الكل ابيه يدخل وينصحني

1. وش اخباركم بنات وش علومكم عساكم طيبين وش


2. اخبار امكم وش اخبار ابوكم وش اخبار اخوكم << ياليل البعارين

السلام عليكم ورحمة الله وبركاته

وش اخباركم بنات وش علومكم عساكم طيبين وش

اخبار امكم وش اخبار ابوكم وش اخبار اخوكم << ياليل البعارين

بنات انا بقولكم سالفتي وابيكم تقولون لي الحل عاد ان شاء الله انكم مانتب مقصرين معي بنات انا شعري قبل 5 شهور كان ناعم ولنص ظهري وخفيف بس موب مره يعني حلو المهم اختكم في الله مرقوعه بقدر <<< طابق والله علي الأسم
سويت ريجيم من مخي لأني اشوف كل البنات اللي يقربون لي رشيقات وانا ماكنت دوبا بس كنت ابي اطلع مثلهم وكان وزني 60 وخلال 3 شهور وانا مآكل الا وجبه واحده وكنت مستانسه انا وخشتي لأن كل من شافني قال نحفتي لاتقولون وشلون وجبه وحده وشلون تتحملين كنت الله يسلمكم اروح المدرسه وانا اطقطق بهالعلك وكنت اروح مواصله واجي من المدرسه واخمد حتى ماتشتهين شي تبين تنامين همين الى قمت من النوم دبيت بهالعشاء مع انها طريقه مضره وانا داريه بس صار روتين لي كل يوم كذا لحد ماجتمعنا بالاستراحه حنا والبنات الرشيقات اللي صرت انحف منهم المهم انا مع ريجيمي الي كنه وجهي طاح شعري كله مابقى الا حبيبتين وكل ماناظرت شعري قلت آآه ياشعري منول واهلي كلهم عارفين السبب ليش وانا بعد عارفه ليش قلة الاكل والتغذيه الصحيه المهم واشوف شي غميضه والله غميضه صرت انحف منهم بس وش عقبه عقب ماطاح شعري كله صرت ماناظر اجسامهم اناظر شعورهم ماشاء الله تبارك الله لآخر الظهر واسود وكثير وناعم ولمعان ومير تحوم تسبدي من نفسي قلت وش فايدة الرشاقه بدون شعر المهم كان وزني وقتها 49 عاد جا رمضان وقمت آكل آكل آكل ابي شعري يتغذى مايهمني اسمن ولالا مليت من شعري عاد الحين وزني تقريبا 55 وشعري للحين حبيبتين معقوله يابنات الشعر يلزمه عشان يرجع مثل الاول اكثر من شهر علموني يابنات تكفون تراي كمخه قسم اني دمجتن على الهبني تكفون قولوا لي وشلون احافظ على جسمي وبنفس الوقت اغذي شعري
والله اللي ترد على موضوعي لأدعيلها ليل ونهار واخلي امي تدعيلها تكفون عطوني الحل والتغذيه السليمه وشوروا علي