خطيبة اخو زوجي و مشاكلها

1. السلام عليكم ورحمة الله و بركاته


2. بنات انا سار معايا موقف مو عارفه ايش التصرف الصحيح فيه


3. القصه

السلام عليكم ورحمة الله و بركاته

بنات انا سار معايا موقف مو عارفه ايش التصرف الصحيح فيه

واحد من اصحاب زوجي يعتبره مثل اخوه و اكثر و الولد هذا خاطب بنت و عرفت انهم كان بينهم قصة حب طويله بس سارت بينهم مشاكل و الولد اكتشف ان البنت لعابه وهي كانت معاه و حقد منها و يوم اكتشفو اهلها راح خطبها والحين الولد يبغى يخطبها فتره و يتركها بعدها

القصه

في مره دقت علي قالت لي انتي مين ؟ و تعرفين فلان ( اللي هو خطيبها ) و هي فكرت ان خطيبها يخونها معي بعدين قالت لي انا لقيت رقمك مكتوب في جوال خطيبي في الاتصالات قلتلها ابد ما اعرفه و انا مملكه اصلا وماعندي ذا الكلام ماكنت ادري مين هي و بعدين قلت لزوجي عن اللي سار المهم في النهايه افتكرت ان زوجي دق علي من رقم صاحبه لأنه نسي جواله و ماقلي وينه و طمني عليه بس
البنت كلمت خطيبها و قلها هذي فلانه زوجة فلان و هي ارتاحت و جا يوم و شفتها بالصدفه و سلمت عليها ومشيت زوجي جلس يسألني سألتك عن حاجه ؟ كلمت سوتلك شي ؟ انا استغربت قلتله اصلا ما مداني اسلم الا انت تسحبني ليه ايش فيه قال ولا شي ما ابغاك تعرفي زي هذي الاشكال
المهم جا يوم يدق علي رقم غريب شوي الا رساله كاتبه اسمي و تقول ردي علي بسرعه رديت سمعت صوت بنت قلت يمكن وحده من صحباتي و قعدت اقولها مين انتي تقولي انتي فلانه ؟ اقولها ايوه مين انتي قالت انا فلانه ( خطيبة صاحب زوجي )قلتلها يا هلا فيك كيفك اخبارك علومك امريني ؟
قالتلي انتي مملكه على فلان قلت ايوه الحمدلله قالت انا قد شفتك ؟ قلت ايوه و سلمت عليك و عرفت انها تبغى تتأكد انه انا قلتلها في شي ؟ قالت ابغى اسألك سؤال .. قد سمعتي من زوجك ان خطيبي يخونني ؟؟
قلتلها والله مدري يا فلانه انا لا قد سمعت ولا شفت و مرره تحرجيني والله المهم اعتذرت منها قالت لي طيب لا تقولين لزوجك قلت لا مقدر اسكت عن شي زي كذا لازم اقوله و قعدت تأمني ساعه اني ما اقول تقول لو قلتيله بيقول لخطيبي و بروح فيها و بيسويلي و يسويلي قلت خلاص طيب بس لا يجي يوم و تقولين لخطيبك و اروح انا فيها بستر عليك لأنك مثل اختي و ما ارضى يسوي فيك شي و جلست تدعيلي لأني ما بقول شي
قفلنا و خلصنا
و من بعدها كل يوم اسمع انه سار بينهم مشكله
و ان البنت الله يهديها و يصلحها مرره لعابه و خطيبها عرف عن اشياء سوتها غلط الله يهديها
وخطيبها كل شوي يكرها زياده و ما اسمع زوجي الا يتكلم عنهم سوت و سوت
و انا من كثر ما سمعت عنها ايش تسوي من اشياء غلط و خطيبها ايش ناوي يسوي فيها سرت ابكي طول الوقت الله يصلحها هي الي جابته لنفسها قعدت ادعيلهم ليل نهار لأني لا برضاها على الولد ولا برضاها على البنت
المشكله يا بنات دقت علي و انا كنت اكلم زوجي قال مين دق عليك قلت رقم غريب قال ايش هو الرقم
قلتله الرقم هو نط من مكانه قال هذي فلانه !!! قلت و ليش تدق علي قال مادري و قعد يتأكد من الرقم قام اتصل عليها قال مين دق على جوالي الثانيه قالتله معليش غلطت في الرقم
شوي رسلتلي رساله كاتبه فيها كلام ما فهمته بس شكلها هي شاكه في خطيبها انا خفت اقول لزوجي انها رسلت الرساله لأن زوجي من النوع الي مره عصبي وخفت يكون الكلام الي فيه مقصود منه شي غلط اخاف لو عرف خطيبها يسوي فيها شي ولا ممكن يخرب علاقتها بخطيبها
زوجي لاحظ اني متضايقه قلتله تعبانه شوي و قفلت منه فكرت في الموضوع شوي و طلع اني لازم اقوله
لأن مالي بهالدنيا الا زوجي و لو خبيت عنه شي و عرفه بعدين ما بيكون بيننا مستقبل لانه زي ما قلت مرره عصبي و ما بيرضى اني اخبي عليه شي زي كذا و خصوصا عن هذي البنت لانه دايما يبعدني عناه و يقول ما ناقص الا هذي الاشكال
بس خفت اقوله بيعصب و يعصب على صاحبه و صاحبه يعصب على خطيبته الا والبلا كله مني
اتوكلت على الله و قلتله ترى البنت ارسلتلي رساله مكتوب فيها كذا و كذا و قلتله الله يخليك طلعنا من الهرجه قلتله علاقه يدخل فيها طرف ثالث تخرب
خلينا نبعد عن الموضوع و قولهم يبعدو عننا لا نتدخل فيهم ولا يتدخلو فينا قلت هذا مثل اخوك على عيني و راسي بس خطيبته اذا كانت شاكه فيه تدور طريقه ثانيه تتأكد بها
لأنها يا بنات كنها سارت ماخذاني جاسوسه بالغصب ما شفتو طريقة كلامها الي في المسج كنه تهديد مين فلانه و مين فلانه و انا ايش دراني مين هما ؟!!!
قلت لزوجي خرجنا من مشاكلهم و حتى لو صاحبك جا ياخذ رأيك بشي لا تقوله لأنك اذا وزيته بشي غلط بتاخذ اثمه و اثم البنت خلك ساكت احسن
و لا تجيب سيرتي قدام صاحبك عشان لا يزعل مني ولا شي زوجي مرره عصب و يقول ابيعه و ابيع الاخوه اللي زي كذا و اذا ما عرف يمسك (****) انا بربيها
و انا والله يا بنات خفت على زوجي من ذا البنت اخاف لا تسحره ولا تسويله شي ولا ترسله بنات هي من اول تلف و تدور عليه و تبغى توصله بأي طريقه و تقعد قدامه كاشفه و تقولي ليش مغطيه ؟ اكشفي وجهك قدام خطيبي عادي
المختصر ان البنت مرره لعابه الله يصلحها و احس انها تبغى تدخلني في العوامه معها
وانا مو عارفه ايش اسوي
امانه يا بنات هل تصرفي صح ولا غلط اني قلتله ادري ان زوجي عصبي مرره بس لو ما قلتله بينخرب بيتي و البنت ممكن تقول انها اتصلت ولا كلمتني و تخرب بيتي مامنها امان
بناات ادري اني طولت في الكلام و القصه طويله بس قلتلكم كل القصه عشان تساعدوني
بليز قولو ارائكم و قولو كل الي بخاطركم حتى لو انا غلطانه عادي قولي تراني ببداية حياتي و ابغى اعرف ان كان الي اسويه صح ولا غلط