رحلة العمر قصة مكونه من أجزاء

كان لي شرف الفخر ..
أن أكون أول قارئة لهذه القصة الرائعة ..
وأول معانقة لحروفها ..
وأول ناهمة من جمالها ...
بإنتظار التكمله..
دمتي في حفظ الله ورعايته ...

مشعل : ليش وقفتي؟
ديمه سكتت
مشعل لفت صوبها وشاف وجهها ناشف
مشعل : ديمه شفيج ؟
ديمه : لا بس كنت ادور كرت لتلفونك عشان ما انسى مو هذي شركه اس اف ار ؟
مشعل : أي كاهي بس انتِ مو طبيعيه
ديمه : لالا انا زينه
مشاها لين وصل الكراسي اللي بالنص
مشعل : اقعدي
ديمه : ليش ؟
مشعل : انتِ تعبانه وجهج منصفق لاتقصين علي
ديمه : مافيني شي خلني اكمل
مشعل : مافي تسوق بجيب لج عصير برتقال فرش وبتشربينه كامل
ديمه : ليش تعاملني جني جاهل ؟
ديمه : شسوي فيج ماتسمعين الكلام ليش ماتقولينلي انج تعبانه ؟
ديمه : بس صداع وبيروح انا متعوده
مشعل : شفتي صداع وقبل شوي اقولج شفيج مافيني شي
ديمه : أي مايستاهل
مشعل : خلج مكانج
راح مثل كوشك يبيع عصائر وهالشغلات .. جابلها عصير برتقال
مشعل : اشربيه كله
ديمه : ههه ان اشاء الله يبى
رغم انه معصب منها بس كلمه "يبى" خلته يبتسم غصب وبعد ماخلصت كان صوب كوشك العصير محل الهدايا اللي شرت منه ديمه هذاك اليوم .. ودخلت له مع مشعل
مشعل : واو والله شغلات عجيبه
ديمه : اي كلها تذكار تصلح هدايا
ديمه قعدت تحوس كل شي احلى من الثاني .. بس مشعل طقت براسه فكره وطبعا مافي شي يرده نفذها .. شرى بلوزه عليها اسم باريس وبرج ايفل وتحتها مساحه بيضاء وخذا قلم اسود ماينمسح وكتب عليه جم كلمه غلفها
ودخلها بواحد من جياس ديمه ..
مشعل : انا ويني عن هالمحل من زمان؟
ديمه : انا اول ما اكتشفته تنقعت فيه والله يحيرك ماتدري شتاخذ
مشعل : نقيلي شي بناتي حلو على ذوقج
ديمه : لمنو ؟؟
مشعل : حق بنت عمرها 19 تقريبا بس ذوقها صعب
ديمه انقلب لونها : خطيبتك ؟
مشعل : أي
ديمه صخت وهدت اللي بيدها
مشعل : يلا ماتبين تشترين شي ؟
ديمه : مابي شي خلنا نطلع
مشعل يراقب تصرافتها .. والضحكه ماسكها .. يبي يشوف ردت فعلها
ابتسم وطالعها بنظره اهي ماعرفت معناها !!
مشعل : انتِ ماتبين تشترين كيفج انا بشتري لاختي
ديمه منزله راسها و قاعده عالكرسي ومشعل قبالها اول ماقال " اختي " رفعت راسها وطالعته بعيونها ولالحين البسمه بوجهه ..
