زوجي وحيد أهله طيب ليه يظلمني معه تكفون ابي حل

السلام عليكم ورحمة الله وبركاته
ماأدري كيف ابدأ؟
وما أدري اذا أنا على حق والا لا؟
مثل مافهمتو من الموضوع اني تزوجت من6شهور تقريبآ بواحد هو وحيد أهله
وطبعاً كنت عارفه هالشي قبل الزواج.
صراحه زوجي يحبني مره ويحب أهله ومايقصر معنا بشي ابداً
ومسوي شقه صغيره عند اهله غرفه وصاله ومطبخ ودورة مياة وانتم بكرامه
ومفتوحه الشقه على بيتهم
ولها باب خارجي خاص
بداية الزواج كان الامر عادي عندي وكان يسألني بشكل يومي اذا انا مرتاحه والا لا عشان وضعنا بالنسبه للبيت
واقول عادي مرتاحه لكن بديت اتضايق صراحه
والسبب هو الله يهديه ولا يحس بهالشي هذا
اول شي كل يوم يقولي تعالي نروح عندهم ولا أقدر اقول لا
قهوه وعشاء وكل وقت.. الى درجه اني اسهر عندهم وهو معي..
واذا قلت ماابي اروح اليوم قال انتي ماتبين اهلي وتقولين كذا عشان افهمها واجلس عندي لاتروح
وانا ماقصدي كذا:00015: ماودي يتعود اني اروح لهم دائماً بس الظاهر اني عودته وخلاص
وثاني شي صار اذا راح لهم محتاج شي.. يخلي بيبان الشقه مفتوحه لدرجه اني ماعاد آخذ راحتي باللبس اذا بغيت اطلع من غرفتي اشوف اذا الباب مفتوح والا لا:(
وثالث شي صار اذا شاف احد جالس هناك مثل امه والا ابوه قال تعالو عندي ونفس الشي صرت اذا صحيت من النوم اشوف اذا بالصاله احد عشان اقدر اطلع اذا كنت لابسه شي مو ساتر والا ضيق
ومره كنا جالسين بالصاله وراح لاهله وشوي دخل وفتح الباب على الآخر اللي بينا وبينهم قلت ليه فتحته
قال ابوي بيجي :(
وكنت وقتها لابسه لبس استحي احد يشوفني فيه:
جيت نقزت بسرعه قلت ليه ماتكلمت طيب وماأمداني ادخل غرفتي الا ابوه داخل
لو كنت جالسه طيب
والله نص ملابسي اللي كنت شاريتها قبل الزواج مالبستها لان الفرصه ماجت ابد ولا اقدر البسها
وحتى يروح ينادي امه تعالي اجلسي معنا ولا يقولي قبل على الاقل عطني خبر بس :(
والشي الرابع ومو الأخير طبعاً :smilies_093: عيال اخته الصغار يدخلون البيت يحوسون ويخربون ويطلعون وامهم مستحيل تشيل شي بعدهم :(
خامساً اذا كان يبي يبوسني والا يضمني بالصاله نشوف الباب لا احد يدخل والا نقفله عشان نتأكد ان محد يدخل .. بالله هذي حياة ناس توهم متزوجين؟! :(
مايسوي كذا الا اللي عندهم عيال يخافون يشوفونهم مو توهم متزوجين ماكملو سنه
سادساً كان زوجي مسافر يومين ويوم كان بالطريق بيجي رحت اتجهز واجهز البيت وقالت امه ترا تتعشون معنا :( المهم قلت يالله معليش ولدهم وبيشوفونه المهم يوم قربت وقت جيته جت عندي وجلست هي وبنتها :
جاء ودخل وسلم عليهم وانا صافحني وقعد يسأل عن الاخبار وانا متضايقه مره مره مره
ومره جته رحلة عمل وقال تعالو معي وطبعا انا بروح لكن لزم عليهم يروحون والحمدلله ماطاعو وكل شوي وحنا مسافرين يدق عليهم ويقول تعالو
والله ماحسيت اني متزوجه ومستقله الا بسفرتي اول زواجي وسفرتي يوم سافر لشغله
وبقولكم شي امه طيبه مره مره مره وحبوبه وتحبني الحمدلله وحنونه وعلى نياتها
وانا احبها بس اتضايق من تصرفاتهم
انا تعبت من هالحاله وتضايقت مره واذا جو والا رحت لهم غصب عني مااتكلم وبس ساكته من الضيقه اللي فيني.. ويقولي ليه انتي بس ساكته وماتتكلمين ولا تسولفين ولا ادري وش اقوله :(
ودي يكون لي بيت لحالي مستقله فيه مملكه خاصه: آخذ راحتي فيه احس بإستقرار
تكفون عطوني حل ماودي حياتي تصير كذا وانا توني ماكملت سنه ودي اسوي شي يرضي كل الاطراف ولا تصير مشاكل وعلى فكره فيه اشياء كثيره صارت بعد ضايقتني لكن هذا اللي من جد ماتحملته
انتظركم بفارغ الصبر