زوجك عصبيتعالي

زوجك عصبي؟تعالي
كيف تعرف الزوجه ان زوجها عصبي
اختي الزوجه
اول ماربنا يفتح عليك و يوفقك وتحصلين زوج لازم تعاملينه على انه
عصبي
وبما انه عصبي فلا تحاولين تورينه بأي حاجه حمرا لانه يزعل ويتشنج ويعصب
والحاجات الحمرا كثيره
الغضب لونه احمر
الكبر لونه احمر
العناد لونه احمر
امدلع امزايد لونه احمر
حاجات باسل لونها احمر فلا تورينه بها
و خذي هاذي النصايح من ميم وان حذفوها هنا شتلقينها في كتابي
اللي شينزل السوق بعنوان ( نصائح ميم لكل الحريم )
مترجي بس لموافقة وزارة الأعلام وانزل الكتاب ان شاء الله
هاذي هي النصايح
1- حاولي تملين بطنه و تطبخين له كل يوم اكله جديده
اشتري كتب طبخ
2- اذا دخل امبيت ابتسمي في وجهه وقولي له هلا بالطيب الغالي
حتى لو كان مهو لا طيب ولا غالي بس لازم تجاملين وتمشين امورك
3- اذا رجع من عمله لا تقابلينه بثياب امطبخ وريحتك بصل
اذا ماقدرتن تغيرين ملابس امطبخ و ريحة امبصل فلا تقابلينه
كبيه
هو شيروح غرفته ومهو مدور لك لأن معاه امطفحه منك
أي أي
كل يوم يقابلك وريحتك بصل وثوبك ملطخ با امصلصه
اتقي الله في نفسك ذي ماعادها عيشه ذي
4- دلعيه
قولي له يابعلي و انتبهي تغلطين و تحطين بدل العين غين وتقولين له
يا بغلي
في ذمتي لو تقولين له يا بغلي يطلقك ذيك الساعه ويكون ميم السبب
5- لا تكثرين عليه الطلبات
واذا كان مثلن تبغين فستان لا تقولين له ابغى فستان
قولي له زميلتي اشترن فستان يجنن وتقول ماباقي مثله في المحل الا فستان واحد بس وقولي لو معايه فلوس كان اشتريته
زوجك حين تقولين له كذا شيأخذ المسأله تحدي ويقول في نفسه كيف زوج زميلتها اشترالها فستان وانا ما اشتري لحرمتي
ليش هو احسن مني
ودقايق وتلقينه يسألك عن مواصفات الفستان وعنوان المحل اللي يبيعه
6- تصلحي له
تمكيجي وتعطري وسمعيه كلام حالي سوي هذا كله لأنه زوجك وهذا حق من حقوقه عليك لكن انتبهي
لا تخلين طلباتك في الوقت اللي انتن متصلحاله و متمكيجه لانه
سيحس انك تضغطين عليه
انتهن ام نصايح
واذا سويتن هاذي النصايح كلها و اكتشفتن ان زوجك ما أثر فيه هذا كله
و دايمن غضبان ومتنعطط لا يعجبه العجب ولا الصيام في رجب ولا تغيرن معاملته معك فاعرفي ان زوجك عصبي درجه اولى
لازم تورينه العين الحمرا
لا عاد تطبخين له
ولا تدلعينه
و لاتتصلحين له
ولا تسمعينه كلام حالي
نكدي عليه عيشته
وريه نجوم الظهر
استمري كذا لمدة اسبوع وستلقين انه تغير
لانه كان في نعمه و نعيم وماقددر الشئ هذا ولا حفظ النعمه وصانها
و ذحين حين يحس بالنقمه و الجحيم سيبدء يغير نفسه
اسمعي كلامي واتبعي نصايحي واذا تطلقتن فانا مانا مسئول سيدي لاتهب لي مصايب انا قلت لك وعقلك في راسك
خلفنا العافيه والله يسعدك--------------------------------------------------------------------------------