خطيبي متعبني استشارة من المتزوجات

1. نقاط مهمة قبل الرد:

أتمنى ما ينقلون المشرفات موضوعي لافتح قلبك، نزلته هنا عشان استشير المتزوجات في أشياء مضايقتني في خطيبي، و أبغاهم يفيدوني من تجربتهم في التعامل مع أزواجهم أو معرفتهم عن عالم الرجال.
ملكت من أسابيع في أول أسبوع كان يزورني كل يوم و نسولف بالرسايل لكن ما نكلم لأني مشغولة بدراستي و التجهز لجيته، و كنا غرقانين بالعسل، يعني الحمدلله كانت الدنيا آخر حلاوة. بعدها سافر و بدت المشاكل بينا و الشرهات، في البداية ما كان يراعي فارق التوقيت و ان الوقت اللي يكلمني فيه يكون وقت نومي، بس يوم طفح بي الكيل صارحته، و تفهم الوضع. بعدها صار الوضع أحسن يعني أكلمه تقريبا يومين ورى بعض و يوم لا، و أحيانا نتراسل. لكن خلال هالفترة كان يقول و يسوي أشياء ما تعجبني، و بطبعي اسكت و ما أعلق، و نفس الحالة معاه، أقول و أسوي أشياء ما تعجبه و ما يقول لي. لين فرطت الخيط و صارحته ببعض اللي شايلته و هو نفس الشي.. المشكلة اللحين أني أشيل هم مكالمته، يعني إذا كلمته ما أكون مبسوطة، يعني زي اللي اسوي واجب علي، رغم أني اشتاق له، و وقت ما أكلمه ما ودي اسكر. و إذا سكرت منه أقول كيف بكلمه المرة الجاية، زي شعورك لما تطلعين من عيادة دكتور أسنان و معاك موعد معاه بعد يومين أو بكرة.
يمكن السبب يرجع لعدة نقاط: محروسي العزيز حاط صورة فتاة أحلامه في باله و يبغاني أكون زيها بالضبط، يعني كم مرة لمح يبغاني أصير نباتية، و مرة يبغاني أربي قطوة أو نبات مع العلم أنه ما يربي قطوه و عنده نبته في مكتبه، و يبغاني أدرس فرنسي مع أنه ما يعرف غير بنجور و مغسيه. و أشياء كثيرة مالها أهمية بالنسبة لي و هو يشوف أن كل بنت لازم تكون كذا. و كم مرة ناقشته على خفيف و بشكل عام في هالموضوع و أن البنات يختلفون و مب زي بعض. الشي الثاني دايم يقارن شخصيتي بأخواته، يعني أخته فلانة فيها صفة حلوة و هي كذا و يضرب مثال على هالصفة و هي طبعا مب فيني أو فيني و يعتقد أنها مب فيني. و يستخدم أسلوب "إياك عني و اسمعي يا جارة" و هالاسلوب مرة يقهرني. يعني يناقشني مباشرة في هالنقطة و لا يسكت. و ودي اناقشه فيه بس احس صارت كل مكالمتنا نقاشات و هالشي يطفش.
و فوق هذا كله مب متخيل أن لي عيوب، و مرة يزعل لما أقول له عن عيب من عيوبي أو لما يعرفها هو بنفسه، رغم انه بين مكالمة و مكالمة يصارحني بعيب من عيوبه، و أبدا ما يظهر مني غير التفهم، يعني طبيعي ان الانسان فيه عيوب. و حلو أعرف عنها من الآن عشان أتأقلم معها. لكن هو العكس تماما، و طبعا صرت أحاول أخفي عيوبي قدر الإمكان. صارحته مرة في هالنقطة و ان ما في انسان كامل و اني بشر و لي ميزاتي و عيوبي، و كان متفهم لحظتها، و توقعت اننا انتهينا من هالنقطة لكن كان نظريا فقط، لكن عمليا ما تغير شي.
ينرفزني اني أجاريه أحيانا في الأشياء اللي أشوفها تافهة و أسويها، و طبعا بدون اقتناع و هذا موترني جدا و مكرهني في نفسي. لأني ما احب اسوي شي بدون اقتناع و لا أحب أغير من نفسي عشان أرضي أحد حتى لو كان غالي علي، لانه مب شي غلط لازم يتصلح.
فيه نقطة تنرفزني أكثر، كم مرة قالي لي ما يقوم البيت برجالين، و يلمح أن شخصيتي شخصية رجال و تفكيري بعد. لانه يبغاني أكون زي أهله أي شي يقوله الرجال أقول سم و لبيه بدون نقاش أو اقتناع، و في بيتنا كل شي بالديموقراطية حتى اختيار المطعم، بس يفرق ابوي عنا أن له صوتين في أي موضوع نصوت له، و حياته مختلفة عنا تماما.
و عنده تصورات غريبة عن البنات، يعني البنت ما تاكل لحم، ما تعصب أبد، ما تهاوش أبد، لازم تكون رومنسية حتى النخاع، مطيعة حتى لو طلب منها تطب في جهنم.
يعني يعتقد أننا من كوكب ثاني، و مخلوق مختلف. أنا مب عصبية، بس بشر، يعني مرة قلت له ان كان صايبني أرق أسبوعين، و كان عندي ضغط امتحانات، و تعبانة مرة و أجبرت أني أشرف على أطفال امهتهم طالعين يزورون و عيوني غرقانة نوم فنمت وسطهم، و جت بنت و نططت فوق راسي و قومتني من النوم حذرتها من هالحركة و رجعت سوت نفس الحركة عشان تنرفزني و كان تقريبا عمرها و عصبت عليها لحظتها، و من ساعتها ماخذ فكرة عني أني عصبية و يضرب لي الف مثال قبيح عن حريم مسترجلات عصبيات. و المصيبة هو عصبي بجد. بس يحاول يخفف منها و يشوفها عيب.
يعني باختصار من يوم صار بعيد عني صارت نص سواليفنا محاولات لتغيير اهتماماتي و تفكيري و شخصيتي على مزاجه بشكل غير مباشر، و طبعا هو يشوفني صغيرة و يشوف نفسه الكبير الفاهم رغم ان الفرق بينا كم سنة ، لكن عشان تفكيره اكبر من عمره بكم سنة.

