الو الو وطني الغالي الو وطني ارجوك تسمعني

ألو ..
ألو ..
ألو ..
وطني .. حبيبي .. عمري
أرجوك ما أسمعك
بلكي تعلي الصوت
أسمع رصاص و بچي
وعبر الأسلاك الدمع
يوصل وريحة موت
أسمع صياح ولغط
ومناداه يا هَل الربع
خل نرفع التابوت
أسمع عياط ولطم
وأم تنعه يا هلَ الولد
يلغربت بسكوت
ويل چنت وكت المسه
بيدك تگود الگمر
وتصيرله زاتوت
ويل چنت شمعة عرس
من تنطفي الكهربة
خدك يضوي بيوت
وچان الدرب يستحي
ويلوذ من خطوتك
لو ردت مره تفوت
ماخاف ليل اليجي
مادام في معصمي
يوليدي تضوي بتوت .
ألو ..
ألو ..
ألو ..
ماأسمعك ياوطن
بالخط إجت وشوشه
وإرتفع صوت القصف
وصوت أَب يگل للولد
شد روحك بعتبتك
يوليدي لا تنخطف
البارحه أعلِنَوا:
مجموعه ذبحت شمس
والصبح شفنه الصور
نشرتها كل الصحف
وأنباء أخرى إجت
عن إغتيال النهر
من سَيَّرْ إعله الجرف
والثالثه عن حقل
حرگوا ا ثيابه ومشِوا
والحال ما تنوصف
ومن قبل أول أمس
طَوقوا بيت اللغه
وباگوا ا بقايا الحرف
شدينه إيد الشرف
والطيب والمرجله
وأطلقنه إيد العنف
ألو ..
ألو ..
ألو ..
يمكن الخط إنقطع
مَيْؤَوسْ من هل الوضع
ماينصلِح هالظرف .
ألو ..
ألو ..
ألو ..
آسف ولا ينسمع
والصوت مو الأولي
الصوت أحس مرتبك
ذبلان ورد الحچي
بشفافك ومنكتل
من حقي لو گمت أشك
آني عرفتك قبل
من تحچي ينزل رطب
والدنيا تمطر ضحك
وبكلشي أشوفك تهل
حتى الصبح من يجي
ويه الشمس تشترك
وما چان واحد قبل
ياخذ رگبتك غفل
لو صار وكت العرك
وما بالَغِت لو گلت
چنت أويه موت النِزَلْ
لو زامطك تشتبك
والآن ياموطني:
دنگت لأصغر قزم
والچان يحلم قبل
يوصل الحَد الورك
معقوله ياموطني
إتخلي الگمر ينذبح
وسِتْر الشمس ينهتك؟ .
ألو ..
ألو ..
ألو ..
وطني .. حبيبي .. عمري
چن بلهاتك جَرِحْ
من تحچي أحِسْ مختنگ
شايل بچفك نهر
ميت ونخله إنكتل
مابين إديها العثگ
شايل بچفك وطن
مذبوح من كل كتر
وبثوبه ريحة حرگ
من چنت أبوسك قبل
خدك يوَرِد هوى
ومثل الگمر تعتلگ
والآن ياموطني
دم بلبل براحِتك :
يابس وريحة كتل
توصلني كلما تمر
نسمه إعله جثة
العشگ
هم شفت قبلك وطن
كتاله شعبه وزرَع
بثيابه مِيَة فتگ ؟
إحچي أريدْ أسْمَعَك
مايسوه باقي العمر
لوما تگول الصدگ
يلنعشَك إعله الچتف
شلته بعد ماشفت
گطعوك من العِرِگ
ألو..
ألو ..
ألو ..
وطني .. حبيبي .. عمري
الليله كاس الحزن
أرد أشربه بصحتك
مرت سنه من قهر
وسنين راحت تچي
وأنت على حالتك
دورت بين الصور
گلت ألگة بلكت ولو
شي باقي من ضحكتك
وفجأة:
إتفَجِرَتْ قنبله
مزروعه وسط الصور
والدم ترَسْ راحِتك
ودخان عالي إرتفع
ما گمت أمَيّز بعد
رجليك من هامِتك
كتلوك ياموطني
أهل الوجوه الصفر
واللي گرط ملحِتك
گابلني شيل النعش
أرد آني أدفنك وأرد
أحچيلهم قصِتك
لكن غريب الأمر:
إشلون أدفن ضوه
وياگاع تگدر تلم
ياموطني جثتك؟
الله يرجعكم بالسلامه ويرتاح هذا الوطن
تحياتي
منقول
ملاحظة: كل ما اعرفه عن كاتب القصيدة انه طالب في جامعة المستنصرية