زوجي و زووجي قرفتوني

1. انا بقولكم القصة عاد و انتو احكموا

السلام عليكم
اليوم جايتكم و انا مصدومة من بعض الناس
يعني انا مني فاهمة ليش بيعملو كدا او ليش بيتصرفو بدي الطريقة و ربي مني عارفة

انا بقولكم القصة عاد و انتو احكموا

انا عندي خالتين اتزوجت قبلهم وحدة عمرها الان 35 و الثانية 27 بس حاليا متزوجين الكبيرة اتزوجت بعدي ب شهرين اما الثانية مالها شهرين و شوية متزوجة و عندي كمان وحدة من صحباتي اتزوجت من 6 اشهر طبعا كولهم متزوجين عن حب الا انا و الحمدلله اني كدا
اللي صاير تجيني كل وحدة فيهم تمدحلي زوجها عندي يعني مثلا خالتي الكبيرة تجيني و تقولي زوجي يموت فيا و لو انا موية بيده ما انكب و هو زي الخاتم باصباعي و ممشيته هو و اهله على كيفي انا عاد لا تعليق غير الله يخليكم لبعض و لا يغير عليكم الا باحسن حال
تجيني الصغيرة زوجي غير وظيفته و راح اشتغل بالخطوط و راتبه الان 12 الف قلت ما شاء الله عالبركة طبعا يا بنات هو دوبه متوظف يعني ماله خبرة انا سكت و مرة جاتني من نفسها قالتلي زوجي هيسافر و يبغاني اسافر معاه و تعرفو عاد حركات التفخيم و التضخيم هما كانو وقتها مملكين قلتلها قوليلو الجاي ان شاء الله اكثر مو مشكلة طبعا فهمتنا كولنا انه مسافر عشان دورة لمصر وقت اجازة عيد الفطر و انه هيرجع ليلة دوامات الحكومة انا نوو كومنت
تجيني صحبتي زوجي و زوجي و يحبني و يموت فيا و هاتك مدح فيه و انه مو مقصر عليها بشي و و و و الخ و انا نفس الرد الله يباركلك فيه و لا يغير عليكم الا باحسن حال
طبعا انا على نياتي و لا ادور و لا شي لانه ما همني و على بالي الناس كلها صادقة بس كنت اؤمن بان اللي تتكلم معناته عندها نقص و بتعوضه بالكلام
اللي صار من كم شهر عرفت انه خالتي الكبيرة الحمدلله الذي عافانا زوجها مبهدلها بحياتها و شكاك و يخونها و انه كل شي عليها و اهله ما يحترموها
خالتي الصغيرة زوجها طلع راتبه لا 12و لا نيله راتبه ما يتعدى ال7 الاف و برضو نعمة من الله و طلعت سفرته لمصر وناسة مع اصحابه يعني لا دورة و لا هم
صحبتي الان ما شاء الله حامل ب 4 اشهر زوجها مطلعلها عينها هي الاخرى تقوله ملابسي ضاقت اشتريلي ملابس جديدة يقولها محد ضربك على يدك و قالك احملي و ماخد اجازة من العمل تقوله وديني الجامعة و جيبني يقولها انا ما اخدت اجازة من العمل عشان اوديكي و اجيبك و غيرها من المواقف
مو بس دول غيرهم كثير بحياتي مع انه و الله يا بنات اني ما اتكلم عن زوجي لا بالطيب و لا بالبطال يعني هم لمن يتكلمو عن ازواجهم انا اسكت ما اقول زوجي و يسويلي و يعملي اسكت مع انه راتبه على قد الحال يعني 5 الاف الحمدلله و معيشتنا مستورين و الحمدلله و لاني ماخدته عن حب بس الكل بيشهدله انه انسان نظيف ما شاء الله يعني ماله بحركات الشباب علما اننا اتزوجنا و اعمارنا انا 20 و هو 21 يعني صغار
انا اللي ابغى افهمه ليش دا كله؟؟ ليش الكدب اللي ماله داعي ؟؟ يعني كل وحدة عندها مشاكل مع زوجها و انا كمان بس خلاص ما اتكلم لانه ماله داعي غير كدا خالتي الكبيرة تقولي انتي مسكينة احنا اتزوجنا عن حب الا انتي قلتلها لو اتزوجت عن حب ما كنت هكون كدا مرتاحة هتقولولي ليش قلتي كدا هقولكم لانها قرفتني بالكلمة دي كل ما تشوفني تقولها حتى يوم ملكة الصغيرة هرتني اختي اتزوجت الي تحبه اختي اتزوجت اللي تحبه و اما خالتي الصغيرة اول زواجي حاولت جاهدة انها تسويلي مشاكل بحيث اني اتطلق والله يا بنات شوهتلي سمعتي عند الله و خلقه لكن الدنيا دوارة واني ادعي عليها ليل نهار تخيلو يوم زواجي صحباتي ما يعرفو خالاتي قالولي دول ايش بهم بيطالعوكي كدا هم كانو حاطين عينهم عالعريس و انتي اخدتيه قلتلهم لا دول للاسف خالاتي صحباتي كدا صارو شفتو لاي درجة ؟؟!!
بالله قولولي دي كلها غيرة؟؟ طيب و ليش؟؟!! زوجي لاهو مهندس زي زوج الصغيرة و لا راتبه 8 الاف زي زوج الكبيرة و لا كل اجازة بيسفرني زي زوج صحبتي يعني حرام وقت ما يكون عنده بيسفرني و لا يقولي شي انا قلت يمكن مفتقدين الراحة النفسية يمكن ازواجهم بيعاملوهم عدل قدامنا و من ورانا مطلعين عينهم؟؟ انا مني عارفة
قولولي انتو ايش رايكم؟؟ لانه بجد نفسي افهم النفسية دي !!