ربي سميع الدعاء

مرحبا الغاليات ... انا عضوه جديده عليكم وحبيت تكون اول مشاركتي في هالقسم واتمنى من الله عز وجل يحقق املي وامل كل وحده محرومه من الانجاب ويارب يجعل صبرنا في ميزان حسناتنا ..
خواتي اذكر قبل مايتقدم زوجي لطلبي كنت اقول لناس ان شاء الله اول ما اتزوج احمل واجيب توأم ورا توأم
الكل كان يضحك من كلامي .. والحمدلله جا النصيب وتزوجت ومن فرحتي كنت اقوله ايام الملجه ان شاء الله احمل
على طول وبعد ابغيهم اثنين اثنين (( بما امي جابت توأم وخالتي بعد )) كان يضحك عليه ويقولي ان شاء الله حبيبتي ....
وبعد الزواج كنت انتظر الحمل بفارغ الصبر .. حتى اني اشتريت ملابس للطفل حتى المصاصه ما نسيتها وكنت كل شهر وبالذات قبل موعد الدوره باسبوع اخذ اختبار الحمل
وتطلع النتيجه سلبيه بس كنت اقول لا بعده مايبين الحمل الحين بنتظر موعد الدوره وبسوي الاختبار مره ثانيه
وبعد تطلع النتيجه سالبه وهم ارجع واقول اصلا ما يبين الحمل الا بعد يومين وارجع اسوي وتطلع نفس النتيجه
ساعتها اتأكد ما صار حمل .. واحمد ربي على كل شي وادعي ربي يعوضني بشهر اللي بعده واقعد على نفس
الموال شهر ورا شهر وانا اسوي اختبار الحمل
وبعد مامضى العمر اخ ... ابكى على حالي واقول والدمعه بعيوني ربي شهر اللي بعده
ان شاء الله .. وطاف الكثير وما باقي الا القليل .. وانا على هالحاله من 15 سنة ........
كملت 15 سنة زواج وانا انتظر بفارغ الصبر كلمة ماما ا
يازينها من كلمة ....... عشت عمري وانا انتظر اللحظه اللي بسمع فيها كلمة ماما ... وكل ما افقد الامل افتح الخزانة واقعد اشم ملابس وليدي واقول وينك وينك يا وليدي امك تنتظرك من 15 سنة
ومابتفقد الامل لانك جاي جاي بإذن الواحد الاحد .. بس متى الله اعلم يمكن الحين ويمكن بعدين ... يمكن وانا
بالدنيا اشوفك او يخلص عمري واموت واشوفك بالجنة واضمك بصدري واهمس لك اشتقت لك يا
وليدي ((( يارب هب لي من لدنك ذريه صالحه انك سميع الدعاء ))
يا رب ارزقني وارزق كل محروم من نعمة الانجاب ارزقنا ذريه الصالحه