ديمه : اختك ! والا خطيبتك ؟
مشعل :ههه انا وجه خطيبه !! لالا اختي وذوقها صعب بعد
ديمه : اها
مشعل : ها ماتبين تشترين لها ؟
ديمه ابتسمت: اشتري لها افا عليك
مشعل هني موعارف شيسوي من الفرحه .. خلاص عرف اهو شنو بقلبها .. ولو انها مو بطريقه مباشره .. حس انها متضايقه يوم قالها خطيبتي حتى هدت اللي بيدها .. بس اللحين ردت وشرت لاخته وشرت اغراضها اللي خلتهم .. وبعد ماطلعوا
ديمه : ماقلتي شسمها ؟؟
مشعل : خطيبتي ؟
ديمه تطقه بالجيس وتقلد صوته باستهزاء : خطيبتي
مات من الضحك
مشعل : ليش منقهره ؟
ديمه : اكلمك جد ترد علي بمصخره
مشعل : ههه لا اختي واسمها دلال
ديمه : حلو اسمها
مشعل : يعني عادي
ديمه : ههه قولها تبادل وازيدها
مشعل : من صجج ؟ اسمج يهبل وغريب
ديمه : مادري مو داش مزاجي
مشعل " آآآآه لوتدرين ان هالاسم شيسوي فيني !!"
كملوا طريقهم بالتسوق الا يشوف مشعل ربعه عمرالمصري وسمير اللبناني وهالطقه .. شافهم قاعدين على الكوفي ..
مشعل : ديمه انتِ بتطولين بهالمحل ؟
ديمه : يعني قول ربع ساعه
مشعل : انا بقعد مع ربعي يعني على ما تخلصين
ديمه : اي عادي اخذ راحتك اصلا تلقاني بهالمحلات .. ماراح ابعد
مشعل : شوفي ربع ساعه وتكونين هني عند هالمظله اوكي ؟؟
ديمه : اوكي
راحت ديمه تتسوق .. وراح مشعل لربعه وهو قلبه معاها .. خايف عليها يمكن تشوف جلب اسود والا شي .. وهي خوافه .. يمكن تضيع ويمكن ويمكن ....الخ بس خلاص هو عطاها وقت محدد بتكون موجوده .. قعد مع ربعه سوالف وضحك وعن المدرب والمباريات واللي يقوله ياحظك اجازه .. وخذتهم السوالف ..
اما ديمه زهقت من التسوق .. حست انها قامت تشتري اشياء مالها داعي .. شوي الا شافت قبالها كوفي نت .. هني شهقت من الفرحه .. وتدخله وكان مكشوف على الشارع .. وشافت ان اقل مده عندهم نص ساعه .. وحجزت وقعدت على كمبيوتر .. وفجت المسنجر مالقت احد.. مشكله ان كيبوردهم فرنسي .. والحروف الانجليزيه متغيره اماكنها .. وفجت المنتدى والهوتميل .. وساعه يا الله تتهجى الحروف .. وعلى ما جيكت على المنتدى شافت رسايل فلّ طنشتهم وفجت قسم الرياضه والشباب .. الا تشوف موضوع مثبت عن دوري اوربا .. هي ابتسمت .. وشاركت فيه بحماس .. طبعا هي ماكانت تحب شي اسمه كوره .. بس يمكن هالسفره غيرت هالطبع !! .. وقعدت تشوف رسايل القروبات .. شوي الا تدخل وحده بالمسنجر .. اخر وحده توقعتها ديمه انها اتدش .. طبعا الكتابه كانت كلها بالانجليزي المعرب
" انوار !!! "
ديمه: انتوا وينكم ؟؟؟؟
انوار : سويتيها وقعدتي جان قلتيلي اقعد معاج ؟
ديمه : مالت بس وين ابوي متى بيجي ؟
انوار : اسكتي سالفتنا سالفه يمكن ماراح يجيج بعد
ديمه : ليش ؟؟؟
انوار: المترجمه الخايسه متهاوشه معاه .. وطلعت اليوم الصبح وطنشتنا .. وابوي معصب يلقاها منج والا من هالخبله
ديمه : يعني شلون اللحين ؟؟
انوار: اسكتي تراني شابكه من الفندق طلبت منهم لوب توب .. والله من القهر محد طلع
ديمه : وانا
انوار : انتِ جبي تراج مستانسه بالشانزليزي مع الاخ مشعل
ديمه : انوار ابي ابوي حرام عليج ماتحسين فيني ورب الكعبه قمه الاحراج تخيلي امس رايحين نزور رفيجه بالمستشفى !! وغصبن عني اروح معاه لاني ماقدر اقعد بروحي
انوار : يالله منها تشوفين مستشفياتهم
ديمه : قولي الصج ابوي متى بيجينا ؟
انوار : مادري هو من اليوم يدق على تلفون مشعل بس مايستقبل تلفونه
ديمه : اي بيشتري كرت اللحين شكلي تأخرت انا بروح
انوار : يلا سي يو
ديمه صكت المسنجر وتوها بتفتح رسايل المنتدى بتجيك على الماشي الا ينصك الاكسبلورر قدامها وكل شي اختفى خلاص خلص الوقت .. استوعبت ان نص ساعه خلصت + ربع ساعه تسوّق وهي مادرت عن عمرها ..
