اقري قصتي واستفيدي

1. والإيمان بالقضاء والقدر و الصبر


2. الخلاصة : >>> ياكثر هذرتك


3. والناس ما تحترم اللي مو واثق من نفسه

بسم الله الرحمن الرحيم
الحمدلله رب العالمين والصلاة والسلام على أشرف الأنبياء والمرسلين نبينا محمد وعلى آله وصحبه وسلم أجمعين
أخواتي و حبيباتي
ترددت كثيراً في كتابة قصتي
ولكني توكلت على الله متمنية من كل قلبي أن يصل لكن أثرها ونفعها
ومتمنية من الله أن يقبل إخلاص نيتي
ويغفر لي إن كنت أخطأت
أولاً و قبل كل شي .. الناس تختلف شخصياتها و أطباعها
وحتى المجتمع يختلف هذي المنطقه عن الأخرى
: للتنويه فقط :
بسم الله أبدأ
..
في سن ال 18 كان واحد من جماعتنا متكلم عني انه يبيني وكان وقتها يدرس وكل العيلة تعرف بالشي هذا
بعدها بدت تصير مشاكل بين عيلتي وعيلته ولما توظف بعد 5 سنوات غدر فينا و تزوج وحده ثانيه بكل بساطه
من التجربة الأولى أقول لكم
لالالالالالالالا تسمح الوحده أبدا انه واحد من العيله يحجزها او حتى تطلع كلام فلان يبيني ولا حتى
تسمحوا له يقول حاجزها أبداً أبداً
حتى لو كان رجال موثوق منه
تبي بنتنا تعال جب اهلك واخطبها رسمي
أما كلام ما كلام فهذا شي مرفوض
مهما كاان الولد طيب و أخلاقه عاليه حتى لو ضمنتوه ما تضمنوا الزمن
يابنات لا تمشوا ورا عاطفتكم وبس ولا تقولي لصاحباتك فلان يبيني
حكمي عقلك أدري شعور حلو تكوني مرغوبة
لكن لا تحطي نفسك بموقف يكون فيه ضرر عليك مستقبلا ولو نص بالميه
الحين يعني حالتي الكل درى عني اني محجوزه
وبعدها تزوج غيري اكيد الناس راح تتسائل ليه
وطبعا العيب في البنت
حسبي الله ونعم الوكيل
أكمل لكم ...
في الوقت اللي هو ملّك بعدها بفترة بسيطة تقدم لي واحد مو من العيله
ولما سأل ابوي عنه في عمله مدحوا فيه ما خلو شي زين ما قالو عنه
المهههم ملكنا
وبعد ما ملكنا و جلست معه بالمجلس بدأ يتكلم .... وكل ما تكلم تعجبت !!!
ايش الأسلوب هذا .. ايش التعليقات هذي !!
ليه يقول كذا !!
ويوم ورا يوم تبين أشياء ما تعجبني فيه
مثلا ..
اقول انا يعجبني كذا .. مايلتفت للي قلت و يسوي عكس رغبتي
أحاول افهمه ترا البنت تحب اللطافه و الرقه في التعامل قال أنا ماعندي كذا !!! هاه
بروح عند صديقتي يقول لا انا بجيكم اليوم ومافيه روحه لصديقتك !!
يقول لي ابي نطلع مطعم سوا .. ابوي رفض قام دق علي ويقول انا باخذ مسدس افجر راسي !!!!
سلامات !!!
وتلفظ على ابوي !!
أقول له صل على النبي .. رد ماني مصلي على أحد
وشوي شوي بدا ياخذ راحته و افتكر انه ملكني و بيتحكم بي
غصب علي و على أهلي بعد !!
يابنات أهم شي
الإحترام
إذا ما احترمك اليوم ماراح يحترمك بكره صدقوني
اذا ما احترم اهلك فا طبيعي ما راح يحترمك
المهم أنا قمت ما أرد عليه لما يتصل علي بعدها قام يكلم ابوي وتهاوش معه
وليومكم مدري وش صار بينهم وجاني ابوي ( الله يرحمه ) وخذ جوالي قال لا تكلمينه وقلت أحسن
المهم أمي راحت وقالت لأبوي ترا البنت مو مرتاحه معه
وقال اللي هذا اوله ينعاف تاليه >> يابعدي يايبا الله يرحمك ويدخلك الفردوس الأعلى
والحمدلله تم الانفصال بعد ما رجعنا له المهر و الشبكه اللي زي وجهه هع
وومن تجربتي الثانيه اقول :
كل انسانه من حقها تعيش حياة كريمه و تُعامل بكل حب و إحترام واللي ما يقدرك قولي له
في أمان الله :ق1:
والرجال من البدايه تعرفينه لا تعطي فرص و تقولي يتغير
لا تبخسوا انفسكم حقها لا تقولي من بيجيني و انا أُعتبر مطلقه
هذا /// عُمُر /// مو يوم تبين تعيشي عمرك بتعاسه وشقا مع هالرجال ليه !!
أما اللي توافق على رجال يذلها و ما يحترمها لا تشتكي بعدين اذا ظلت معه محد ضربها ع يدها
والله أعرف وحده ملكت مرتين وانفصلت وتزوجت بالاخير واحد مبسوطه معه
طيب
تسألوني ندمت ؟
لا ماندمت
صحيح حز في نفسي ليه صار لي كذا
وواعترتني لحظات خوف وحزن ما أنكر بس توكلت على ربي
وقلت اللي ربي كاتبه بيصير
وحكمته تفوق عقل الانسان
المهم مرت على سالفة انفصالي سنتين
تسائلت هالحين الترزز عند الناس والعروس مانفع >>> صريحه خ
وجانا كم واحد بس ربي ماكتب نصيب
وما يأست و قطيت عمري على اي احد
قلت انا ادور عند الناس !! رزقي مو من عندهم من عند الله
وتندمت اني ما دعيت الله وطلبت منه هو سبحانه
المهم انتبهو للي بقوله زين وحطوه حلقه بودانكم >> مدرسه صايره هع
جاهدت نفسي بالبعد عن المعاصي
لجأت لله و دعيته يارب ارزقني الزوج الصالح اللي يسعدني
كثفت الدعاء بشكل ما تتخيلونه و ألححت بالدعاء
أدعي بالسجود وو تحريت اوقات الاستجابة زي اخر ساعه من نهار يوم الجمعه
الوقت اللي مابين الأذان والاقامه
وقت نزول المطر واخر الليل
وكان وقتها رمضان واجتهدت بالدعاء قبل الفطور و بالتراويح والقيام
كثرت من الاستغفار وقراءة الأذكار والرقية
وبعد 3 شهور فقط من الدعاء المتواصل
تقدم لي واحد وكنت خايفه
ما أنلام تعقدت من اللي مر علي
استخرت وو صراحه ما حسيت اني مبسوطه وموافقه ولا كنت رافضه وكارهه
عطينا اجابه <<<
مافيه اجابه >>> خ
مسكت خالي وقلت له انت المسؤوول عني تروح تسأل عن الرجال عدل
وما قصر راح وسأل ما خلا أحد
ومسك واحد وقال بسألك وانت مسؤول عن شهادتك أمام الله >>> خوف الرجال خالي الله يهديه هع
بس ما قصر فديته ووالحمدلله الرجال مدحه
تقولو طيب اخلصي علينا وش صار ؟؟؟؟
صار
>
>
>
>
اني
>
>
>
>
>
اني
>>>>> يابيخك
>>>> بتنطق هع
وافقت
و تزوجته و جبت منه اثنين
أكيد فرحتو لي <<
مو أستاهل ؟؟
ويابنات ياحبيباتي
مافيه احد كامل ومافيه حياة كامله ومو كل شي تتمنيه تلاقيه
والحياة لابد فيها منغصات و صدمات وما انخلقنا أصلا إلا لعبادة الله
شوفوا الانبياء هم أشد الناس بلاء !!
خللو إيمانكم بالله قوي

