عندك الطاقيه السبور زي اللي يلبسوها المغنيات الاجانب البسيها وياليت تكون ورديه ( عندي وحده تهبل ليتك هنا كان عطيتك اياها والله ) ههه
طبعا بعد ماتسشوري شعرك واذا ماعندك حاولي تسوي شعرك اتنين والبكل تكون كل وحده لون يعني وحده ورديه والتانيه بيضه او اذا ماتبغي حاولي ترفعي شعرك بشكل عشوائي يعني مو مرتب جهه مرفوعه وجهه طايحه وشي جاي على وجهك وشي طايح من ورا بالشكل دا ولا تخليه مفتوح فتحة الشعر جايه بقولك عليها بعدين
وحاولي التوب مايكون محتشم يعني يايكون بس ينربط في الرقبه او من غير شي من فوق بالمره يعني من حدود الستيانه وتحت ويعني من الحركات دي تبع الشخلعه ههه..
واتخيلي شكلك كيف راح يكون باللبس الوردي والطاوله الورديه والمشروب الوردي وبتلات الورد المنثور والشرايط الورديه اللي على الكاسات والمناديل راح يطلع شكل مثير وانثوي ومريح ومغري..
ولاتنسي الميك اب لاتكثريه لان الزوج يحب زوجتو تكون ناعمه وعلى طبيعتها انا بقولك على مكياجي اللي ما اغيرو وخطيبي مره عاجبو يقولي احسك انثى بها المكياج لانو يزيد من انوثتك..
ونصيحه لك لاتسوي غيرو اسمعي كلامي وماراح تندمي
ارسمي حواجبك بالشدو البني المخصص لهم بس لاتكثري منو عشان تبان طبيعيه وحطي شدو وحطي الهاي لايت اللؤلؤي بطريقه مره خفيفه وماتكون باينه كثير تحت الحواجب على الجفن الثابت بعدين حطي الشدو الوردي على الجفن المتحرك
من غير تحديد او رسمه او شي حطيه بطريقه عشوائيه وحطي كمان من نفس الشدو تحت الرموش السفليه خط لايكون عريض ولايكون نحيف مره يعني متوسط حطيه من او العين لاخرها يعني من الزاويه للزاويه بعدين كحلي عيونك بكحل اسود غامق وكثري من الماسكرا لانها هيه اللي تبرز جمال العين وطبعا لاتنسي تلبسي عدسات عسلي لانها بتخليكي روعه والعسلي يناسب جميع الوان البشره وحطي بلاشر وردي فاتح وياسلام لو لويكون معاه لمعه بس خفيفه مره في نوع انا استخدمو من ايف سان لوران كده بلاشر وردي ومعاه لمعه خفيفه اذا حابه روحي اشتريه والروج طبعا حطي تحديد وردي اغمق من درجة الروج بشويه واذا كانت شفتك اللي تحت صغيره شويه ياليت تكبريها شويه بالتحديد وتحاولي تنزليها على تحت عشان يصير شكلها مغري المهم بعد التحديد حطي الروج وادمجيه بالفرشه مع التحديد وبعدين حطي غلوس بس من النوع الثقيل لانو بكل بساطه خيال يعطي للشفليف شكل مو طبيعي..
الى هنا خلصنا اكمل الباقي تحت