تذكرت مشعل اللي وعدته بعد ربع ساعه بتكون عند المظله .. وراحت ركض للمظله بس مالقته !!
نطرت خمس دقايق بس ماله اثر .. وراحت الفندق الا شافته باللوبي واقف ووجهه احمر ..
ديمه : آآآسفه
مشعل : ساعه كامله يالظالمه !!
ديمه : والله مادريت عن الوقت
مشعل : وين كنتي ؟
ديمه : بكوفي نت
مشعل : ما شاء الله وانا متنقع عند المظله !!
ديمه : والله ماحسيت بالوقت
مشعل : المهم جهزي اغراضج بنمشي العصر
ديمه : وين ؟
مشعل : ماتبين اتردين لأهلج ؟
ديمه : انت اللي بتوصلني ؟
مشعل : أي نعم
-------
:: الجزء السابع ::
ديمه : شفيه ابوي ليش ماراح يجي ؟
مشعل : مافيه الا العافيه بس متمشكل مع المترجمه ومايقدر يخلي اهلج لحالهم
ديمه : والحل ؟
مشعل : اقولج انا بوديج شفيج !
ديمه : بس انت موملزوم اتوصلني انت سويت اللي عليك واكثر يعني ابوي مايقدر يخلي اهلي بس يخليني عادي صح ؟؟؟؟
مشعل : لا مو صح لوتشوفينه شلون متضايق وشلون خايف عليج ماكان قلتي هالكلام
ديمه : لوخايف علي صج جان جاني وخلاهم على الاقل هم مستقرين موانا
مشعل : وشالفرق بيني وبين ابوج ؟
ديمه : هو المسؤول عني
مشعل : وانا ؟
ديمه : انت سويت اللي عليك واكثر
مشعل : يعني ماتبيني اوصلج ؟
ديمه : انت وراك نادي ولعب ودوري مو مشكلتك دام اهلي مو مهتمين فيني
مشعل : بس انا المسؤول عنج اللحين والمفروض تسمعين كلامي صح؟
ديمه : ليش ماتفهمني يااخي ؟
مشعل : اللي فاهمه انج عادتني غريب ومو من حقي اكون مسؤول عنج واوصلج لأهلج واذا انتِ حاطه ببالج انج ثقل علي او معطلتني ..فحبيت اقولج انج غلطانه .. انا عندي اجازه هاليومين ورفيجي بالمستشفى وماعندي احد ..
