الايميل الى بعتهولى خطيبى وبسببه هافسخ الخطوبه

السلام عليكم
مشكلتى غريبه ومش عارفه اعمل ايه ؟
انا مخطوبه من اسبوعين ، خطيبى مهندس كمبيوتر
كريم ووسيم ومتدين وطيب وحنين وبيحبنى ومتيسر ماديا وعنده شقه وعربية وشغل ثابت والاهم انه بيموت فيه
المشكلة انه مجنون بالكمبيوتر والكمبيوتر كل حياته
واى حاجه نتكلم فيها لازم يدخل فيها الكمبيوتر
فى اول زياره بعد الخطوبة ، اصر انه يشوف الكمبيوتر بتاعى
انا شكيت انه عايز يفتش فيه ، لكن الى حصل مكنتش عارفه اضحك ولا اتضايق
اول ما شغلت الكمبيوتر ... بص له بأشمئزاز وقال "أيه دا ؟ ... مين الى منزلك الويندوز دا ؟ وازاى مستحملاه ؟؟؟"
وطلع من شنطتة اسطوانه حطها فى الكمبيوتر وفى 5 دقايق كان عمل فورمات للويندوز وبدء ينزل ويندوز جديد !!!!!!!!! (وانا كنت مرقباه ... ما فتش فى أى حاجه)
تنزيل الويندوز والبرامج خد منه حوالى ساعة (نص الزياره)
الحقيقه حسيت ان الجهاز كأنه جديد وبقى طلقه وفرحت بيه
بس كنت هافرح اكتر لو كان الوقت دا قاعدين مع بعض وخاصة اننا لسه مخطوبين جديد
بعد ما مشى كلمت ماما ... قالت لى ما تضايقيش ، هو عاوز يوريكى انه مهندس شاطر !!! اقتنعت بكلامها وعديت الموقف .
النهارده الصبح اتصل بى على الموبيل وقالى بعت لك ايميل افتحيه وردى على النهارده .
انا مش هاقول كتب لى ايه فى الايميل ، انا هاعمل كوبى وبيست ، وانتوا احكموا وانصحونى لانى هاتجننحبيبتى الكتكوته ،،،
فى برنامج جميل جداً عجبنى موت، برنامج قياس شدة التوتر والعصبية ،،،
عاوزك يا حبيبتى تحملى البرنامج وتفكرى فيه كويس وتقوليلى النتيجه ايه
البرنامج:
TENSIONtest
وفى موقع جميل جداً عجبنى ، الموقع اختبار ذكاء ،،،
عاوزك يا حبيبتى تدخلى الاختبار وتفكرى فيه كويس وتقوليلى جبت كم
وتعملى لى حفظ (Print screen) للنتيجه بتاعتك وتبعاتيهالى
الموقع:
IQtest
خطيبك الى بيحبك -------------------------------------------------------
ايه رائيكم حاسه انه بيستغبينى وعاملنى فار تجارب
طيب لو كنا مش متقاربين ، هيعتبر دا عدم توافق (زى عدم التوافق العلمى والفكرى) وممكن يفسخ الخطوبة ؟ هاتجنن وبأفكر افسخ الخطوبه.قولولى أيه رايكم ؟ - وبعدها هاقولكم ايه الى حصل !