انظلمت وتطلقت وبفضل الله ثم نصيحه من شيخ غيرت حياتي

1. اسأل الله العلي العضيم ان يجب ع قلوبكم واكون قد قدمت نصيحه لوجه الله


2. احمد ربي واشكره ع صدفة لقاي بالشريط هذا لانه سبب لنقله قويه بحياتي

شيً جرى لي ما مر بالناس لا ومن يقدر لونصفه يحملونه
منٌت علي دنياي احساس عراس يوم الغريب اللي هانو يبعونه
باعوني بيعة مهدد الافلاس او كما مظلوم نادو يعدمونه
ذقت العذاب مع عديم الاحساس او جاهلآ عجزو هله يربونه
لاباس ياخاطري ماجاك لاباس هذا قدر ربي وهذا اللي يبونه
(( من كتاباتي))
بعد السلام حبيباتي وخواتي المطلقات ثم الأرامل

اسأل الله العلي العضيم ان يجب ع قلوبكم واكون قد قدمت نصيحه لوجه الله

بنات انا انظلمت كثير كثير بالبدايه اهلي زوجوني واحد عشان غلطه تافهه ايام الصبا وكان حلها سهل لكن اهلي شداد مره طلعوني من المدرسه وقطعو حبل تفوقي
المهم انهم استعجلو ع زواجي وتزوجت واحد مطلق وعنده ولد عمره 4 سنوات وقلت بكون ام الثانيه لكن ليت القصه انتهت ع كذا اكتشفت انه مريض نفسي وانفصال بالشخصيه ...قلت بصبر وبكون الحرمه المناسبه وعون لكن المسكين طلع معه انفصال بالشخصيه وعانيت يعني الشخص اللي يحبه لاجات الحاله يتعادى لي ويفكر بقتلي
وياما طردني بالليل بدون عبايه ياما حبسني بمجلس ايام وربي الله يكرمكم عريانه ..ياما وياما وياما ..
الله ياربي يشفيه ... وربي كان مره طيب بس المرض ماخلاه
اخر تطورات فيه خذاني ع طريق بسافر لاهلي والله يابنات انه طول الطريق يبقي يصدم وماقدر راح قال بنزل بقاله وخلى الخط بالوسط يعني يبي يرةح البقاله مشي
بعدها صار حادث والحمدلله ماصابني شي>>>طولتها
اهلي عرفو وياكثر الاشياء اللي هم ماعرفوها وقالو لازم خلع وخافو وفعلآ تم الخلع..
ضليت حزينه لابعد حد ... ولده>>> كان وربي ولدي وحبيبي وانا كنت له كل شي يعني بيضيع فديته وياما بكيت عشانه اللي نهايته حرقه لانه بكى وقال ابي ماما<< اللي هي انا
صرت حزينه وكلام الناس حتى اذا ماتكلمو وربي احس بنظرة عيونهم اني مطلقه واهلي شداد كل شي لا
ندمت اني تطلقت وهو بعد كان يترجاني ارجعي وبعالج لكن لاحياة لمن تنادي لا راضي يعالج وابوي رافض نهائي ارجع له
انتهت العده وتسكرت كل الابواب وحزنت وبكيت وعانيت لا وظيفه ولا دراسه ولا شي ولاحتى ولده اللي كان روحي وعيوني
والليل يمر علي مثل العبايه كله دموع حزن ... نحفت وصار حبوب بوجهي ...اخواني اسلوبهم لاتروحين ولا تجين وبالعكس زادو بعد طلاقي من يوم كنت بنت ...كنت شاره وبمستوى مرموق وكنت ع حبل الشهره الاعلاميه بعد طلاقي حرموني حتى الكتابه وقالو حرام ولا فيه حتى اي شي يسليني
اما الناس اه بس
كنت وين ما اروح يسألوني عن طلاقي كيف وليش وش السبب ...؟؟!من جد حاله عذاب وماكن برحلتي غير الدموع والابتسامه الوهميه اللي وراها الف قصه وقصه
امي حرمه كبيره وسوالفها كنت اشوف انها تزيديني ماتنقص (( قومي صلي لربك وادعي ربي يرزقك بالرجال الصالح>> يعني حتى لو نسيت بتفكرني
خواتي مشالله عددهم كثير وانا كنت اللي قبل الاخيره .. لما يجون خواتي بيتنا ويطلعون اموت واقول يابختهم >> مو حسد لكن كسرة خاطر لاني كنت بيوم مثلهم
ندمت اني تطلقت ندمت كثير مع ان الحاله اللي كنت فيها ما تنتحمل ابد وهذا غير المصروف والعذاب معه
وفي يوم مدري كيف وصلت لشريط لشيخ خالد الجبير ...وربي مو فاكره اسمه (( قلبي او امراض القلوب)) مو فاكره

احمد ربي واشكره ع صدفة لقاي بالشريط هذا لانه سبب لنقله قويه بحياتي

كان فيه يتكلم عن فضل سورة البقره وفضل قيام الليل فيها وقرائتها جلست جلسه صريحه مع نفسي وقلت وش عندي ماقراها يمكن يروح مني الوساويس وانقلعي يابنت سويها واتركي عنك الكسل وفعلآ قريتها اول اسبوع شفت انها طويله لكن ثاني اسبوع وربي صرت انتظر الليل متى يجي عشان اقراها واحس بمتعه وواصلت
وربي وربي وربي يابنات خلال اقل من شهرين تقدم لي شخص عمري ماحلمت فيه ولا فكرت يوم اني اتزوجه وخاصه انه من قبيله بعيده عني وطبعآ ابوي رفض لكن كنت اقول وادعي الله يسخرها لي بعد ماكنت كارهه كل الرجال ::سبحان الله خلال اسبوعن وافق ابوي وملكت وكانت اسعد شي بحياتي كنت اشوف اشياء تغيرت كثيره مو بس ع زواجي ..نفسيتي واسلوبي وتفكيري والناس وربي اشياء غريبه
الحمدلله وربي اقول ما تزوجت الا لاني نويت النيه الصادقه لله وقرأت البقره بنيه رجوى منه ان ينظر بحالي والشريط اثر فيني كثير وخلاني اعزم بنفسي
والان الحمدلله عندي طفلتين لكن سبحان من كمل وجهه والحو مايكمل ..زوجي معي رائع وسعيده وربي يسعدكم مثلي واحسن مني يارب .. لكن ادعو لي انه يصد عنا من يحاول تفريقنا ويكيد لي وربي بنات بحاجه لدعائكم وراح قرريب اجلس جلستي الصادقه انا وربي ثم سورة البقره وبدعي على من يحاول صد زوجي عني ويجعل كيده بنحره وواثقه ان ربي مايردني لانه قال .. يجيب المضطر اذا دعاه>> وينكم حبيباتي عن الايه هذي سواء كنتي ارمله ادعي ربي ينظر بحالك ويسعدك ويسيك او مطلقه ادعي ربنا يسمع ويجاب والحمدلله انه خلقنا مسلمين لو غير كذا كان وربي تاييهن
اسفه اسفه اسفه طولتها عليكم لكن اتمنى اني افدتكم بشي وحاضر لأي استفسار سوء بحياتي السابقه او الحاليه او اي شي عن القصه او كل شي يخطر ببالكم من عيوني وربي مايردكم الا صبعكم
ياحبني لكم من جد
تحياتي واه تعبت