ديمه : يعني افرض انك مو موجود بيخليني ابوي لحالي هني ؟
مشعل : هذا لو انا مو موجود بس انا كاني قدامج بعرضي وطولي مو مالي عينج ؟
ديمه قعدت تطالعه طول بعرض
ديمه : ماشاء الله عليك اذا على العرض والطول تراك مومقصر من العمالقه
مشعل : لاوالله اي صكيني بعين بعد
ديمه : ههه ماشاء الله
مشعل : انزين يا ام راس يابس شفيج واقفه ببلعومي ماتروحين فوق تودين جياسج
ديمه : بس احنا ماخلصنا من سالفه هالسفره
مشعل : لا والله هي بعد فيها نقاش؟
ديمه : ماتوقعت اني رخيصه عند اهلي
مشعل : رخيصه لانج معاي ؟؟؟
ديمه : ها لا مو عن بس المفروض مايخلوني جذي
مشعل قاطعها : لا! اوكي مشكوره يجي منج اكثر
راح مشعل فوق غرفته معصب وخلاها باللوبي تحت
قعدت ديمه على الكرسي وحطت الجياس على الارض باحباط
" ياربي مو وقته يعصب علي انا ماكنت اقصد اللي افهمه هو .. اف هذي حاله اللحين !! جيت بكحلها عميتها "
صعدت غرفتها المؤقته وحطت جياسها داخل الكبت .. والدنيا خلاص صكت بوجهها هي ماعندها اللحين الا مشعل وهو عصب وراح غرفته .. وتندمت على كل كلمه قالتها ولو اهو ما يستاهل جزاه مهتم فيها وبيوصلها لأهلها ..!
قعدت حوالي نص ساعه بالغرفه لين خلاص حست انها بتختنق .. لازم تروح اتكلمه لانها لو قعدت اكثر بتستخف من هالافكار اللي تحسسها بالذنب .. انزين اذا مشعل طنشها الحين منو بيوديها لأهلها !!
رفعت السماعه ودقت على غرفته 521 ويرنّ يرّن محد يرد .. خافت
" لالامو معقوله طلع وخلاني .. لا ما يسويها .. شلون يخليني بروحي ويدري اني اخاف حتى من ظلالي .. ؟ معقوله بيعاقبني؟ ياربي ماطلع يارب انا استاهل ليش خليته يعصب !! "
خلت فوفو بالغرفه ونزلت عند الرسبشن تسألهم عنه وقالولها ماطلع .. ارتاحت نوعا ما بس قعدت تحاتي ليش مايرد على التليفون ؟؟ يمكن نايم ! صعدت فوق وكانت بتدش غرفتها بس شافت غرفته وردلها شعورها بالذنب و ماحست بنفسها الا وهي تطق الباب .. طقت مره مرتين ثلاث مايرد ! بس كان قصدها تتطمن عليه لا اقل ولا اكثر .. وبعد ما يأست توها بتروح غرفتها الا فتح مشعل بابه ..
استانست ديمه وراحت بتكلمه الا يفتح بابه على الاخر ويدخل داخل !!
" ام لالحين معصب .. الله يستر انا ماعندي أي خلفيه للتفاهم مع الرجال !! شلون بتفاهم معاه واخليه يرضى ؟"
دخل مشعل داخل الغرفه بعد ما بطلّ الباب وخلاه مفتوح وقعد على القنفه ومسك الريموت متجاهلها على الاخر ومع هذا ماقدر يخفي علامات الغضب على وجهه .. لان اللي بيقرب بالمكان اللي هو فيه بيحس بحراره عجيبه صادره منه هو او بالاحرى من قفصه الصدري !
ظلت ديمه عند الباب ... وخليط من مشاعر الندم والاسف باينه على وجهها .. وهو كل اللي سواه عطاها نظره فوق تحت بعتب.. ورد يشوف التلفزيون ..
ديمه : آآآ مشعل
عينه ماتحركت من التلفزيون بس فكره وباله مع الموجات الصوتيه اللي جايه من هالخلوقه اللي واقفه قدامه بخوف !
مشعل بدون لا يطالعها : نعم ؟
ديمه : انت معصب علي ؟
مشعل طالعها بإستهزاء : هه ليش اعصب ؟ انتِ سويتي شي !
