تسافرين معها بعد كل هذا ولا لا قولي الصراحة

يقال ان السفر يبين معدن الناس
هل معدنهم رخيص ولا غالي
وما اخفي عليكم اني بعد ما سافرت معها تغيرت نظرتي لها تماما
صحيح انها ورتني الويل ايام ملكتي بتحكمها
بكل شيء بالزواج
مع انه على اهلي
بس قلت لانها ما تعرفني
ولما تعرفني بتحكم
لكن انها تسافر معي بشهر العسل
حماتي...
فعلا سافرت ام زوجي معي في شهر العسل
للمعلومية شهر العسل هذا كان كناية عن 8 ايام في دبي و صلالة...
بس بسبب ظروف عمل زوجي تاخر شهر العسل هذا الى 7 شهور بعد زواجي
وكنت حامل بالخامس....
طبعا صدمتي الاولى كانت فيها وهي تركب معنا عشان وهي لسه جاية من سفره في ماليزيا
مالها كم يوم ولان مادياتنا محدودة رحنا بسيارة لكنها ما تهاونت....
طبعا اختكم بالله كانت نص المصاريف عليها بحكم اننا اول سنة زواج ....
الى هذيك اليوم وانا ما اعرفها
المهم الطريق بطوله كانت ماخذه الجو نسولف تقول قلبتوا راسي بنام شغلوا الرادوا
اقول لزوجي ابي كذا تقول ما يحتاج وشوله بعدين...
طبعا واضح ان زوجي يحترم امه ويحبها حب شديد ولا يقدر يقول لها لا....
وانا ما عندي مشكلة لان اللي مافيه خير لاهله
مافيه خير للناس
وانا ما ابين له انها مضايقتني عشان ما يتضايق مني انا ويستغل الموقف ضدي..
لما وصلنا تخيلوا رفضت اننا ناخذ لنا شقة وقالت غرفة وحمام افضل
لا بس ولا لكن خلاص ليه مصاريف....
المشكلة ان مصاريف السكن علي يعني وش قاهرها...
تخيلوا نامت معنا في الغرفة
ما استحت ولا شيء
طبعا سهرت انا الى الصبح وقلت بنفسي يا بنت الحلال
اول يوم وتعبانين خط وتعب مشوار وطريق معليش اعديها وبكرا يمدي نحل الموضوع
لما جا من بكرا كلمت زوجي تخيلوا قاعدة على قلوبنا ماتبينا نقرب من بعض
واذا سولفنا قطعت السالفة وقامت تسولف عن مشاكل الناس وكلها تجيب الهم
طلعنا السوق تخيلوا صرفت زوجي
رح المحل الفلاني (جب لي لبن العصفور)
ما تبيه يشتري لي شيء
قلت مابدهاش اشتري انا لنفسي
تخيلوا توقف وراي وتطالع كم ابدفع وكاش ولا ببطاقات واذا طلعنا من المحل
ليش اخذتيه بايخ مو حلو خساره عليه الفلوس يله بس ننزل انتي تضيعين الوقت
وبعدين فيه سوق بالرياض
دخلنا لمطعم انا وزوجي....
وكنت قايلة لزوجي عن مطعم مرة حلو هناك
حلفت يمين ما تنزل معنا......
حسيت اني حاقدة عليها... تقول روحوا وانا ابنام بالسيارة
واخيرا لما هون زوجي قالت روحوا مطاعم فاست فود ارخص
اخر شيء واحنا في جميرا قلت لزوجي تكفى ابغى انزل البحر هناك
وتحط رجلها ربك واحد ماانزل عباتي مغسلتها
قلت لزوجي بكيفها انا بنزل لحالي انتم اجلسوا الين اجي
حسيت ان الدنيا بتك على صدري من حركاتها
رابع يوم طلعنا لصلالة وتخيلوا كلمت زوجي وزعلت عليه لما قال ابخذ شقة بغرفتين
ليه وش المشكلة نصير سوا انا ما علي منكم....
وسوتها
وزي ما تقول يمشي لانها حلفت
لا مافي سيارة ايجار نروح بتكسي
كل هذا عشان تقيد حركتنا
انا اقول الشمس شرق
هي تقول غرب
صرت ادخل الحمام واكلم خواتي واصيح من القهر
الصدمة لما اكتشفت ان خواتها وعيالهم معانا في صلالة
طلعت مواعدتهم وتخيلوا لزمت على زوجي يستاجر سيارة ويركبهن وعيالهن معنا
واخر شيء قبل ما نمشي ونرجع السعودية بسمع اذني انا وزوجي
تدعي علي بالموت
لما كنت انا وهو في البلكونة نسولف مندسين قلت له انا اتوحم على اسكريم فراولة.....
وش سويت.. حتى حرف ما قلت..
تخيلوا عيني بعينه وكل اللي قدر يسويه انه يتنفس بعمق ووجهه منقلب اسود...
جلست اصيح طول الطريق الين وصلت الرياض
بعد ما رجعت من هذي الرحلة حرمت اخاوي احد الا امي
السالفة هذي لها حوالي سنة
الحين زوجي له شهر قالب راسي نبي نسافر و اباخذ امي معنا
وانا رافضة فكرة السفر وتخيلوا له اسبوع ما يكلمني عشان السالفة
انا ما ودي اتكلم عشان ما ازعله ولا ازعل غيره
بس يخليني بحالي في بيتي
عني ما سافرت.....
بس هي لا والله ما اخاويها لو ايش ما كان...