الى هنا وبس قصة سعودية من كتاباتي

اولا السلام عليكم
هذي قصه سعودية من كتاباتي حبيت اقول لكم انتم اللي راح تقررون اكملها ولا لا
وثانيا لااسمح لاي شخص انه ينقل القصه بدون كتابات اسمي ونظرا لاني ساكتب القصه في عدة منتديات
اسمي هو< ليال >انا ماانزل كل يوم
راح احاول انزل كل اسبوع مرتين اوثلاث اذا قدرت

• *

ورااح اعرفكم باعضاء القصه
اولا عائلة ابو حامد
ابو حامد اسمه سعود
اكبر عياله حامد عمره 26 طبيب بيروح يكمل برا استشاره <حلو خلوق وطويل>اصغر منه عبد الرحمن عمره 23 يدرس هندسه اخر سنه
واللي بعده بنت اسمها عبير عمرها 20 سنه ثني سنه تدرس كيمياء<حلوة بس مغروره>

• *****************

عائلة ابو متعب
ولده الكبير متعب عمره 25 موظف في شركة العائلة معتمد على نفسه اسمر وحليو
اللي بعده سندس عمرها 23 مخلصة كليه فاضيه مخطوبه لولد عمها عبد المحسن <حلوة بس دبدوبه>واللي بعدها فراس عمره 22 يدرس محاسبه يحب الشغل <له وظيفه بشركة العايله >لانه شااطر حيل
يحب عبير بس مش معطيته وجه وراح تعرفون السالفه بالقصه مملوح بشكل
اللي بعده (اسرار واصايل) عمرهم 19 سنه يدرسون علمي < تؤام > متعاكسات بكل شي ماعادا الدراسه
مواصفات اسرار :رشيقه حلوه نعومه بس وجهها مليان عندها غميزات تاخذ العقل ضحكتها تاخذ العقل
بيضاء عيونه بنيه شعرها بني على عنابي طبيعي طويل يوصل لاخر ظهرها تكره المطبخ والطبخ دلوعه
متواضعه وتسمع كلام اهلها قنوعه طويله
مواصفات اصايل : رشيقه بعد وحلوه وبيضاء فيها غميزه وحده بخدها اليسار بيضاء بعد
شعرها اشقر طويل لحد نص فخوذها خلقه عيونها بنيه نفس اختها تموت على الطبخ عنيده وراسها يابس طولها عادي
اللي اصغر منهم لؤي عمره17 سنه بثاني ثانوي علمي ابيض وحلو على خواته هو القعده