ديمه : امبلا معصب علي لانك خليتني تحت ورحت فوق
مشعل : تعبان وبريح ماعتقد فيها شي وانتِ أظنّ تدلين الطريج وتعرفين رقم غرفتج
ديمه : مشعل الله يخليك لاتعاملني جذي .. خلاص انا اسفه
مشعل : على شنو!
ديمه : على كل اللي قلته لك
مشعل : والمطلوب مني اللحين ؟
ديمه خلاص مو قادره تستحمل اسلوبه معاها والعبره غاصتها
ديمه : ولاشي جايه اتطمن عليك
مشعل : ليش يهمج تطمنين علي ؟
ديمه : اكيد يهمني
مشعل : ليش؟
ديمه : أنت ماقصرت معاي ومهتم فيني طول ما اهلي غايبين .. وليش ما اتطمن وانت اللي بتسفرني ؟
مشعل: ومن قال بسفرج ؟
ديمه : شلوون ؟ مراح توديني لأهلي ؟
مشعل: أنتِ تبين ابوج يجيج ؟ خلاص انطري يوم يومين على مايحل مشكلته ويجي مو ملزومه تروحين مع واحد غريب !
ديمه : انت شتقول ؟
مشعل : ماقول شي جديد هذا كلامج على ما اعتقد !
ديمه : ليش اتفسر كل شي على كيفك والله ماكنت اقصد ؟
مشعل: يعني تبيني اوديج ؟
ديمه : أي ماعندي مانع بس كنت متضايقه لان ابوي يبدّي حلّ مشكلته مع المترجمه على مشكلتي
مشعل : ابوج متطمن انج معاي عشان جذي انا حلفت له انه مايجيج ومايحاتيج وانا الي بوصلج لهم وهو يحل مشكلته على راحته ..
ديمه : اها قول جذي من الاول
مشعل : مادري عنج هبيتي بوجهي
ديمه: لا انت اللي كنت منفعل
مشعل : لاتلوميني من النطره المحترمه اللي حضرتج نطرتينياها تحت المظله
ديمه : ههه سوري
مشعل مبتسم : يلا ماعلينا .. روحي ارتاحي اللحين وانا برتاح ساعه بس
ديمه: اوكي ..
وصلها مشعل لي الباب وكان بيوصلها لي غرفتها بعد بس هي قالتله ماله داعي كلها خطوتين ونص وابتسم وصك الباب وراها وحس براحه ..
" ياالله شلون كنت معصب عليها كنت اذا شفتها مادري شكنت بسوي اقهرتني ؟ اجل هي رخيصه اللحين يوم اهلها نسوها وصارت تحت مسؤوليتي ؟ قهرتني ماقول ما اقهرتني بس من شفت وجهها باين انها متندمه قد شعر راسها .. ماقدرت اشد عليها والا انا مابغيت ارضى بسهوله لانها جرحتني .. بس خلاص من شفت الابتسامه شاقه وجهها ماقدرت اقاوم شعوري بالسعاده والراحه كفايه انها معاي وتحت مسؤوليتي .. رضيت عليها .. اصلا من قال اني اقدر ازعل عليها .. آه ياديمه شسويتي فيني ! "
الساعه وحده ونص .. حط راسه بعد ساعه بيقوم عشان يروحون يتغدون ..
