زوج بالريموت

1. مساء الخير على الجميع ... شخبطة قلم مني فأعذروني والسموحة ....

مساء الخير على الجميع ... شخبطة قلم مني فأعذروني والسموحة ....

وراح أكتب عن الزوج العجاز والعيار اللي لسانه مالي البيت بصراخه هذا هو ولد أمه ويبي يثبت وجوده على هالضعيفة زوجتة بس وش تقولون زوج بطولة لسان ونفخة كذابة وشوفيني أنا أقوى منك ها لا أخربها وأوديك عند أمك هع هع هع هذه النوعية موجودة وسيطرة وفشخرة ماتكون الا في البيت ....
يعني طلباتة بالريموت كنترول يوجه صوب زوجتة وكأنها مبرمجة على طلباتة والمفترض هو يعملها ولكن نظرته كون الزوجة هي اللي تسمع أوامر حضرته وتنفذها والزوجة اللي ماتسمع الكلام يكون شغلها عندي هع هع هع يعني
( أسداً علي عامة ) !!!!..
واذا قالت الزوجة لا ... لأنها ملت من هالزوج تصرفه يدل على دلع بايخ واللي يشبه طفل مدلل عطوني حلاوة والا بازعل واو على الزوج العجاز !!!!!!
ياويلها من لسانه وتبدأ اللعانة منه ويمسك عليها كل صغيرة وكبيرة ويحرمها من كل شيء ...
ويكبر السالفة على أشياء المفترض أنها عادية لكن وش تقولون زوج عجاز درجة أولى ...

• اذا الزوجة حضرت الغداء وجابته وقعدوا على السفرة كلههم وشاف الشطة مو موجودة قومي ياحرمة جيبي الشطة وحالف أنه مايتغدى الا والشطة على غداه شوفوا الدلع والطناخة يابشر !!!
• اذا الزوجة نست تكوي له الشماغ بدون مرزام قال له يالله روحي وخلي شغل العبط واكوي الشماغ وخليه بدون ما ني بقايلك البسه بدون مرزام يالفاهية .....؟؟؟
• الزوج يطلع قبل زوجتة وعياله ويوصيها أنها تسكر الأبواب كلها ولا تنسى اللمبات زوج عجاز ولا بعد ويطلب من زوجتة تقفيل باب الشقة زين عشان مايجي حرامي

( هذا زوج والا طفل ياناس ) !!

• الزوجة تتعب وتطبخ وتنفخ أكله وهو جالس قدام التلفزيون ويطلب شاهي وقهوة بسرعة وبصوت على زوجتة مثل الطفل يالله ياحرمة والله لو أني طلبت من الجيران كان اللحين متقهوي وفاله وبتبجح يقولها

( مثل هالزوج تلقاه بطنه حار ولا عنده بأي كلمة المهم السرعة وكأن زوجتة آله اشتراها )

• الزوجة تقول لزوجها اليوم أخوي بيتملك وأبي أروح أجيب له صواني حلا قهوة وقاتوه .. بسخرية الزوج وليه صلحي له كل هذا والله لو أن أخوك أمير أقول لايكثر صلحي له تمرية وكيك وخلية نحل ويخب عليه ياليته يسكت وبس ..رهؤ

( ما عنده المهم أن زوجتة توفر له ولا يراعي شعور زوجته وهي بتتجمل بأخوها )

• الزوج وزوجتة مالهم الا دقايق وهم راجعين من مشوار طويل يطلب بكل وقاحة عشاء ثقيل و يتشرط صينية بشّمل أو سليق ( يعني الزوج العجاز ماسمع بفطاير أو بيتزا أو ساندوتشات خفيفة)
• الزوجة تغسل هدوم زوجها وهادها التعب يقول بكل غرور تراك مهملتني ولا عاد تهتمين فيني يالله أقول الغرفة تراني واصل حدي ( الزوج رومانسيته ماتجي الا مع ريحة الصابون والكلوركس الملون )
• الزوجة محضر لزوجها سهرة خاصّة عشاء وانوار خافتة ومنومة العيال مخليها ليلتة مميزة عشان يحس على دمه ويلتفت لها ويدخل البيت وبكل برود وش السالفة متعبها حالك ومخسرا نفسك هذا المسلاسلات وخرابيطها أقول ولعي النور وخلينا وش حطيتي عشاء !!!
• الزوجة والزوج مسيرين على أهله وينزل ويدخل بيتهم عنده أمه ويصيح قدام أهله فلانة نزلي معك الشناط ولاتنسين تدخلين البزارين ( يعني أسمعوا شوفوني ممشيها على كيفي وتسمع كلامي ) !!!
• الزوجة تقول لزوجها خلينا نروح في مول توه جديد خلينا نتمشى الزوج وبكل لعانة ليش اليوم جدولي مزحوم مرة خليها لين تهجد الدعوة ونروح يوم سبت أو أثنين عشان مافيه أحد كلاً لاهي
• الزوج في عزايم أهله وربعه وأقاربه أول من يحضر ويلزم على حرمتة أنها تجهز من الصبح واذا صارت العزيمة أو المناسبة لأهل زوجتة أو أحد أقاربها ماراح الا ونفسه في خشمه ولا يوصل الا آخر الناس لا وبعد ساعة يتصل ويقول لزوجتة (( الله الله من زار وخفف )) وهو في عزايمهم يقعد آخر الناس ولا يسري الا والصبح طلع .
• زوجتة تطلب طلبات عادية بهدوء ودلع ويستلعن ويأجل معها ..
• وهو اذا طلب أو أمر وزوجتة كانت مشغولة أو شيء في نفسها قلب الدعوة زعاق وصراخ ...

حبايبي هذا الزوج العجاز والعيار ولد أمه وما يهمه تعب زوجة أو حب زوجة المهم يمشي رأيه ويا ويل ويله اللي يكسر كلامه .. والله يعين الزوجة معه
منقول