بليز ادخلو وشوفوا موضوعي عن ادخلوا تعرفوا

بسم الله الرحمن الرحيم
طبعا ف البداية لازم ... السلام عليكم ورحمة الله
كيفكم يافراشاتي الحلوات ان شاء الله كلو تمام ؟؟
انا اليوم حابة اتكلم عن مديرة مدرسة
الثانوية الاربع والعشرون اللي ف الازهري ..اللي قدام بيتي الله يسعدو
المهم اسم مديرتي (( -------)) وان شاء الله ما تزعل اني قلت اسمها ..
هده الانسانه شي مايوصف والله يا ناس مره عسل وطيبه وكل شي
وبصراحه انا مره احبها يسعدها ربي ... وهيا ماشا الله عليها تحب الخير وتبغا الخير للبنات وتبغا مصلحة البنات في كل شي بس في مشكله صغنونه ف مدارسنا دي الايام وف البنات وخصوصا دي المرحله
انو الكل يبغا يمشي ع كيفو وبراحتو حتى لو كان غلط .... والشي دا مره مو حلو
انا للاسف كنت من هدول البنات
طبعا مديره المدرسه القديمه اتقاعدت ... فعبال ما تجي مديرة تانيه جلست المدرسه بدون مديرة
وابو الفله والحماس مافي مديره
تعالو شوفوا اختكم بيشا الله يهديها انواع الخوبال والجونان
وبس بعد فترة من الجونان دا
سمعنا خبر ... جات مديرة جديده
اف فينها ما شفناها ايش لابسه ؟؟ كيف شكلها ؟؟
عصبية طيبة ؟؟؟
ومن دا الكلام ؟؟؟
شفنا المديرة
طبعا انا ف البداية ما كنت احبها لانها جات شديده شويه
وطبعا من غبائي نسيت انو لازم تكون شديده طبيعة عملها
ومن البلاوي اللي في البنات
كنت اكرهها ... ما احبها ...لاني ما فكرت في يوم انها تبغا مصلحتنا
صرنا نتكلم عنها وطبعا الكلام عن المدرسات شي منتشر بين البنات
هوا شي غلط بس الله يهدي الجميع
في يوم من الايام كنت زعلانه واتضاربت مع صحباتي
نفسي اتكلم لاني مره كنت تعبانه
مالقيت قدامي غير المديرة
رحت وانا كنت متوقعه انها ماراح تعطيني وجه وارجع خايبه امل
بس يالله طلع العكس ...
ياقلبي عليها تنصحني وتكلمني و......الخ
انا نهائيا ما كنت متوقعه دا الشي
لانو كان حكمي ع المديرة حقتنا وع كل مديرات المدارس انهم
مره صعبين التعامل ..
وللاسف طلعت غلطانه
وقتها بكيت حسيت قد ايش احنا نظلم الناس واحنا مره موحاسين
الين متى راح نقعد نظلم اللي حولنا ونحكم عليهم من برا
من غير ما نعرفهم اكتر من جوا ؟؟
قررت اغير طريقه حياتي
واللي ساعدني مديرتي
والله والله لو هده الانسانه ما نورت حياتي وما خلتني اشوف الدنيا بالوان حلو ما كان كتبت الموضوع دا ....
من جد ابله---- انسانه في غاية الروعه
والطيبه
والاخلاق
والاحترام
والذوق
انا اتمنى من كل بنات المدارس انهم يعرفو الشخص اللي قدامهم اكتر قبل اي شي
عشان ما نغلط في حقو ونندم
زي ما انا ندمت دحين
لا تحسبو انو المديرة او المسؤوله مهي طيبه
او فيها كدا وكدا ...
يا بنات لسا الدنيا بخير
حلو لما نكون احنا الطالبات مع المديرة يد وحده
ونخلي المدرسه حلوة
وسمعتها حلوة
والله مره حماس
يلا اعملوا زيي
اول شي فلوها وانبسطوا وبعدين
اعرفوا قدر مديرتكم
المهم من دا كلو انا اقدم خالص الشكر والتقدير للاستاذه -----ع الجهود اللي بذلتها لرقي الثانويه الرابعه والعشرون بالمدينه
وجزاها الله عنا خير الجزاء
اتمنى من الكل الرد ع الموضوع
واللي تعرف المديرة مافي مشكله تقولها ع الموضوع عشان تصير حركات ووناسه
يلا حبايبي انا طولت عليكم ... زياده عن اللزوم
بس ايش اسوي احبكم