------
ديمه بغرفتها فكرت انها خلاص دام مابقى على سفرتها الا جم ساعه لازم ما تناشب مشعل على صغيره وكبيره خلاص هو بالنهايه بيوصلها لأهلها خلها على الاقل تعطيه الانطباع الزين عنها .. عشان ماياخذ فكره انها عنيده ورااسها يابس .. ولو تراه طيب المفروض تعامله احسن من جذي .. بس ماقدرت تنام شعور بالسعاده انها بتروح لأهلها وتفكيرها فيهم نساها النوم تبي تشوفهم بس موعارفه شلون راحت صوب الكاميرا وعادت الشريط لي النص .. وحطت على تصوير حديقه الفندق يوم لعبت كره قدم ويوم بطوا لها عينها .. قعدت تضحك على عمرها وهي معصبه حتى الولد اللي يصور من الخوف قام يهزّ الكاميرا .. وما تثبتت الصوره .. مالومه صراخها خرعهم هم متعودين على الهدوء .. وحطت على ميشوو وهي تلعب مع الفرنسي تقوله شسمك؟ مايرد عليها لانه موفاهم لها وتجي تطقه وتاخذ الطين اللي تلعب فيه اهي وياه وتحطه بوجهه لين بجى وهي تضحك تقوله ويك خواف .. اشتاقت ديمه لميشوو وشطانتها .. ودها بجمعت خوانها .. محمد على انه مرات يفرض شخصيته لكنها محتاجته الحين اكثر من أي وقت .. "انواروو ام السوالف والقرقه وينها ؟ اتركت فراغ .. يا الله وامي وحضنها وابوي وصوته اللي مالي علي المكان والله مافي شي يسواكم لو الف هالكون كله والمجرات اللي جنبها .. ماراح القى ربعكم .."
خلاص بعد ما روت عطش شوقها لهم من شوفتهم ولو انها ورى القزاز.. صكت الكاميرا وردت شحنتها .. وحطت راسها على السرير بس مانامت .. وصورة كل واحد من عايلتها ببالها .. " آآه يالخونه ليش تروحون وتخلوني !! "
بعد حوالي ساعه .. كانت ديمه لابسه وخالصه وماصدقت على الله عدت هالساعه البطيئه .. وهي مقرره انها تكون متسامحه مع مشعل باللي تقدرعليه دامها جم ساعه وتفكه منها .. راحت له الغرفه وطقت عليه .. واذته بالجرس .. لين بالاخير فتح لها الباب وهو لابس بجامته وشكله نايم حتى عيونه مو مبطلها كلها وشعره معتفس وجاي على وجهه واول مافتح الباب طالعها وفرك عيونه وابتسم
مشعل : سوري أخرتج ؟
ديمه تفشلت : لا اذا بتنام كمل نومتك بس مادري لانك قلتلي بعد ساعه بنروح قلت اقومك
مشعل : خلاص اوكي بلبس وبطلع انتي جهزي اغراضج
ديمه : ليش انت قلت بنتغدى
مشعل : بنتغدى وبنطلع سيدا على المترو
ديمه : اها اوكي
راحت ديمه لغرفتها وانصدمت من منظر الجياس المصففه اللحين وين اتحطهم؟ جنطتها هذي ماتكفي شي !
" ياربي شلون مافكرت فيهم !! "
وقعدت تحوس بالغرفه تدور على حل بس ماكو حل الجياس واجد والجنطه صغيره جدا ..
طلعت للمنقذ مشعل وطقت عليه الباب ..
مشعل : هاخير شفيج ؟
ديمه : الأغراض اللي شريتهم واجد والجنطه صغيره ماتكفي عندك جنطه فاضيه ؟
مشعل : جان دورتي بغرفتي اكيد بتلقين من هالجناط الرياضيه
ديمه : مادري وينهم
مشعل : اجل تعالي معاي
ورحوا غرفتها .. وهو لالحين مالبس عليه بجامته ودشوا الغرفه وراح فج الكبت من فوق وطلع جناطه اللي مفضيهم وعطاها جنطه رياضيه ..
