رسالة عتب للزوج آآآه ابغى افضفض

1. السلام عليكم يابنات كيفكم

السلام عليكم يابنات كيفكم

صراحه حاسه عندي كلام كثير مو قادره اعبر عن اللي في خاطري جيتكم اكتب مشكلتي وافضفضلكم واقول اللي بي خاطري وكلي رجاء تساعدوني وماحد يبخل علي بمشوره او كلمه حلوه يمكن يكون كلامي كثير بس والله من اللي في خاطري فقرأوها كامله......
مشكلتي تكمن مع زوجي الله المستعان(مشكلة الرجال مشكله مسوين لنا زحمه في حياتنا)زوجي انسان طيب وحبوب ومو مقصر معاي طبعا عشنا في بداية زواجنا فتره مره حلوه ....وصراحه انا جدا رومانسيه وعندي الأمور الحسيه والمعنويه اهم من الماديه فطبعا طفشته حفلات رومانسيه وهدايا وكلام حلو ماخليت شيء على قلبي الا وسويته ولا كلمه في قاموس الحب الا وقلتها لكن كنت اعاني من ردة فعله مع اي شيء اسويه...........زوجي انسان تقدرون تقولون بخيل بكل ماتعنيه الكلمه من معنى في التعبير عن حبه لي على قد مااسوي له من اشياء انصدم من ردة فعله البارده معاي بالرغم اني متأكده من حبه بس مااعرف ليش هو كذا.....طبعا لاتقولون كل الرجال كذا لأن زوجي حاله غير هو بزياده شويه........طبعا في البدايه صبرت وطنشت وقلت يابنت مع الوقت بيتغير الرجال وبيصير معاي احسن ماانكر انه ماتغير بس حاجه لاتذكر .......المهم حملت وبعد الولاده تعرفون من الشهور الأخير لحملي ومع فترة النفاس وكمان بعدها تقريبا شهر عند اهلي لظروف عمل زوجي....ولمن رجعت لزوجي ......رجع الرجال اسواء من قبل
صار جدا جاف وبارد في تصرفاته والله يابنات انه ماقدسمعت منه كلمه حلوه ........باختصار
لاكلام حلو ...ولا حتى بوسه.......ولا حضن....ولا يعبر مجرد تعبير عن حبه لي... حتى في علاقتنا الخاصه مجرد انه يخلص وخلاص انتهى كل شيء معاها ....صبرت وكلمته قال طيب صار يبوسني اذا طلبته تخيلو غير كذا لا.....ولا يقول كلام حلو الا اذا عاتبته .....مهما اسوي مااسمع منه كلمة شكر او حتى يعطيني دفعه معنويه وايجايبه اني اسوي معاه اكثر ..هو يعتقد انه اذا ماقصر علي ماديا وخلاني اروح عند اهلي وازور صحباتي باكون مبسوطه انا ماانكر انو هذه الأمور مهمه في حياتنا لكن كمان انامحتاجه امور معنويه وحسيه ........محتاجه كلمه حلوه وابغى احس بقيمتي عنده......والله اني تغيرت معاه 180درجه صرت اعامله بالمثل مااقول كلام حلو ولا اشكره على حاجه هو سواها معاي زي مايسوي معاي قلت يمكن يحس شويه مافايده وطفشت وانا اتكلم واصارحه صايره احس ان اشحت منه الكلام شحاته والله حتى اذا قالي بعدها كلام حلو مااتقبله لأني حاسه انه بس يبغى يبين لي انو شوفيني قلت كلام حلو ابغى الشيء يطلع من خاطره............عشان كذا قررت ارسله رساله عتب واقوله فيها انو زي ماانا محتاجه لأشياء ماديه كمان الأمور المعنويه والحسيه عندي اهم من كل شيء ولا لا يابنات..........والله لو تعيشي مع زوجك في خيمه اذا حسسك بانوثتك واسعدك وعرف قيمتك تحسي انك ملكتي الدنيا ومافيها على قول المثل(زوج الغنى يغنيك لو كان في القبر وزوج الفنى يفنيك لو كان في قصر)
وانا فاشله في التعبير فطلبتكم بالله عليكم واستحلفكم بالله انكم تساعدوني اكتبله رساله ابغى اي وحده شاطره في التعبير تكتب لي رسالة عتب قويه اشرح فيها لزوجي اللي ان ابغاه بدون مااواجه فساعدوني الله يسعدكم
انا عرافه اني طولت في الكلام لكن حسيت اني ابغى اففضفض لأحد واشرح مشكلتي واتمنى ماتردوني خايبه.......او على الأقل ارفعوا الموضوع .