اللهم أجرني في مصيبتي واخلفني خيرا منها وما زلت راجيه عفوك

1. السلام عليكم ورحمة الله وبركاته

السلام عليكم ورحمة الله وبركاته

الحمدلله الدي لايحمد على مكروه سواه , اللهم أجرني في مصيبتي واخلفني خيرا منها .اليوم الصباح صحيت من النوم على الم برحمي من جهة اليمين وشد بخصري ورحت الحمام الله يكرمكم وشفت اللي خايفه من شوفتها ومتعشمه اني ما أشوفها الا بعد 7شهور ونص لكن "وعسى أن كرهتوا شيئا وهو خيرا لكم وعسى أن أحببتوا شيئا وهو شر لكم"صدق الله العظيم ,وأول شي صار جسمي يرجف على بالي نزيف (مو راضيه اصدق انها دوره)وعلى طول على أقرب مستشفى قالوا تحليل دم لازم دام ان الدوره متاخره كل هالمده ممكن حمل وأول صدمه التحليل كالعاده نيجاتيف معقوله والمفروض اني بكمل 7اسابيع من آخر دوره يعني كمان اسبوع وبكمل شهرين كيف مابان الحمل (أبغا سونار )وأنا معصبه والسستر لسان حالها يقول(يالله سكنهم مساكنهم) وبكل هدؤ تهديني وتقولي الحين بنسويلك سونار بس لاتزعلين يعني حسيت انها شوي وبتقولي بعطيكي شوكولاته بس خليكي شاطره ,المهم على غرفة السونار وأنا مجهزه نفسي وشاربه برميلين مويه عشان يشوفون كيس الحمل بالقوه والله لو كيس حمل بنمله بيبان من ديك الحشره اللي فيني , وانسدحت بالقوه من شدة الألم الي فيني وعيوني بتطلع من محلها ورقبتي بترجع لورا الا أبغا أشوف التصوير لآن التلفزيون مو محطوط قدامي لا وراي شوي والدكتوره بدت تعصب تقولي اثبتي ومدي جسمك عشان نشوف كويس وأنا الا بشوف اي شي وشوي اشوف شي مدوره صرخت كيس الحمل لولولولولولولولولولولي ,والدكتوره كنها جالسه بغرفة عزى أنا فرحانه وهي بس تردد لاحول ولاقوة الا بالله ان لله وان اليه راجعون وأنا أقولها مو مشكله لو مو باين الجنين يمكن توه بدري اهم شي كيس الحمل باين وهي صوته يعلى لاحول ولاقوة الا بالله وانفجرت الدكتوره بوجهي (ياماما من قال لأهلك انك حامل من أصله , والأخت اللي هي انا مصره وواثقه طبعا حامل شوفي كيس الحمل واد على الجنين وتوني ماكملت كلمتي اللي جالسه ارددها كنها موال صرخت وقالت هدا كيس دموي مو كيس حمل وهو اللي مسويللك الألم الدم تجمع برحمك وسوا كيس لآنه مانزل بوقت الدوره , آآآآآآآآآآآآآآآه ديك الساعه صارت فيني مشاعرالحزن والقهر والصدمه من نفسي ومن اصراري وتفكيري اللي وصلني لهالحاله لكني رجعت لعفلي وقلت اللهم أجرني في مصيبتي واخلفني خيرا منها وان لله وان اليه راجعون ,وحسيت مويه بارده انكبت على صدري يوم رددت هالدعاء وعلى طول مرة في بالي آيات كثير وحسيت ان الله هون علي يوم تدكرتها والحمدلله وخرجت من المستشفى وأنا راضخه وراضيه بحكم الله وفي نفس الوقت مثل الدجاجه المدبوحه مثل مايقولون وحملت هم زوجي وصدمته ومو عارفه كيف ابلغه وهو حبيبي متعشم وفرحان ولغى ترتيباته كلها في السفر وخسروه كثير عشان هالتغير قال عشان لاأتعب في السفر وأنا حامل آآآآآآآآه بس يارب لاتحرمنا ولاتكتبنا عقيمين , المهم رحت البيت وأنا مستقويه بس اسمعه ان لله وان اليه راجعون اللهم اجرني في مصيبتي واخلفني خيرا منها على طول جاني وهو مدهول ومفجوع ووده أقوله اي شي الا اني مو حامل لكن هدي ارادة رب العالمين وحزن حبيب قلبي وحسيت عيونه بتدمع على طول خرج من البيت ديك الساعه كان ودي أصرخ واجري وراه واخده بحضني (وحده متأثره بالأفلام الهنديه)ورجع بعد فتره وهو مرتاح وقالي ان شاء الله ربنا بيعوضنا و من هالكلام جلسنا نطيب خاطر بعض والله نحزن خايفين من أعمارنا اللي جالسه تعدي لكن ربنا كريم ومو ناسينا ان شاء الله, والله يابنات اليوم هدا مدري أول مره بحياتي تتجمع بداخلي أحاسيس كثير وتصدقون اني بعد فتره حسيت براحه غريبه وفرح وحتى زوجي وقلنا اكيد ان الله بيعوضنا خير ويارب اننا نكون من المبتلين الصابرين الحامدين لا المبتلين الساخطين يارب العالمين وربي كريم يابنات صدقوني ,ما كل وحده لاتشوف كم صار عمرها(تتكلم عن نفسها) ولا عمر زوجها ولا كم سنه راحت من زواجهم بدون أولاد كل قضاء الله وقدره خيره لنا ورحمه ماندري عنها , ان شاء الله كلنا بنحمل وبنفرح بتحليل الحمل البوستيف وبنزاحم تجمع الحوامل البكريات غصب طيب وبنحكي كيف ولادتنا بأحلى توائم آآمين ..
الحين داخل شهر الخير والرحمه والغفران , وربنا يبلغنا صيامه وقيامه ويكتبنا فيه من المعتوقين من النار ويرزقنا الحمل السليم عاجلا غير آجل ويقر أعيننا بشوفة أظفالنا انه سميع الدعاء , خلاص كلكم قريتوا توقيعي السابق اني ابغا بنوته وولدين في بطن وحده الحين بما اني حكمل السنه الخامسه من زواجي حطلب ربي انه يعوضني ب4 في بطن وحده ولا وحده تستغرب لأني طلبت القادر المقتدر الدي أمره ادا أرادا شيئا أن يقول له كن فيكون , وهو بيسمع دعانا قريب ان شاء الله ..طولت عليكم سامحوني بس والله حسيت ان بقلبي كلام كثير وما أقدر اطلعه غير لكم لو طلعته لأهلي بيحزنون ولو طلعته لغيرهم بيشمتون والحمدلله على كل حال , ربي لايحرمنا من بعض وربي يتقبل دعانا لبعض وان شاء الله نجتمع كلنا في جنات الخلود آآآمين يارب العالمين..