بنات أبي رايكم بتزوج عن طريق موقع زواج

1. وخاصة انا الحين عمري مناسب للزواج مو حلوة الناس تاخذ هالفكرة عني


2. وبعد انا اتحمل جزء من الغلط مو أمي بس

السلام عليكم
انا ابي اعرف راي البنات
هل احد جرب او سمع عن احد تزوج من خلال مواقع الانترنت ؟؟
انا مفكرة اجرب هالموضوع بس خايفه
اخاف اعطي احد رقم اهلي ويقوم يفضحني ومايكون جاد واخاف اعطي اي احد ايميلي
انا عندي عدم ثقه وبنفس الوقت احس في شباب جادين ويبون يتزوجون بالنت
طبعا من مواقع الزواج المعروفة
السبب اللي خلاني الجأ لهالطريقة سببين
1- انا ماعندي اي احتكاك بالناس لا احنا ولا اهلنا بحكم تنقلنا من بلد لثاني وجماعتنا مو كثير ومايعرفون اصلا ان فيه بنات بعمر زواج موجودين ( انا وخواتي )
وقلة طلعاتنا للناس والزواجات والمناسبات مانحضرها ابد .. من صغرنا حتى الحريم اللي يجون عند امي ماكنا نطلع لهم
( مع اني الحمدلله مو ناقضني شي اللهم لك الحمد .. جمال موجود بشهادة من يشوفني + علم الحمدلله عندي اعلى الشهادات + مال الحمدلله موظفة براتب خيالي + دين والتزام الحمدلله .. لا عمري كلمت شباب ولا عمري لبست شي فاتن ولا اطلع الاسواق ولا اتكلم بالجوال الله يديم علينا + أصل والحمدلله اصلنا عريق ومشهود لنا بطيب الاصل )
2- السبب الثاني اكتشفت بطريق غير مباشر ان ( أمي الله يحفظها لي ويبارك في عمرها ويطول عمرها ) نوعاً ما ماتبيني اتزوج
ولاحظت اي احد يجيب طاري اسمي او يسأل عني أو اي احد جديد نعرفه او زار امي بدون سبب تروح تقول لهم ( فلانه بنتي مريضة - مرض عضوي بالقلب ) انا يوم كنت طفلة كان عندي ثقب في القلب والحمدلله راح الثقب وصحتي الحين زينه ولا فيني شي وسليمة حتى الدكاترة قالوا لي عادي تقدرين تحملين وتولدين لان قلبك سليم ومافيه شي الحين .. بس امي مو راضية تقتنع احسها لين الحين تشوفني مريضة .. مع ان موضوع مرض قلبي ما اكتشفناه الا صدفة لانه مو مأثر علي الحمدلله ولا خذيت علاج ولا عندي مراجعات ولا عندي ملف اصلا في اي عيادة قلب الحمدلله
بس أمي ما خلت أحد ما قالت له اني مريضة ( طبعا ما اقدر اقول لها يمه لا تقولين هالكلام )
حتى مرة واحد من جماعتنا من بعيد سأل امي فلانه تقدر تعرس ( لانها مفهمه كل الناس اني مريضة ) قالت امي لا فلانه ما تبي العرس وما راح ازوجها بتقعد معي طول عمرها !! اما اللي اصغر منها ايه بزوجهم
هالكلمة كأنها طعنه في قلبي ( كان ودي اقول لها يمه ابي افرح مثل كل البنات مستحيل بنت ماتفكر تصير عروس بيوم من الايام )

وخاصة انا الحين عمري مناسب للزواج مو حلوة الناس تاخذ هالفكرة عني

وبعد انا اتحمل جزء من الغلط مو أمي بس

انا دائما مفهمه امي اني ما ابي الزواج وانتقد الزواج قدامها واقول لها ( الزواج كله مشاكل وعوار راس حلاتها البنت ماتعرس ومن هالكلام .. يعني عمري ما فهمتها اني خاطري اتزوج .. لاني استحي منها جداً وعيب البنت اصلا تبين انها تبي تتزوج او تفكر فيه )
وما أدري شلون احسسها بدون حرج اني مع الزواج وابي الزواج حتى اخوي صرت احسه مفكر اني ضد الزواج
معناها ما في أمل احد يتقدم لي لان أمي مسكرة الطريق .. دائما تقول فلانه ( اللي هي انا ) ما راح تتزوج وبتكمل دراستها وتصير دكتورة وش تبي في الزواج ما منه فايده لا الزواج ولا العيال
ودام مافيه أمل اتزوج قلت ما لي الا مواقع الزواج .... لان عن طريق الاهل مستحيل احد يتقدم لوحده مريضة !!!! ( رغم اني مافيني شي :( ) وانا استحي اقول لها واستحي اكلم اي احد ( فيني خجل مو طبيعي )
ابي شوركم ورايكم في حالتي وهل تفكيري صح ؟؟ ولا انسى السالفة واقعد عانس جنب أمي مثل ما تبي ؟؟ واسكت وابلع حسرتي