اللهم اجرني في مصيبتي واخلفني خيرا منهاإضآفة موآسآه من مشرفآت القسم

1. بسم الله الرحمن الرحيم

بسم الله الرحمن الرحيم

انا متابعة من زمان المنتدى بس ماعمري جيت لهذا القسم كان كل اهتماماتي بمنتدى الحياة الزوجية والولادة والامومة ....... بس سبحان الله يغير الله من حال الى حال .
ابدا قصتي من يوم دخلت الجامعة جا واحد من اولاد عمي وخطبني واحنا بمجتمع قبلي من النوع الي كان يقولون فلان لفلانة من وهم صغار وانا عشان كلامهم هذا ماكنت ابي ولد عمي المهم اربع سنوات وابوي يقنعني فيه وانا رافضة تماما وابكي واصيح وادعي والكل يمدحه المهم في يوم من الايام قررت اني استخير واوفق والي ربي كاتبه بيصير وبالفعل وافقت وبسرعة الريح جرت الامور على طول تمت الملكة وعلى طول شفته وبعدها بفترة بسيطة تزوجت وكان انسان جدا رائع حبيته بكل معاني الحب وهو بعد نفس الشي اتفقنا على كل شي وكان نادرا ماتحصل بينا مشاكل وجدا كانت حياتنا راقية يعني الاحترام كان اساس العلاقة بلاضافة الى انه كان انسان اجتماعي درجة اولى وشخصيته جدا قوية مسموع رايه من كبير العيلة ومن صغيره ومن اصحابه ومن كل الناس الي يعرفونه المهم عشت اجمل ايام عمري وجبت ولدين وماكان يقصر على بشي حبيته للجنون وكنت مستعدة ابيع الناس كلهم واشتري رضاه ..كان انسان جدا تهمه العادات والتقاليد وجدا مثقف وطموح لابعد درجة أي شي نبيه لازم نخطط له وبالفعل كان يخطط لين مايصير عمرنا ستين سنة اذا ربي احيانا وش بنسوي وبالفترة الاخيرة حملت وبعد اربع شهور عرفنا انها بنت وهو كان جدا يحب الاطفال وطوال حملي وهو ينتظر متى اولد وش بيسويلها وش بيجيبلها و,, وجا اليوم الي ولدت فيه وكان جدا مبسووط وقبلهم بفتررة تحسنت اخلالالاقه جداا على الرغم من طيبت اخلاقه اصلا بس ابدا كان يعدي ومايدقق على أي شي وبعد ماولدت بشهر جا واخذني من عند اهلي ووداني لبيتي وقال انا بروح اخلص شغلي وارجع بعد ثلاثة ايام وبعدها بنطلع نغير جو انا وانتي ونستانس بعد التعب الي تعبتيه وودعته على اساس اني اشووفه بعد كم يووم بس القدر كان اسرع مني ومنه .. في صباح اليوم الثالث كلمني وقالي انا خلاص بخلص شغلي وامشي قلت توصل بالسلامة وبعدها بساعتين ادق مايرد ادق مايرد واتفاجأ بخبر انه سوى حادث جلست ابكي ابغى اروح له بس ماحد عطاني وجه كلهم قالو لي احنا نروح وبعدين تجين لان الحادث صار على الطريق وانا ابكي افكر بس اقول ياربي انه مافيه شي وادعي لو بس كسور خفيفة وشوي شوي صرت ادق على خوالي عماني كل مااكلم احد يقولي اصبري شوي ماندري هو بالمستشفى وبعدها خفت قلت اكيد اصابته خطيرة وابكي وادعي ربي لين جاني الخبرر وانا بين امه وخواته انه مات. حسيت الدنيا انقلبت فوق راسي وربي يابنات من هول الخبر اني تجمدت ماقدرت ابكي ولادمعة من عيني رضت تنزل والي في البيت كلهم يصيحوون ويبكوون وانابس اذكر اخر مكالمة كلمني فيها وجلست على حالي لين جا الصباح ورحت للمغسلة ويوم شفته متمدد طحت عنده وانفجرت بكى هذيك اللحظة صدقت انه مات بكيت لين طحت وحسيت قلبي طلع من مكانه بس الحمد لله لله ماخذ وله ماعطى ماعمري تخيلت اني بنحط في هذا الموقف بس حمدت الله وشكرته ودعيته انه يخليلي اولادي الي هم من ريحته ويجمعني معاه بجنات الخلد يارب العالمين وزي ماكان زوجي بالدنيا ان شاء الله يكون زوجي بالاخرة وتيقنت ان الله اذا احب عبدا ابتلاه وتقينت ان المؤمن امره كله خير واملي في الله كبير اني اكون الامراة الي تسابق الرسول صلى الله عليه وسلم عند دخوله الجنة فيقول الرسول صلى الله عليه وسلم من انتي ومالك؟ فاقول انا امراة مات عني زوجي وجلست على اولادي .
اللهم اجمعني بزوجي يارب العالمين في مكان لانفارقه ابدا وارحمه واغفر له ووسع مدخله ونقه من الذنوب والخطايا كما ينقى الثوب الابيض من الدنس.اللهم واعينني على تربية ابنائي التربية الصالحة الي ترضيك عني يارب العالمين, اللهم واجلعني اجاور حبيبك محمد صلى الله عليه وسلم ,وزدني زهدا في هذي الدنيا ياكريم ياعزيز.
بنات نصيحة مني هذي دنيا فانية وغدارة وماتساوي عند الله جناح بعوضة واحنا نجري وراها ونسينا حديث الرسول صلى الله عليه وسلم عن الامل والاجل فاملنا جدا بعيد واجلنا جدا قصيرر.