بنات جهاز جديد يساعدك على الرشاقة وتلعبي عليه وانتي مستانسة

السلام عليكم ورحمة الله وبركاته
اتمنى ان كل البنات اللي يتمنون ينحفوا ان الله يساعدهم ويوقف معاهم واولهم انا
كلنا نبي نلعب رياضه ..بعضنا يسجّل بنوادي ومع الوقت يملّ ويطفش من الطلعه والدخلة
وبعضنا يمارس رياضه مع شريط تعليمي او لوحدة لكن مع الوقت يملّ كمان ويزهق ..وبعضنا يطلع يمشي طريق الملك عبد الله ..بس السيارات والدخان اللي يطلع من عوادم السيارات يؤذي الرئتين وخاصة انك تحتاجين كمية اكسجين وهواء ومن جد يابنات مرّة مو صحي المشي بجانب السيارات
شفتي مرّة امريكي يمشي بطريق عبدالله ؟؟ مافي الا احنا
المهم نجي للزبدة ..
بنات انا ماأسوي دعايه ولا اتاجر بأجهزه ..وهذا الجهاز تلاقونه عند محلات الالعاب الالكترونية يعني مو من عند اي تاجرة ..انا عني شريته من الفيصليه من محل يبيع العاب البلاي شتيشن
نرجع للجهاز ...الجهاز اسمه ( ويي فتنس ....Wii fitnis )..تسوين لك شخصية باللعبة وتكتبين اسمك وراح تلاحظين اذا انتي مشيتي اللعبة تمشي زيك وكل حركة تسوينها الشخصية تسوي زيك
وفي العاب كثيرة مشوقة تخليك تنسجمين وانتي تلعبين وفي رياضات ايروبك ويوقا وتوازن وملاكمة ويقدروا كل افراد الاسرة يشتركوا ويسجلوا وكل واحد له رقمه السرّي علشان توزنين نفسك براحه لان الجهاز ياخذ وزنك وكتلة الدهون ويعلمك كم الزيادة عندك ويسوي لك رسم بياني بوزنك اذا نقص او زاد ..
هنا رابط يوريك شكل الكرتون
Fitness Game for Nintendo Wii - Wii Fit Plus
وهنا رابط يوتيوب يشرح لك الالعاب الموجودة
YouTube - ‪Wii Fit Plus Review‬‏
واللي عندها بنوتات دبدوبات وماهي عارفة كيف تخليهم ينحفون ويلعبون رياضه بدون مايحسون تجيبلهم هذا
الجهاز وراح تدعيلي ..لاني ام وعندي بنوتتين الله يحفظهم ومن يوم ماجبته لهم وهم مايجلسون على
التلفزيون ابدا وتركوا براعم mbc3 ودايم يلعبون ونحفوا قلبي عليهم ..وعلشان احمّسهم اكثر اشتريت يد
ثانية زيادة وصاروا يتبارون ويتسابقون ( الجهاز قيمته 500 ريال وطبعا لازم يكون عندك جهاز اساسي يشغله
اعتقد قيمته 900 ريال زي البلاي شتيشن يشخل الالعاب )
واخيرا اتمنى لكم الرشاقة واللياقة