تعبت من دلوع ماما ومن تحكم اهله فينا

1. واهله يتحكون فيني كل شي هم الي يسونه ويخططون لنا


2. والله الكلام كثير وتدخلاتهم فيني كثيره وهذا شي بسيط من الي سواه فيني

السلام عليكم
كيفكم يافراشات اتمنى تساعدوني وتخففون علي وربي تعبت من دلوع ماما ومن اهله وتحكمهم فينا
انا عمري 17 سنه ومتزوجه ولد عمي عمره 20 سنه
طبعا الزواج كان رغبه من ابوه لانه ولده الوحيد ويبي يفرح فيه ويشوف عياله
حدد له بنات من العايله وما اختارني الا انا ( ويليته ما اختارني وما تزوجته )
حياتي معاه ممله احس ما عنده احساس بالمسؤليه بدايه الزواج سهر في الليل ونوم في النهار وما يتكلم معاي او يسولف ساكت طول الوقت

واهله يتحكون فيني كل شي هم الي يسونه ويخططون لنا

اجي من المدرسه وهو يجي من الجامعه يسون الغدا وتجيبه الشغاله وبعد الغدا تجي تأخذ الاغراض وتنظف ومحددين لي يومين في الاسبوع تجي تنظف شقتي والملابس هي الي تغسلهم انا ما اسوي شي اكل وجلسه بس ما رضيت تغسل ملابسي وكلمته قلت له انا ابي اغسل ملابسي وخصوصا ملابسي الخاصه قالي بقول لامي اذا رضت وكلمها والحمد لله رضت وصرت بس اغسل ملابسي
وانا مو متعوده على هذا الشي في بيت اهلي احب اسوي كل شي انظف واغسل وحتى الاكل اذا ما عجبني وما احبه في الطقاق ما في اكل غيره هم الي يسونه غصب اكله وما اتكلم
يتغدا وينام واذا جلس المغرب يطلع مع الشباب وما يجي الا وقت النوم وكل يوم على هذا الحال
وياليت تدخلهم وقف على هذا الحد حتى الحمل يتدخلون فيه اقول لزوجي خل نأخر الحمل شوي تونا صغار ما نبي الحين قالي انتي مجنونه لا لازم تحملين اهلي يبون عيال وما في منع حمل الا اذا جبتي اثنين بعدين ارتاحي قلت له اثنين قالي امي قالت لي كذا ** وربي كتب لي الحمل وحملت وفرحوا بالحمل
وماتخلينا امه نطلع لحالنا من تشوفه تقول له بتطلع خذ خواتك معاك والله العظيم من تزوجت ما رحت مطعم معاه لحالنا لازم خواته معانا وياليت بس الي مو متزوجات حتى المتزوجات يروحون معانا ومع عيالهم واذيه والله اذا شفت وحده مع زوجها وماسك ايدها اقول يحظها طالعين لحالهم مو انا مع ست بنات
تعبت منهم والحين انا في بيت اهلي لاني حامل وخايفين علي من التعب ومن المشي يقولون المدرسه وتعبها كفايه عليش
كل حياته شباب ومباريات طفشت منه واذا كلمته قال انا مع الشباب اذا طلعت اكلمش وما يتصل يقول طلعت متأخر وقلت يمكن نمتي وكل مره على هذا الحال
اجلس اسبوع احيانا اسبوعين ما يجي لي واذا جا جات امه معاه واذا جاب لي شي جلست تصارخ ليش تشتري لها ليش تجيب لها ابوها مو مقصر يقول لها ادري عمي مو مقصر الي جبت لها حلويات وعصيرات قامت تفتش وتشوف وش في الاكياس
وش اسوي والله افكر انزل الي في بطني بسببها عشان احرق قلبها والله العظيم حقوده وحسوده وتعبت منها ولدها ما يقدر يقول شي لامه واحيانا اقول يجي عشان يسليني بس افكر مهدديني اذا ولدت بيأخونه مني ولا راح اشوفه الا وقت الرضاعه يجيبونه لي وبعدين يأخذونه طبعا هذا كلام امه وامه قويه وتسويها
عمي المسكين هو الوحيد الي طيب معاي ويسأل عني ويوصي ولده علي ما يقدر يسوي شي مريض ( الله يشفيه )
بعد ما عرفت اني حامل نزلنا عند اهله عشان يبشرهم جلسنا شوي بنطلع قالت له خذ خواتك معاك هاوشها عمي وصارخ عليها قال لها ما تحسين الولد فرحان بحمل زوجته وبيطلع معاها لازم تغثينهم ببناتك قوم ياولدي خذ زوجتك واطلع معاها الله يسعدكم ** والله فرحت عليها وبرد قلبي عمي فيها

والله الكلام كثير وتدخلاتهم فيني كثيره وهذا شي بسيط من الي سواه فيني

صرت اكرهه ولا ابيه يجي لي له يومين يبيني اروح معاه لشقتنا وانا اصرفه ما ابي اروح ما يجي الا لحاجته وكذبت عليه قلت له الدكتوره منعتني لانه خطر على الي في بطني قال لي تعالي ما راح يصير شي قلت له ما اقدر ضهري يألمني && وادري انا هذا الشي حرام وحرام علي اني احرمه من حقه بس مقهوره منه وقت حاجته يجي لي واذا انا محتاجه له ما اشوفه وما يكلمني
وش اسوي معاه تعبت ابي اطنش بس ما اقدر ليتني ما تزوجت وجلست بيت اهلي احسن لي
والكل حاسدني اني تزوجت وانا صغيره والله البنات ذابحيني في المدرسه حضك تزوجتي بدري وحملتي بعد ما يدرون بالهم الي انا عايشته
ابي حل ما اقدر اقول لامي او خواتي لانهم ما راح يرضون واخاف يصير شي بين ابوي وعمي وعمي مو ناقص تعبان
اعذروني اذا كان كلامي ملخبط اول مره اكتب في منتدى وادور لي حل
انتظر ردكم خواتي لي ريحوني