احلى والذ شاورما والطريقه من معلم شاورما تركي

1. بطاطس مقلي


2. صوص الثوم وطريقتو سهله وطعمو جنان زي المطاعم


3. الطريقه..

اهلين حبايبي كيفكم ان شاءالله بخير
بصراحه انا من عشاق الشاورما بشكل مو طبيعي وشفت بنات هنا زيي يموتون فيها
فقلت بكتبلك طريقة الشاورما اللي عندي لانها بجد لذيذه واحلى من المطاعم والطريقه من معلم شاورما في تركيا
كيف عرفنا الطريقه السالفه ومافيها ياطويلات العمر انو ابو صديقتي من عشاق الشاورما لدرجة انو مشتري الشوايه حق الشاورما ثنتين وحده لحم ووحده للدجاج وحاطها في المزرعه ولما تتجمع العايله يسويلهم شاورما ( كتبت لكم قصة حياتو ها ) ههه
المهم مره كانو مسافرين لتركيا فأبوها سأل معلم شاورما عن طريقتها وماشاءالله ماقصر التركي على طول قالو هيه ههه
انا ذقتها عند صديقتي واخذت الطريقه منها على طول بس الطريقه من غير مقادير تعتمد على النظر وحاسة الشم ههه والله عن جد لا تضحكون المهم
المقادير..
دجاجه او اكثر حسب الكميه مخليه من العظم ومقطعه شرايح بالطول
بصل مبشور وكل مازاد كل ماكان احلى
ثوم مهروس
قرفه مطحونه
خل ابيض
عصير ليمون
فلفل اسود وملح
الطريقه..
نخلط كل المقادير مع بعض بس نزيد في القرفه والخل وكيف تعرفي انك وصلتي للمطلوب شمي الخلطه اذا حسيتي انو ريحة القرفه والخل باينين مره هذا هو المطلوب وسر النكهه
خليها من الليل الين ثاني يوم واذا كنتي مستعجله اقل شي خليها 3 ساعات انا دايما اكون مستعجله ههه بس 3 ساعات تفي بالغرض بس كل ماطولت كل ماكانت اطعم
بعدين حطيها في صينيه هي والصوص اللي فيها ويا انك تدخليها الفرن على نار هاديه او انك تحطيها على النار وبرضو نار هاديه بس في كلتا الحالتين تكوني مغطيتها بقصدير انا اغلب وقتي اسويها على النار
المهم خليها الين تطلع كل مويتها وتستوي وتتشرب الصوص واذا لسه باقي صوص وهو راح يكون باقي ارفعي جهه من القدير وعلي النار شويه عشان تنشف ولما تنشف حطي عليها شوية زيت وقلبيها عشان تتحمر
ولما تخلص سويها ساندويتشات
وكيف تسوي الساندويتش..
خبز عربي مفرود او شامي اصغر نوع
خيار مخلل مقطع بالطول
بقدونس مفروم كبار
خس مقطع شرايح رفيعه
بصل شرايح (اختياري)

بطاطس مقلي

صوص الثوم وطريقتو سهله وطعمو جنان زي المطاعم

( ذوبي 3 ملاعق اكل نشا في نص كاس مويه اذا تبغيه ثقيل وفي كاسه اذا تبغيه خفيف وحطيها على النار الين تثقل بعدين حطيها في الخلاط الكاس وحطي عليها 5 فصوص ثوم مهروس و6 ملاعق مايونيز وذرة فلفل اسود وذرة ملح وملعقة اكل زيت وعصير ليمونه واخلطيها الين تتجانس وتصير ناعمه وتقدري تتحكمي بكثافة الصوص اذا تحبيه ثقيل او خفيف عن طريق المويه وفي الشاورما الثوم الثقيل افضل)

الطريقه..

افتحي الخبز بس خلي جزء منو متماسك حطي كمية من الدجاج جوا في النص وحطي عليها صوص الثوم وحطي البقدونس والخس والخيار والبطاطس والبصل للي يحبو والشطه كمان للي يحبها ولفي الساندويشه لفه وحده بس زي الشاورما اللي في المطاعم واذا عندك الورق تبعها لفيها فيها والله راح يفكروك جايبتها من برا عشان طعمها
وعلى فكره تقدر تستخدمي خبز الصاج بدل الخبز العربي تلاقيه في السوبرماركتات الكبيره انا اسويه بالنوعين على حسب كل واحد في ايش يحب
واستمتعوا بألذ واحلى شاورما واتمنى انكم تجربوها لاني متأكده انها راح تعجبكم موت