زوج يشتكي من زوجته ادخلي وخذي عبره

ياعالم قسم راحت حياتي أوراق صغيرة ..
جيوبي مليانة .. كل ظهرية و بعد صلاة العشاء
طيب يا زوجتي العزيزة
فيه شيء اسمه دمج .. رئاسة تعليم البنات بكبرها دمجوها ..
ما تدمجين أنتِ ورقة مقاضي الظهر مع ورقة مقاضي الليل و نفتك من هالقلق اليومي ..
المشكلة وشي ؟ المشكلة إني أقرأ طلبات ما لها داع
بس مجبور أجيبها :دراق / طماط/بقسماط/ برغل /
و آخرتها ما نلقى على السفرة إلا كبسة و إن سوينا نفوسنا كنديين حطينا فجل !
ههه طيب هالبقسماط والصولجان و بقية الأسامي الصعبة لمن؟
طبعاً لأخواتك إذا جاؤوا يوم الربوع و أنا ياغافل لك الله !
طقني الجوع مع أبو شايع و أبوعبدالله و إن سوينا فيها فجور و كاش
أرسلنا حنيف يجيب بروستد و تهاوشنا على الثوم ههه
و المدام مع أخواتها يتنعمون من خيري و من تعبي و مطامري في البقالة مع ورقة المقاضي !
مرة سويت فيها ذكي ، و بعد ما قضيت لزوجتي يوم الربوع قلت بروح للشباب ..
و أطب على المدام بدري و أحصل أخواتها عندها و توهم حاطين العشاء ...
و تصير الكارثة
أخيرا شفت ورقة المقاضي صدق ..
لقيتهم حاطين سفرة بدايتها في المقلط و نهايتها عند ساكو اللي وراء حلبان
إلى درجة أنهن حاطين سيكل جنب السفرة علشان إذا واحدة بغت صحن من طرف السفرة يمديها تجيبه
و ألقى لوحة مكتوب عليها ( السلطة 60 كلم ) ههه
المشكله إن زوجتي تعاملني على أني ابلة تدبير ، و عندي خبرة ،
و أنا و الله ما أفرق بين الملوخية و الكزبرة
تقوم تكتب لي مرة في الورقة كيلو كنافة كذابة ههه
( قسم تروعت وش ذا الكنافة الكذابه ؟ )
أنا أعرف الصادقة يوم أعرف الكذابة ؟
وأروح البقالة ما لقيتها
اتصلت بصديق قال : رح لمحل حلويات ..
و أروح وأنسى اسمها واقول لراعي المحل : عطني كنافة نصابة
ههه ناظرني باحتقار
و أعطاني أشكل بدل ما يعطيني كنافه
في الأخير رحت عنده و قلت يا أخي معليش أنا نسيت اسمها
بس إنها كنافة ما هيب مضبوطة يعني كنافة كافرة و بتروح النار.
ضحك قال : قصدك كنافة كذابة ؟ قلت : إيه هي أبي منها كيلو ..
زحمة و كنافة كذابة و آخرتها قطعة خبز..لاعبين علينا و حاطين عليها شيرة
ههه
و كله كوم و يوم أخذت أختي في المدرسة طريقة عمل المكرونة بالبشاميل ،
سرى يومنا ما غير نأكلها إلى درجة أن أبوي أضافها في دفتر العائلة
لأنها صارت جزء من العائلة و واحدة منا .
الله يحفظ الوالدة ..
ورقة المقاضي حقتها ما تتغير علشان كذا ما نرميها أنا حاطها في المفضلة
لأنها هي نفس الطلبات كل يوم بصل/ طماط/ رز/دجاج/خبز/
و إذا بغت تسوي نفسها كيوت استبدلت البصل بثوم
و إذا ملينا و بغت تجدد فيها حطت الرز قبل البصل و الخبز قبل الطماط
و الله إني عشت عمري كله و أنا نفسي آكل شيء جديد
و خاصةً ذا اللي يقولون عنه أومليت إلى درجة إني سكنت في فندق مرة علشان لقيت في القائمة أومليت ما دريت إنه بيض ..
المشكلة ما عندهم رحمة ..
درجة الحرارة في عز الصيف ألف و أنت تطامر من محل إلى محل ،
و بمعية سموك ورقة المقاضي
لو تجيب العثيم كله و تنسى شيء بسيط قامت القيامة ،
و لازم ترجع و أنت أصلاً شرير و لا عمرنا شفنا منك شيء يا بخيل ..
و يا عيني على استخدام التقنية ..
ورقة المقاضي صارت من العصر الحجري الحين تجيك المقاضي مسج على الجوال
و الله إني أبغى أصيح إذا قريت رسايل جوالي
و رسايل جوال أخوياي العزوبية ..
كل رسايلهم ( عندما تشرق شمس يوم جديد أذكرك .. )
( كفاني أن جنح الليل يغشاني و يغشاك .. )
( الله على الجمس لولا وراد الستين ) ههه
و أ نا تعال شف رسايلي ( حليب سريلاك .. ) ( ارجع بدري نبي موية )
( و أنت جاي جب أعواد اسنا ن ) أعواد أسنان في نص الليل
الله من الأعذار بس!
و ما قطع قلبي و نكد علي حياتي إلا إذا طلبوا تسالي ..
تجيب برنقلز قالوا نبي جحا .. تجيب بنكهة الكاتشب قالوا نبي بالخل و الليمون ..
تجيب رقاق الوردة قالوا نبي رقاق غوار ..
تجيب صلصة قالوا نبي ماجي ..
بس خل عنك و الله صار عندي خبرة و لا خبرة رابحة
وأنا و الله من أول كنت أحسب البندورة هي البطاطس ههه
مناسبة هالموضوع إني رحت اليوم بعد صلاة الجمعة
و معي كالعاده رفيقة دربي ورقة المقاضي طولها حوالي 7.12 متر و يوم دخلت العثيم
و ألقى زحمة و أنا اللي تصعب علي نفسي و أتمرد و أشق ورقة المقاضي
و أرسل للمدام رسالة أقول لها إني تمردت و قطعت الورقة ...
جزاها الله خيرا تفهمت الموضوع بشكل حضاري