اهلين حبيبتي
يالله اكمل ظهري انكسر وانا اكتب ههه فديتك والله
المهم حبيبتي لاتنسي وقت ماتكونوا تقطعوا الكيك وقاعدين على الطاوله تكون في اغنيه مره حلوه ورومانسيه يعني زي اغاني ام كلثوم او محمد عبده اللي تحبيه طبعا كل هذا انتي بتكوني مرتبتهم في الكاسيت من اول يعني كلهم في شريط واحد بالترتيب..
اذا انتي من الناس اللي تحب الرقص المصري زي حالاتي وانتو جالسين استأذني منو شويه وروحي الغرفه والبسي بدله رقص اذا عندك واذا ماعندك البسي قميص النوم اللي بتلبسيه اخر الحفله وياليت يكون وردي عشان يمشي مع ستايل الحفله كلها ومع مكياجك بس لازم يكون شي مو طبيعي يعني يكون جديد ماقد شافو زوجك ويكون خليع بمعنى الكلمه..
اذا بتسوي هذي الحركه لازم تكوني حاطه الاغنيه في نفس الكاسيت حق الحفله وتكوني عارفه ايش الاغنيه اللي قبلها وقبل ماتخلص الاغنيه اللي قبل الاغنيه المصريه انتي تستأذني عشان تروحي تبدلي ملابسك وتطلعي من الغرفه على بدايه الاغنيه المصريه وانتي ترقصي الين توصلي عند زوجك طبعا انتي وشطارتك سويلو كم حركه اغراء على دلع دوخيه وابعدي عنو روحي كملي رقص بس الرقص كلو يكون بدلع ورقه واغراء ولازم تكوني كمان لابسه في رجولك الله يكرمك صندل مع القميص يكون وردي وفيه كعب وريش من قدام يعني حق القمصان اكيد تعرفيه
ونسيت اقولك لازم تفتحي شعرك خلاص انتهت مهمه الرفع يعني لما تخشي تبدلي افتحي شعرك ولاتنسي العطور والبخور في كل مكان من شعرك الين رجولك عارفه ايش يعني من شعرك الين رجولك يعني كل نقطه في جسمك..
**الهديه..
خذي له بيجامه حرير لونها ابيض عشان يلبسها لماتخشوا الغرفه ويلبسها يتناسب لونها معاك وياليت لو تكون شورت تطلع احلى واحلى
وخذي له ميداليه تكون ماركه وانا اكثر شي يعجبني ماركة ديبون مره روعه اغراضها واذا تبغي خذي له الميداليه والقلم والمحفظه والولاعه اذا كان يدخن وبيت الولاعه والعطر كمان ديبون
راح تكلفك تقريبا 6000انا اخذتها مره لخطيبي بس على حسب ميزانيتك واذا ماتقدري خلاص خذي له طقم شمس من اجمل اذا هوه يحب روايح دهن العود الطقم ب 500
وخذي له طقم داخلي من عند زارا مره روعه انا اخذ من عندو دايما لخطيبي يجيك الاندر وير زي الشورت القصير مره والفلينه تجيك علاقي وماسكه على الجسم يعني بالعربي شكلها بصراحه مغري لنا احنا يا البنات وفي منها الوان وهيه من القطن مصنوعه اذا بتاخذي هذا الطقم كنسلي البيجامه وخليه يلبس هذي لماتخشوا الغرفه وخذي له كمان شبشب للبيت
واذا هوه من النوع اللي يلبس بدل سبورت خذي له بنطلون وقميص او تي شيرت من زارا كمان عندو حاجات مره جنان
واذا مايلبس بدل خذي له شماغ ماركه جيفنشي مره حلو بس لازم تكوني عارفه مقاس شماغو واذا بتاخذي الشماغ خذي معاه عطر جيفنشي ياخد العقل سواء الاحمر او الازرق..
هذي حبيبتي قدامك الاختيارات وانتي شوفي اللي يناسبك وعلى حسب ميزانيتك
بس لا تغلفي الهديه بالشكل التقليدي كلهم مع بعض لا خلي كل حاجه لوحدها داخل بوكس وكل بوكس يفتحوا يلاقي الهديه مع كرت حلو مكتوب عليه كلام حب وغزل واخر الكلام (حبيبي ممكن تروح تفتح الدولاب) ولما يروح يفتح الدولاب يلاقي بوكس كمان يفتحوا يلاقي الهديه وكرت مكتوب فيه كلام حلو وفي اخرو (حياتي ممكن تروح تطل تحت السرير شويه) ولما يروح تحت السري يشوف يلاقي البوكس التالت ونفس الشي انتي طبعا اختاري الاماكن بس خليها تكون كلها جوة الغرفه عشان تجلسي تتفرجي عليه وهوه حايس من مكان لمكان وانتي تضحكي ههه
المهم حبيبتي نسيت اقولك كمان اهم شي تنثري بتلات ورد ورديه على كامل السرير وعلى ارضية الغرفه وتكوني حاطه الصحون اللي تعبيهم مويه وتحطي فيهم الشموع العايمه مع كم ورقة ورده تقدري ترتبيهم بطريقتك شي على الارض وشي على التسريحه وعلى الكومدينه حطي الفواحه وياليت تحطي فيها عطر من زهور الريف اسمو (مانجو) مره روعه ويخلي ريحة المكان خيال
ولاتنسي اهم شي تعطري اللحاف والمخدات وتبخريهم وتنثري كم بلونه في الارض لونها وردي بس مو كثير عشان مايروحو ناحيه الشموع وتصير الليله كلها متفجرات ههه وكمان لازم يكون في السقف من البالونات الطايرين المعلقين في السقف ويكونو كمان وردي حتي مكان الحفله نسيت اقولك انك لازم تحطي بالونات في الارض وفي السقف وياليت لو يكونوا من البالونات اللي يجي مكتوب عليهم تطلع احلى البالونات هذي الطايره المحل ينفخها لكي وبعدين تاخذيها معاك مننفوخه وهذي راح تسبب لك ازمه لانها مره سببت لي ازمه وحرمت ههه
المهم ياعيوني لازم يكون جو الغرفه جو هادي ورومانسي وخيالي من كل النواحي من ناحيه اللبس والروايح والاضاءه والميوزيك والترتيب وكل شي..
والاغاني اللي بتحطيها في الغرفه على حسب ذوقك بس لازم يكون شي هادي ويعبر عن حب وغزل..
ونسيت اقولك سوي ممر بالورد من المكان اللي بتكون في الحفله الى مكان الغرفه يعني لما تروحوا الغرفه انتي وياه امشو على الورد..
او عندي طريقه احلى واروع انتي لما تخشي الغرفه ارسليلو مسج على جوالو وقوليلو فيه حبيبي تبغاني امشي ورا الورد وهوه راح يمشي على الورد الين يوصل لك الغرفه..
بس حبيبتي اتمنى اكون افدتك وساعدتك وقدرت اوصل للشي الي تبغيه
والله يوفقك ويسعدكم يارب

