تبين تتزوجين عليك برضاء الله ثم رضاء الوالدين

السلام عليكم ورحمة الله وبركاته
رمضان كريم عالكل ان شاء الله وينعاد عليكم بكل ماتتمنون من رغبات وصحة وعافيه يارب
خواتي انا اشوف كثير من البنات صاير همهم بس انهم يتزوجون عشان (يتخلصون من اهلهم )!!
انا ماقلت بالزواج شي ..ولا اقول ان الوحده ترغب بالحلال عيب ...لا ...أبدا
لكن انا اتكلم عن البنات اللي يبون الزواج ولا لهم هدف من وراه الا التخلص من امهم او ابوهم او اخوانهم وخواتهم ..او العيله كلها
طيب اسمعوني للآخر وبعدها احكموا اذا كلامي صح او غلط ..واذا انا حاسه فيكم او لا
انا بنت حالي حالكم ومريت بظروف والله العظيم اني اقرا اكثركم كاتب عنها ..لكني ماشتكيت
اولا:: حطي ببالك هالشي زين (الرجال اللي يبي يتزوجك ..يبي يشوف نظرة الإحترام لأهلك بعيونك وحبك لهم ودفاعك عنهم وافتخاركم بهم وبوجودهم بحياتك
صدقيني // الرجال اللي بيسمعك تتكلمين عن اهلك بشكوى مستمرة وبقرف ..وتتكلمين عنهم قد ايش ظلموك ولا ربوك وسووا وفعلوا ..بيتحملك مرة .. وبيتعاطف معاك 10 لكن مردك بتطيحين من عينه
عشان كذا لازم تشيلين من بالك تماماً انك تبين تتخلصين من اهلك
بالعكس //انتِ لازم لازم تحسنين علاقتك فيهم وتحبينهم وتفتخرين فيهم قبل لاتتزوجين ..عشان تصير حياتك بعد الزواج موفقه وسعيده << هذي احد الأسباب اللي تخلي زواجك سعيد
اكسبي بر أمك (والدتك) صدقيني مهما بتقولين عنها وبتعذربين فيها مردك بتتزوجين وبتحملين وبتعرفين قدرها وغلاتها
لا تجادلينها (الا اذا كنتي قادرة انك تجادلينها بدون لا تغضبينها وتوصلون لحل وسط يرضي الطرفين ) والا ترى برها اولى من رغباتك
قولي لها ان شاء الله على كل شي لا يغضب الله وحاولي انك تقربين منها وتبتسمين بوجهها
حتى لا قامت تبي تسوي شي خليها تجلسوقومي سويه عنها واحتسبي الأجر عند الله
انتِ اللي قربي لها وطيعيها ..ولا تدققين على كل كلمة او تصرف يصدر منها تراها امك
كوني اقرب صديقه لها ..اجلسي معها حتى لو في بينكم شي لا تبعدين عنها
ارضيها بشتى الطرق ..ودايم اسأليها اذا كانت راضيه عنك او لا ؟
ريحيها ..واطلبي منها تدعيلك ..وابوك نفس الشي
واهلك اللي بالبيت كلهم
خلي علاقتك مع اخوانك على قد ماتقدرين من اروع مايكون ..صحيح ماراح تقدرين ترضين الكل ..بس بنفس الوقت لا تقطعين العلاقه نهائيا ولا تحملين احقاد بقلبك
خلي علاقتك معهم اذا ماقدرتي تكونين معهم قريبه مرة ..خليها وسط ..وخير الأمور الوسط
وخليك متذكرة دايم ان كل شي تسويته لوجه الله (احتسبي الأجر من الله حتى على اقل القليل)
والله انا شفت بنات خالاتي بنفسي كانو يطيعون امهاتهم طاعه عمياء حتى على حساب انفسهم وربي وفقهم احسن توفيق بدراسه بالكليه وازواج صالحين (ماشاء الله الله يتمم عليهم ولا يحرمنا يارب)
وعقب ماتزوجوا صاروا كأنهم مع امهاتهم خوات ..ولا يعطون سرهم الا لأمهاتهم
انا كنت غافله عن هالشي ..لكني انتبهت له بالفترة الأخيرة وجالسه احاول اطبقه على قد ما اقدر
بس والله ما اقدر اوصف لكم شعوري
اذا زعلت مني امي بيوم الحين ...احس تضيق الدنيا فيني وعلى طول احاول اراضيها وانا اللي اقرب منها وانا اللي اطلب دعواتها ..واحس ان ربي راضي عني ..واحس ان الفرج قريب