الله يوفق من ترد علي ويسعدها دنيا واخره

السلام عليكم أخواتي
أولا أحب أشكركم على جهودكم في مساعدة اخواتي
أنا عروسه جديده لي شهرين متزوجه
الزواج كان مسؤوليه بالنسبه لي لكن الحمدلله بفضل من الله تكيفت معه وحاولت اني اكون قد المسؤليه بالتدريج
مشكلتي هي فراق زوجي
تخيلو ياخواتي عروسه ومالي شهرين وكل واحد منا في مدينه بعيده كل البعد عن الاخرى
غير ان ظروف عمل زوجي مره صعبه وماديا مزنوقين
ومستحيل نتلاقي الا بعد فتره طويله تتجاوز الشهرين
وكل شهرين او ثلاثه شهرين ينزل عندي يومين
صعبه ولله كيف اتكيف مع هالوضع..
نفسيتي تعبانه
انا في مدينه بسبب دراستي الجامعيه وهذي اخر سنه لي
وزوجي بسبب عمله
ومن كل الجهتين صعب نقله عندي او انا انقل عنده
متشائمه كثير ونفسيتي تعبانه في بيت اهلي
تعودت على الهدوء والاستقرار والان عدت كما كنت في بيت كله مشاكل وازعاج وفي الغرفه الوحده 7 اشخاص وارهاق نفسي وبدني وكل شئ
مشاكل بين اخواني الصغار وامي وابوي
شئ صعب وصفه
وزوجي وسيلة الاتصال بالجوال عنده منعدمه ..
مايعرف يتواصل مع الجوال ..
متعود على الكلام المختصر ونفسي افضفض له بس مو قادره ..
لي اسبوع عند اهلي وكل ليله ابكي على حظي ..
زوجي من ايام الملكه وهو كان مايتصل الا للاهميه لدرجة اني قلت انه انسان معقد وعديم الرومانسيه لكن لما عاشرته اكتشفت انه عكس كذا وهذا كله بسبب عدم قدرته على الانسجام مع المكالمات الهاتفيه ..
يمكن لانه في شقه كلها عزابيه وضغط عمل وهو بطبعه خجول ..
حاولت بكل الطرق انقل عنده لكن كان موضوع النقل صعب ..
واللحين اخر احتمال اني اجيب ورقة تعريف من الجامعه اني طالبه عندهم وياخذها للعمل ويطلب التحاق سنه كامله عندي في مدينتي ..
تهقون تنفع ؟؟..ماأبغى أتأمل ويروح كل شئ هباء منثورا
دعواتكم لي ان ربي يسر لي الامور..
تكفون دعواتكم يمكن دعوة وحده منكم تستجاب ..
انا والله الشاهد علي كل ماقرأت مشكلة وحده من الاخوات أدعي لها من كل كل كل قلبي يمكن دعوتي أنا لها تصيب ..
تكفون اللي عندها كلام ايجابي يدفعني للأمام لاتبخل علي لاني راح اتردد كثير لهالموضوع
واللي تفرش سجادتها لاتنساني من دعوه حلوه تطلع من فمها وفي ملك بيقول ولكي ايضا
الله يسعد ويوفق من قرأ موضوعي ورد علي بدعوه بسيطه وكلمه تدفعني للأمام
أسأل الذي أخرج ماء زمزم فرجا لهاجر أن يخرج لي ولقراء واعضاء منتديات الفراشه النسائي فرجا وسعادة لاشقاء بعدها