• ***************

عائلة ابو عبد المحسن
عبد المحسن عمره 27 يشتغل بالشركه خاطب سندس مؤدب وحبوب
اخوه اللي اصغر منه ماهر عمره 23 يدرس هندسه كميايئيه حبوب ماله شغل باحد
وهم يتيمين الام
اهل ام متعب
ام خالد اختها
عندها بنت مغروره حيل اسمها هيام عمرها24 حلوه
عندها خالد عمره 23 يدرس طيران حلو بشكل
اخوه فيصل عمره 18 يدرس ثالث ثانوي
بعده اخوه تركي عمره 15 سنه
اختها ام خوله
رنيم عمرها 19 بعد حلوه وتعرفونها من خلال القصه وصديقه هيام
اروى عمرها 17 حبوبه تحب اسرار وصديقتها
لميس عمرها 16 سنه وتحب لؤي ويحبها
والباقي تعرفونهم من خلال القصه
بيت ابو متعب
اصايل: يبه حرام عليك هذا مستقبلي وانا المفروض اللي اقرر مو انت وعماني
ابو متعب: نعم وش قلتي وشو اللي حرام وعيب انك تتكلمي عن عمامك كذا
اصايل: انا اسفه يبه بس هذا مستقبلي
ابو متعب: ماعندنا بنات يدرسون طب هذا اللي كان ناقص وش يبقولون عنا الناس
اصايل: وش يبقولون اصلا هالشي المفروض يفرحك ان عندك بنت بترفع راسك
ابو متعب <رفعه صوته>:ان ماسكتي اللحين صدقيني بخليك تدخلين عربي ولا دين
اصايل<تبكي>:يبه حرام عليك <وعلا صوتها>حرام حرام اجيب هالنسبه وتدفنوني باقسام مالها مستقبل
ابو متعب:روحي لغرفتك يله
و دخل حامد الفيلا ووقف عند باب المجلس وسمع الحوار لما بدا يصرخ عمه
طلع بوجهه لؤي :وش عندك
حامد:انت ووجهك هذا استقبال تستقبل به ولد عمك
لؤي: اخلص وش عندك
حامد:كنت جاي اخذ متعب بنطلع تعرف مابقى شي على سفري كلها اسبوعين
لؤي<يبي يقهره>:مدام عندك اسبوعين وش عندك جاينا من اللحين
حامد:قاعد على قلبك روح ناد متعب
لؤي:متعب نايم
حامد <حب يستفسر>:وش عندك اللحين؟
لؤي :ماعندي شي ليه
حامد :بنطلع يله
لؤي:بروح اخبر الوالد وجاي
حامد: خلاص
راح لؤي لابوه :يبه بطلع مع حامد
ابو متعب :حامد هنا قلطه خل اسلم عليه
لؤي:هو بالمجلس
راحو لحامد
ابو متعب: هلابك ياحامد
حامد وهو يحب راس عمه :الله يسلمك وش اخبارك
ابو متعب: بخير
لؤي: يله يبه بنطلع مع السلامه
حامد :فمان الله
ابو متعب: فمان الله انتبهوا على ارواحكم
العيال: ان شاء الله
في سيارة حامد
حامد: وين تبي تروح
لؤي: كيفك نروح اي كوفي
دخلو كوفي راقي بدون ذكر اسماء
بعد ماطلبوا
حامد : لؤي بسالك سؤال بس لاتزعل
لؤي : اسال اللي تبي ماعندي شي ازعل عليه
حامد: انا لما دخلت سمعت وحدة تبكي وتقول حرام وكانت تكلم عمي منهي ووش سالفته
لؤي يضحك:هذا سؤالك
حامد في خاطره <وش فيه ذا انهبل>:ايه
لؤي:هذي الله يسلمك اصايل وزعلانه لان ابوي وعماني مو موافقين على دخلوها الطب
وتدري انها ودها تدخل طب وحنا ممنوع عندنا بنات يدخلون طب وهي معنده وراكبه راسه بعكس اسرار لما الوالد رفض
قالت :خلاص بدخل احياء اما اصايل معنده وماتبي اي قسم ثاني تقول حرام اجيب هالنسبه ودخل اقسام مالها مستقبل
حامد: كم جابت
لؤي :اصيل جابت 97 واسرار جابت 95
حامد :والله هالعائه متخلفين وش فيها اذا دخلت
لؤي :فيها قبايل وفيها قص رقاب عند هالشياب
خلصو وطلعو وراحو البيت
في بيت ابو متعب
اسرار: اصايل الله يهديك وش هالكلام انتي تدرين بعناد ابوي عماني ادخلي اي قسم برضاك
احسن مايدخلونك قسم ماتبينه
اصايل : اوه انتي الثانيه مادامهم مش موافقين خلاص بقعد بالبيت
اسرار: انتي اكيد انهبلتي وراحت لمس جبهت اختها
اصايل: يوه انقلعي هناك
اسرار <تفاجئت لان هذي اول مره تكلمها اصايل كذا>واصايل طلعت من الغرفه وراحت للحديقه وبهاللحظه كان لؤي رايح ينادي متعب
وحامد في السياره اللي كان مدخلها جوى الفيلا
حامد شاف اصايل ومنبهر بجمالها
واصايل ماكانت تدري وكانت تبكي حيل
حامد معقوله لهاالدرجه تبي تدخل طب ومااثره فيها السالفه
ماشاء الله تاخد العقل ياحظ اللي بياخذها
وانتبه على روحه وش جاب طاري الزواج
فكره ليه مااخطبها
وطلع هو متعب ورجعو وكل واحد راح بيته
اليوم الثاني
بيت ابو حامد
حامد :يبه انا نويت اكمل نص ديني
ام حامد:هذي الساعه المباركه اخيرا بتحقق حلمي
ابو حامد :الله يوفقك بس فيه وحدة معينه ببالك ولا اخلي امك تدور لك وحده من بنات عمك
حامد :لايبه انا ابي اصايل
ابو حامد :هذي الساعه المباركه واصايل والنعم فيها ولو ماكنت محدد وحده كان خليتك تاخذها
حامد :زين اشوى متى بنخطبها
ام حامد:الله يهديك وانا امك ليه مستعجل
حامد :انا بسافر بعد اسبوعين وابييها على الاقل تكون لي
ولما ارجع بعد شهرين نتزوج
ابو حامد :خلاص اليوم نروح نخطبها رسمي
حامد :خلاص اجل
الساعه 5 العصر في بيت ابو متعب
ابو حامد :والله ياخلف <ابو متعب> حنا اليوم جايين نخطب اصايل لحامد
ابو متعب: هذي الساعه المباركه والله يوفقهم وحنا مرح نلقى احسن من حامد لاصايل
ابو حامد: خلاص شاروها ورد لنا خبر
ابو متعب: وش اشاورها انت تدري ماعندنا بنات لهم راي بس بشوف امها
حامد في خاطره <وش هالعقليات المتخلفه>متعب <يساسر حامد>:والله انك خاين امس انا معك ليه ماجبت لي طاري
حامد :ههه خاين مره وحده بس ماتوقعت الموضوع يصير بهالسرعه
ابو حامد :خلاص رد علينا بكره
بعد ماطلعو
ابو متعب :ام متعب اليوم ترى اصايل خطبها حامد
ام متعب: والله والنعم
ابو متعب : روحي علمي بنتك واقنعيها توافق لانها اذا ماوافقت راح تاخذه غصب
ام متعب: ابشر
راحت لبنتها
ام متعب :اصايل انتي اللحين كبرتي وصرتي حرمه واليوم انخطبتي لحامد ولد عمك
اصايل : نعم وشو اللي انخطبت انا بعدي صغيره
ام متعب :وش صغيره انتي عمرك 19 سنه ووافقي يمه لان ابوك ان ماوافقتي بيزوجك غصب
اصايل :بضحكه ساخره يعني مالي راي خلاص سوو اللي تسوونه
ام متعب :يمه الله يووقفك ويهديك وينور دربك وباست بنتها على راسها وطلعت
اصايل قعدت تبكي ودخلت عليها تؤامها اسرار
اسرار: اصايل عيوني وش فيك
اصيل راحت لاختها وضمتها وقعدت تبكي وهي حاطه راسه على كتف اختها وفرغت اللي فيها
ولما هدت
اسرار: وش السالفه
اصايل: حامد
اسرار : وش فيه حامد
اصايل :اليوم خطبني
اسرار :هالمفروض هالشي يفرحك واذا ماتبين ارفضيه
اصايل بدت تبكي: هنا المشكله
اسرار: وش مشكلته اذا مو موافقه محد يقدر يجبرك
اصايل :الا ابوي بيغصبني
اسرار: اللحين هدي وقومي صلي لك ركعتين ونامي ويصير خير

• ****************

نهايه الفصل الاول من الجزء الاول