والإيمان بالقضاء والقدر و الصبر

الخلاصة : >>> ياكثر هذرتك

• كل شخص يستحق أن يعامل بإحترام
• لا تلتفتي للماضي ولا تحزني عليه و أؤمني بأن كل ما يصيبك خيرة
• تذكري أن رزقك من الله مو من الناس
• اذا بغيتي شي ادعي الله تضرعي له توسلي له و أهم شي الاستمرار و الإلحاح بالدعاء وعدم اليأس
• اكثروا من الاستغفار وابعدو عن المعاصي والذنوب
• لا ترمي نفسك للي ما يستاهلك ومن باعك بيعيه
• ثقي بنفسك واذا ماتثقي بنفسك أوهمي نفسك انك واثقه من نفسك الين ماتتعودي

والناس ما تحترم اللي مو واثق من نفسه

• من تواضع لله رفعه واللي تشوف نفسها بزياده حبتين خل تقعد بيت ابوها ( محد يحب المغرورين )
• اقرأو كتاب لا تحزن للشيخ الدكتور عائض القرني ففيه من العبر ما يفيدكن في حياتكن
• فيه تشبيه للزواج اعجبني ,, وهو انه الزواج مثل التقاء نهرين .. اول ما يلتقون يتصادمون لكن يتوحدون بالأخير و يصيرون نهر واحد
• ثقي بأن كل ما يصيبك خيرة لك
• الصبر ثم الصبر ثم الصبر قال تعالى : (( إِنِّي جَزَيْتُهُمُ الْيَوْمَ بِمَا صَبَرُوا أَنَّهُمْ هُمُ الْفَائِزُونَ ))

أخيراً
ما بخلت عليكم بتجاربي و فتحت لكم قلبي و اعتبرتكم خواتي
فلا تبخلو علي
بالدعاء لأبي و أخي بالرحمه والمغفره
وادعوا لأمي ربي يصبرها و يجبر قلبها
سبحانك اللهم وبحمدك أشهد أن لا إله إلا أنت أستغفرك و أتوب إليك