ديمه : اللحين افضي الجياس فيهم والا ادخلهم مع الجياس
مشعل : شنو هنديه انتِ !! ههه لا اكيد فضيهم عشان يستوعبون اكثر
ديمه انحرجت : اوكي
وقعدت تفضي كل الجياس على الأرض وصارت حوسه ملالالابس وأغراض
مشعل طالعها بشفقه
مشعل : هذول كلهم بتسفطينهم ؟ يمديج ؟
ديمه : عاد الله والتسفيط اخذ وقط
مشعل : لا جذي ماراح تكفي والا اقولج انا بساعدج
ديمه : لالا ماله داعي
مشعل : انزين اسمعي ماله داعي نسفطهم انا بحطهم لج كلهم داخل الجنطه بطريقه زينه
ديمه : اوكي اذا تقدر نوفر وقت
مشعل : خلاص انتِ اخذي جنطتج الصغيره واخذي فوفو وانطريني باللوبي تحت انا بروح البس وبسوي الجنطه ..
ديمه : اوكي مشكور
غرفته وكمل لبسه وخلص وردّ غرفتها و هو يرتب الجنطه طاحت ايده على بلوزتها اللي شراها لها مغفله من محل الهدايا ..
" ياربي الحمدلله انها ماسفطتهم يلا تشوفها بالكويت احسن !"
واخذها ولفها مع باقي الملابس وبالاخير استوعبت الجنطة كل الاغراض وخذاها ونزل تحت .. لقاها قاعده تلعب فوفو .. وشكلها مستانسه
" مو بتردّ لأهلها هذا اللي تبيه .. وانا اللي باكلها وبنحرم من شوفتها .. الله يعين بس "
بالتاكسي مشعل قدام وديمه ورى السايق
مشعل : ها ديمه وين نروح ؟
ديمه : الصراحه مشتهيه لازانيا
مشعل : يمىى جنج حاسه فيني قلت اخاف زهقتي من مطاعم البيتزا
ديمه : لا بالعكس احلا شي هني البيتزا
مشعل : تمام
وكلم التاكسي يوديهم مطعم بيتزا على مستوى
وصلوا المطعم وهم داخل السياره شافت ديمه المطعم وانصدمت .. مثل ما انصدم مشعل
كانت في سطرت جلابه بوليسيه على الباب تقريبا خمس وحاطين لهم بوادي فيها اكل وياكلون .. ومربوطين بسلاسل ..
ديمه : ان شاء الله بتدخلني هالمطعم ؟
مشعل : ههه في احلى من هالمطعم جلابه بوليسيه تنطرج عند الباب ونِعمَ الاستقباال
ديمه : لالا الله يخيلك خله يحرك
مشعل : ديمه صلي على النبي اقري الافته ممنوع اصحاب الكِلاب.. يعني هم رابطينهم برى لانهم مايقدرون يدشون فيهم
ديمه : بس انت ليش ماتحس فيني ماقدر والله ماقدر امرّ صوبهم اموت من الخوف
مشعل : انزين ليش منفعله ولايهمج نغير المطعم
ديمه : سوري بس صج ماقدر
مشعل : حصل خير
وطلعوا وراحوا مطعم احلى من الاول ..
ديمه : انّزل الجناط ؟
مشعل : بتفضحينا
ديمه : اخليهم بالتاكسي
مشعل : لا مشكله انه بيروح خلاص اوكي خلنا ننزلهم
ديمه :عادي نخشهم تحت الطاوله
مشعل : عشان يجكون فينا يقولون هذول اكيد مخدرات ههه
ديمه : الله وناسه ويقطونك بالسجن
مشعل : لاولله وإنتِ معاي بعد
ديمه : لالا انا مالي دخل بقولهم هذي جنطته
مشعل : اياالخيانه
ديمه : ههه ان كيدهن عظيم
وقعدوا بالطاوله مشعل ماسك جنطه حطها وراح شوي وردّ وديمه ماسكه جنطتها الصغيره مع فوفو
مشعل : ترى طلبت لج
ديمه : ليش تو الناس ماشفت المنيو ؟
مشعل : ادري شتطلبين لازانيا من زود الثقافه بتقرين المنيو بالفرنسي !
