اصدقاء زوجي النشبه

بسم الله الرحعي على من الرحيم
السلام عليكم ورحمة الله وبركاته
وش اخباركم بنات ان شاء الله تمام ...
دايم ادخل هذا القسم واقرأ مشاكلكم واراء وحلول البنات من جد معاونين ومتحابين الله يوفقكم يارب
ويفرج همومكم
بناات انا بادخل في موضوعي على طول لان ماعرف اكتب مقدمات ولني بعد مقهورة
انا حابه افضفض واتكلم واقول الي في قلبي لاني خلاص احس اني بنفجر من الكتمه ومن الضيق
بنات انا مشكلتي مع اصدقاء زوجي النشبه وش نشبه والله لزقة عنزروت وشوي عليهم بعد
ماتهنينا منهم ناشبينا في كل شي
موبكلهم هم ثلاثه الي دايم اسمع اصواتهم
يجوون يمكن كل يوم واذا مو كل يوم يجون كل يومين بس كل ماتاخرو في الجيه كل ماطولوا علينا ونشبوا لنا اكثر
كل واحد جاي بكمبيوترة ويالله تبدا الاصوات والازعاجات يشغلون اغاني والصوت الى الاخير واغاني انجليزيه بعد يعني مرة ازعاج
ونسوي لهم شاهي بسرعه وغدا كود يتغدون ويستحون ويروحون ويفكون من الازعاج الي مسوينه
بنات نسيت لاقول لكم زوجي طالب يدرس برى المملكه <<<<غثيتينا دايم تقول ذا الجمله
يعني انا وياة على مكافأة الجامعه وابوي وعمي (ابو زوجي ) الله يحفظهم اذا احتجنا شي مايقصرون بس ولو الواحد يستحي شوي صح ولا الا
المهم يابنات\\
والله لو على الاكل والشرب مايخالف صدق انهم جوج وماجوج مايخلون شي حت المويا والله يخلصونه
المشكله يابنات اذا جووا ترتفع اصواتهم ويضحكون بصوت عالي بكل وقاحه والاغاني الي يشغلونها
والله الي بجمبنا ساكنين هادين مرة ولانسمع اصواتهم وبعضهم غير مسلمين
والحن يالمسلمين مسوين الازعاج والاغاني والصياح ياربي وش ذا؟؟
طيب اذا بنقول الاكل والشرب من عندنا مايخالف
ازعاج وضحك واغاني بصوت عالي ازمه وبتعدي
لكن يقعدون الى الساعه 3 الفجر منتصين خير وين حنا فيه واحيانا الا ان يأذن الفجر ويالله بعد ماودهم يطلعون هذا الي مضايقني
يعني مايكفي وحشة الغربه وضيق المكان الي حنا فيه بعد بيضايقون في البيت
الحين انا وزوجي متزاعلين والسبه هم خلاص الحين صار لي حول العشر اشهر هنا واقول كل يوم ازمه وتعدي يمكن لان تونا جاين ناشبين لنا او يمكن مايحبون اكل مطاعم بس والله تعبت على ذا الحال من يوم جيت من السعوديه الى الحين هم كل مرة تزيد وقاحتهم
صار معاد يكلمني وينام في الصاله عشان قلت له انهم نشبه ومزعجيين
الحين رمضان بيجي ...من فطر مسلم له مثل اجرة في معنى الحديث... مايخالف الفطور الحمد لله الخير واجد ...لكن اخاف ينشبون ولا يطلعون الابعد مايأذن الفجر يضمنون انهم يسحرون ولا ياخذهم الجوع في النهار
والاغاني الي يشغلونها مابي اسمعها في رمضان كفايه الاشهر هذي ازعاج واثم فيها بعد في رمضان اخاف يشغلون اغانيهم الي تجيب الهم
وكم مرة جابوا معاهم سماعات كبار وشغلوها انا انهبلت كم اصكك في البيبان بقوة ابغاهم يستحوون يحسوون ان في ناس مظلومه مكبوته جوة خلاص انا بنهبل منهم
الحين زوجي متزاعله انا وياة والسبه هم
امانه بنات قولولي انا غلطانه في شي ؟؟؟
والله من جد تعبت نفسيتي منهم ومن الغربه
والله لو يجلسون باحترام والله مازعل ولاقول شي لكن الضحك الهبال الي يسوونه وكنهم في عزبتهم ماكنهم في بيت واحد معه حرمته
انا سكت ونسيت كل الي راح بس اخاف في رمضان ينشبون لنا
والله لو بيفطرون وبيتسحرون وهم محترمين انفسهم ماقلت شي بالعكس
معاد صرت اشوف زوجي اما يذاكر دروسه واذا فضى جوا واخذووة يتمشون
والله اخر مرة طلعت رحت للجوازات اجدد الاقامه << في احد بيكفلني ههه
والي قبلهارحت للعيادة اتاابع للحمل الله يسهل علي ويتمم لي على خير انا وكل الحوامل
الحين ابغاكم تقولوا لي من الغلطان ومن الي له حق يزعل انا ولا زوجي...وادعوا لي بعد ارجع لبلدي ووطني حبيبي بصحه وعافيه ياحبيي لسعوديه واهلها
انتظر ردودكم ....