واو
شوهالأفكار هذي هذي جنان روعه حبيبتي
الصراحه عيشتيني جو الحفله وانا جالسه اقرأ ردك
المهم والله تسلمين كثير كثير وياليتك بجنبي علشان لما احتاجك على طول القاك واستشيرك
راح انفذ كل شي ومن الحين راح اشتري واجهز كل شي لأن افكارك حمستني بشكل ماتتصورين
والكلام اروع واروع اللي بكتبهم له راح ينجن ويدوخ شكله مو مخليني اكمل الحفله ههه
الصراحه اكثر شي عجبني هو اللوك شكلي وشعري وملابسي لأن اكثر شي كنت افكر فيه وراح اتبع افكارك...
مشكوره مره ثانيه ياحلوة

نسيت اقولك سلامة ظهرك واناملك الحلوة
تعبتك معي ياقلبي

الله علي ي الرومانسيه بسرعه سووها قبل واوا يجوون

ام بناتي
شمعنى كلامك الصراحه مافهمت
لا تاخذين فكرتي ههه

درييم انتي صراحة خطيرة مشالله وأ فكاارك رايقة مررة ولزوزة انا سويت نصها في عيد ميلاد زوجي بس خسارة في افكار قلتيها مررة عجبتني ما خطرت في بالي بس انشالله في عيدميلادو الجاي , بلييز لا تبخلي علينا بافكارك الجديدة وثانكس
وانشالله يزبط معاك العيدميلاد ياروان وتنبسطوا

اهلين ياعسوله
الحمدلله اهم شي انو افكاري عجبتك ويالله شدي حيلك من دحين لانو عن جد يبغالها شغل
ولو حبيبتي تعبك راحه انتي بس امري
الله يبسطكم كمان وكمان وايامكم كلها فرح وسرور
واذا في اي شي تاني تبغيه انا تحت امرك لايردك الا لسانك حبيبتي
ربي يسعدك
pink^Butterfly
اهلين حبيبتي والله انتي الرايقه واللزوزه ربي يسعدك مع زوجك ان شاءالله
مشكلتي ما اعرف اكتب شي الا اذا احد سألني عنو يعني انتي اذا في خاطرك شي حبيبتي قوليلي
وانا راح اساعدك فيه ان شاءالله
ربي يسعدك