ديمه : ههه
وقبل لا يوصل الطلب زهقوا من السكوت
ديمه : قولي عنك انت وعمي مبارك قبل وين كنتوا تطلعون وشتسوون ؟
مشعل : ديمه ليش تحبين تعيشين بالماضي ؟ ترى اللي يعيش الماضي ومتمسك فيه عمره ماراح يعدي الحاضر عشان يوصل للمستقبل
ديمه : بس الماضي يعني لي كل شي .. كفايه اني لا تضايقت فجيت ارشيف ذكرياتي وتذكرت احلاها .. عشان اصبر نفسي ..
مشعل : بس هذا مو حل للي انتِ فيه اللحين انتِ تبين تطلعين من ازمتج اللي تمرين فيها المفروض تقطعين شي اسمه عمج مبارك وساره خلاص لازم تنسينهم واذا ماقدرتي متى ما طروا على بالج لهّي عمرج بأي شي ..
ديمه : بس هم كانوا شي سعيد بحياتي ليش تبيني انساهم ؟ دامني انحرمت من شوفتهم مابي انحرم من ذكراهم
مشعل : انتِ مؤمنه بقضاء الله وقدره وتدرين ان هذي سنه الحياه ناس تنولد وناس تموت .. وكلنا بالاخير مندفنين بالتراب ليش انعذب روحنا بروحنا واحنا بإيدنا العلاج ؟
ديمه : بإيدنا ؟
مشعل : أي طبعا شوفي ربي قال بكتابه " إن الله لا يغير ما بقوم حتى يغيروا ما بأنفسهم" صدق الله العظيم
يعني الشي اذا انتِ من داخلج غيرتيه ربي بيساعدج وتتخطين هالمشكله .. واذا انتِ عبالج ان عمج مبارك هو الوحيد اللي يطلعج من ازمتج فأنتِ غلطانه امس طلعج عمج اليوم منو بيطلعج ؟ كوني على ثقه انج مو وحيده دام عندج رب فوقج .. معاج بكل وقت .. تقربي منه وهو خير معين
ديمه : كلامك يطمن .. وانا بسوي اللي تقولي عليه وربك كريم
مشعل : نبيج ديمه القويه .. مانبي أي شي يهزجّ
ديمه : تطمن ربي معاي
مشعل : والنعم بالله
جاهم الطلب حارّ وخلوه يبرد الا يرنّ التلفون
مشعل شاف الرقم الا نفس الرقم اللي كلمه منه بومحمد
مشعل : ابوج
ديمه بفرحه : احلف
اشر له انها توطي صوتها بيتكلم
مشعل : الو هلالالالا والله بومحمد
بومحمد : هلالالا فيك ها شخباركم ؟
مشعل : ابد بخير الله يسلمك انتوا شلونكم ؟
بومحمد : اسكت بس تهاوشت مع الفندق
مشعل : افا ليش ؟
بومحمد : رحت اشتكيت على المترجمه مالتهم وهم واقفين معاها وتبي الصراحه انا اصلا بغير الفندق كفايه دقتهم فيني بباريس حجزت اسبوعين بعد اسبوع قالوا خلص الحجز واللحين نفس فندقهم بروما وهقوني مع المترجمه !! مالي قعده عندهم انا اللي يمشي معاي مضبوط امشي معاه سيدا ..
مشعل : والعمل ؟
بومحمد : بروح ادور لي فندق ثاني مالي قعده بهالفندق ولا يوم
مشعل : شلون اللحين احنا بنجيكم اليوم
بومحمد : لالا خلني ادور لي فندق واستقر بعدين تعالوا .. اليوم بسكن بفندق ثاني بس المهم ديمه تقدر تمددلها يوم واحد
مشعل : ها اي عادي
بومحمد : خلاص زين هي وينها اللحين بكلمها
مشعل : اوكي اخذها
خذت ديمه السماعه بسرعه
ديمه : هلالالالالا يبى بعد عمري
بومحمد : هلالالالالالالالا فيج د

يلا ابغى اشوف ردوود حلوه