دعيت ربي واتشرطت بدعوتي ليش لا ربنا كريم

1. واللي خلاني ادعي يقيني بأن الله اكرم الاكرمين

السلام عليكم ورحمة الله وبركاته
انا كتبت هذا الموضوع عشان اوضح امور كثير اكتشفتها ولله الحمد
انا مملكة والحمدلله وقبل ما املك مريت بظروف,,كم مرة انخطبت ومايصير نصيب وجاني يأس بس مع هذا مافقدت الامل
بيوم من الايام وبليلة من ليالي رمضان نزلت مطرة خفيفة ودعيت الله دعوة ماقد دعيت زيها او تجرأت او فكرت ادعي زيها غريبة شوية خ المهم اقلكم ايش دعيت بس لاتضحكو عليا

واللي خلاني ادعي يقيني بأن الله اكرم الاكرمين

وقلت يارب ارزقني بزوج صالح,,حلو,,غني,,من عيلة معروفة,,وطيب,,ويحبني,,ومايقصر عليا بشي,,وارزقني منه ذرية صالحة,,واعيش ببيت حلو,,واسافر,,ومعافا,,ومتعلم,,ومتوظف و ماخليت شي...متأكدة ماوحدة دعت ربها كدا,,صح كلنا نتمنى بس مادعينا وطلبنا الله كأنو شي معجزة وربنا غير قادر على تحقيقه
ودعيت بإحساس خاشع وبيقين بان الله يستجيب ,,ومر كم شهر والحمدلله جات على ما اتمنى قولو ماشاءالله,,,وهي مرة وحدة دعيت كدا,,بعد كدا صرت ادعي عادي الدعاء المعتاد من غير شروط خ
بس نسيت حاجة وحدة مادعيتها خ نسيت اقول نحيف,,طلع شوي مليان بس ماعليه انا وراه لين ماينحف والحمدلله في امل
اللي بغيت اقوله من الكلام دا,,انكم تتيقنو يقين كامل بأن الله كريم
وثاني حاجة التفاؤل
اعرف وحدة قريبتي وصديقتي,,قالت مرة راحت السوق واشترت قميص نوم وورتني هو<<متفائلة فيه
والله كلها شهرين والبنت انخطبت وهي دحين ببيت زوجها ربي ويفقها
بس هاه مو تروحو دحين تشترو قمصان نوم
لا بس اتفائلوو بأي شي وبعدو وساويس الشيطان,,كل ماتخيلت حاجة حلوة بتحصل يجي شي بالعرض شي يخرب<<كثير كنت افكر كدا
بس صرت كل مااتخيل شي حلو وابدا اتخيل شي مو حلو يخرب اقول اعوذ بالله ربنا كريم واتعوذ من ابليس واقول كل شي بيكون حلوو وابطل افكر
وفي حاجة اخيرة مدري بتفهموها ولا لا,,لأني فهمتها متأخر
لايغير الله مابقوم حتى يغيرو مابأنفسهم
انا كنت متعلقة بأفكار واشياء بالماضي قالبة مخي وابغاها ترجع ومتمسكة فيها وادعي ربي عليها
بس بعدها حجيت والحمدلله وبعدها حسيت براحة وشلت كل شي من راسي
وقلت اللي عند ربي احسن واللي جاي احسن وربي بيرضيني بكرمه وعطاؤه<<دايمن اقول كدا
ومن جد ربنا كريم,,وغير عليا الحمدلله ورزقني
واخر حاجة الصبر مع اليقين بالفرج
ويارب يفرجها عالكل ويرزقنا مانتمنى ويسعدنا دايما يارب
اتمنى تستفيدو من تجربتي
وتبدأو تفكرو بطريقة غير
ادعولي ربناا يتمم لي على خير ويوفقني مع زوجي
والسلام عليكم ورحمة الله