نقاط مهمة قبل الرد:

• أنا في أواخر دراستي الجامعية، و هو متخرج من او سنين.
• خطبني عن حب، و لازال يحبني، و أنا ما عرفت بهالشي الا بعد الملكة و حبيته بعد ما عرفته.
• أهلي يقولون كل الخطاطيب وقت الخطبة كذا، بعد الزواج يصيرون عجينة، و ياليت احد يفيدني في هالنقطة.
• تربيت في بيئة نسائية، و أبوي كان يعاملنا بكل لطف، فمعلوماتي عن تفكير الرجال صفر.
• خطيبي سليم عقليا و نفسيا، لا يجي في بالكم انه مصاب بفصام الشخصية
• باقي على الزواج حوالي شهور، و لا يمكن استمر على هالحالة.
• أنا انسانة استقلالية، يعني أحب كل شي يكون خاص فيني، و ما في شي يتحكم فيني أو اي شي يخصني. و من تملكت متأزمة شوي لان وقتي مب ملكي، و لازم أفكر في رأي انسان ثاني في أي خطوة أسويها. (الخطوات ما اقصد بها قص شعر و طلعة مشوار و غيره لانه ما قد علق او سأل، بس في أشياء معنوية ثانية)
• أهل المحروس مدلعينه مرة، هو دايم في ذيل قائمتهم إذا بغوا شي، و إذا رفض (وهذا اللي دايم يصير)، ما يضغطون عليه، يدورون غيره.
• محروسي العزيز متصور أن الدنيا تمشي على مزاجه، و يتضايق مرة إذا طلب شي و رفضت، حتى لو تافه و ماله أهمية، و مرة جلس ساكت خمس دقايق ينتظرني أغير رايي و هو مبوز، و أنا قايله له أنه شي مب بيدي، و أني حاولت كم مرة قبل ما أرفض، بس مب عاجبه. و بيني و بينكم أنا كنت ناوية أحاول مرة ثانية عشان يصير زي ما يبغى، بس يوم شفت مسرحيته، عندت، يعني لو مناقشني في الأسباب، كان حفزني زياده، بس يوم شفت أنه يبغى يثير مشاعري، صار العكس.

استشارتي:
هل اللي يسويه خطيبي طبيعي؟
كيف اتصرف معاه؟ كثير قالوا لي اسفهيه و بعد الزواج سوي اللي تبين، بس مب مقتنعة
اذا كنت وصلت حتى هذا السطر فأنا متشكرة جدا، و أحيي فيك صبرك