ام زوجي واللي سوته فيني

بسم الله الرحمن الرحيم
مادري كيف ابدا او وش اقول (( اعذروني ماعرف اكتب بالفصحى
اول مره احكي او اكتب عن شي داخل صدري وخصوصا شي يربطني مع زوجي
انا متزوجه ولي 16 سنه المهم باكتب لكم باختصار وابي الحل للي عندها حل لحالتي
لا اله الا انت سبحانك اني كنت من الظالمين
زوجي يقرب المهم الاسبوع اللي فات قررو اهلي يزوروني لان امي تعبانه وسمعت عن دكتور زين هنا وجوني
امي وابوي المهم اول مره يجون ويقررون ينامون عندي مع ان عمتي اخت ابوي كانت هنا
بس فضل ابوي انه يجلس عندي خصوصا بعد ماسكنت عند اهله انا في دور وهم في دور
المهم جوني يوم الاربعا استقبلهم زوجي في المطار ورحب فيهم وجوني الفرحه ماكانت سايعتني
المهم جا زوجي يروح يجيب العشا وهو طالع قالي ترا امي فوق في بيتها واحنا ماندري انها هنا
قال لي الكلمتين هذي بس لانها كانت عند بنتها
قمت انا رفعت السماعه عليها وقلت شخبارك مادريت انك هنا ومن هالكلام
المهم صكرت السماعه قالت امي يؤ ماناديتيها للعشا امي على نياتها
المهم رجعت اتصلت قلت لها اقول ياخاله تعالي تعشي معنا اذا انك باقي ماتعشيتي
قالت لا انا تعشيت وانا تعبانه وبنام وسلمي على امك ومن هالكلام قلت طيب براحتك بس كان ودي انك تجين للعشا المهم صكرت
جا زوجي بالعشا قلت تراني ناديت امك وقالت تعبانه
قال باطلع اشوفها لين تحضرين العشا
المهم تعشينا وانبسطنا وكل شي
طبعا ماجت هي اليوم الثاني قالو بنطلع نتمشى انا وامي وابوي وولدي قال زوجي انا بالحقكم بعدين عشان اخوي الكبير بيجي
كنا بنبات هناك انا مع اهلي وولدي للمعلوميه التمشيه هذي كنا بنروح لعين حاره عشان رجول امي يقولون زينه المويه الحاره لها
المهم رحنا وانبسطنا وكل شي يوم انه جا اخر الليل والا ارسل رساله لزوجي اقوله انا مشتاقه لك وكان ودي انك تجي وابي اقوله تصبح على خير
المهم رد علي برد جارح وكلام مو عوايده وتهزئ غير طبيعي طبعا كلها بالرسايل
احاول اكلمه ويقفل بوجهي
المهم قلقلت وبكيت يالله انه رد علي الجوال وقال امي مو كلبه تكلمينها وتقولين لها تعشيتي والا ماتعشيتي
وتصكرين في الخط في وجهها المهم انهبلت انا قلت مو صدق هالكلام
رد قال يعني امي كذابه وزودها وهاتك صراخ
سكتت ماقلت ولا عقبت غير اني قلت حسبي الله ونعم الوكيل
المهم ماقلت لاهلي شي رجعنا للبيت مع اهلي مالقيناه وتعشينا حسيت بضيقه في وجه ابوي بس ماقال شي
علمت امي بكل شي وطبعا قالت لابوي تضايق ابوي قال طيب انتي كلمتيها واحنا قاعدين
ماغلطتي المهم <<<طولتها
ماعاد رجع للبيت الا بعد ماسافرو اهلي تخيلو موقفي ساعتها كان ودي الارض تنشق وتبلعني
المهم الى الان لنا اسبوع واكثر وزوجي مطنشني ولا كاني موجوده ولا يكلمني ولا اكلمه
وانا الصدق شايله عليه مره
يعني انا مرت علي مواقف اكثر من كذا بس الحمدلله تعدي وماكان لاهلي علاقه فيها
بس عاد الموضوع يوصل لاهلي ولحد هنا وخلاص وربي اني كرهته بالرغم ان اهلي ماعمرهم قصرو معاه مكرمينه ومحترمينه
وفوق هذا الاحساس بالظلم صعب جدا
يعني امه معليش بس انا وش ذنبي ان امه ظلمتني وكذبت علي عنده
مادري وش اسوي وكيف اتصرف ولا ودي ابدى معاه نهائيا لين يجي يعتذر ويعتذر لاهلي قبل كل شي
والا وش رايكم يابنات عطوني حلول تكفون وش الحل لاني فعلا بديت افكر بالطلاق لان الي مايحترم اهل زوجته يعني انها مالها قيمه عنده
مع العلم انا لما كنا ساكنين بعيد عن اهله كانو اهلي يجون كلهم عندي ويقعدون شهر واقل او اكثر ولا يتضايق منهم ابد
بنات ادري اني طولتها عليكم بس فيني ضيقه مايعلم فيها الا فاطر السموات والارض
وربي لو مو ولدي كان ماعاد شاف وجهي وكان سافرت معهم من ذاك اليوم
لكن من اجل عين تكرم مدينه