ساعدوني اتعبني الحب

متضايقه واحس الدنيا ضاقت علي اكثر ، احس نظرتي للدنيا تغيرت واحس الفرح بقلبي انسى ، احس بوحده احس بفراغ ابيكم تساعدوني يمكن ارتاح ...
انا بنت حالي حال هالبنات لي قلب ولي مشاعر ووقت الفراغ كان كبير و مادري شنو اسوي عشان اشغل نفسي ، ادمنت الانترنت و بالاخص برامج الدردشه والماسنجر بس مع هذا كانت عندي مباديء وافكار خليجيه تمنعني من اني افكر بعلاقة مع شاب اكثر من الانترنت ،و تعرفت على شاب طيب و حبوب ومحترم جدا كنت اعتبره مثل اخوي عمره ما قالي كلمه تضايقني او زعلني حسيته توأم روحي كان يفهمني بدون ما اتكلم يعرف متى اكون مستانسه ومتى اكون زعلانه وكان اكثر شخص يعرف يطيب خاطري واكثر ما عجبني فيه انه ما عمره قالي ابي اكلمج بره النت بالعكس كان خلوق عالاخر معاي ، استمرت علاقتنا بالنت فتره وحسيت نفسي متعلقه فيه و اقعد بالساعات انطره بس عشان يشبك واكلمه بدون ما استوعب اني حبيته ، اصلا كنت مفكره اني مستحيل احب شخص ما شفته ولا عرفته غير عبر شاشه كمبيوتر ، المهم بعد فتره اكتشفت اني حبيته وكنت خايفه من نفسي خايفه اذا قلتله يكون مو مهتم فيني وخايفه ما اقوله واظل حاسه بهالشعور طول عمري ، المهم طلب مني اكلمه بالتلفون وكنت متردده وخايفه بس ماقدرت ارد له طلب خصوصا اني كنت متعلقه فيه حيل واهو بعد كان مهتم فيني وايد ، ظلت علاقتنا بالتلفون وتعلقنا ببعض اكثر لما شفنا بعضنا ، كنت احبه بجنون وكان يقول انه يحبني بس الشك ذبحني لسبب غريب ما كنت اصدقه واستمرينا على هالحال سنه ، بعدها الولد تغير و صار يطلب مني طلبات غريبه وما كنت ارضى اسويها و اطنشه وبالنهاية نتهاوش ونرجع نتصالح ، المهم طلب مني اطلع معاه لانه يبيني ورفضت قلتله لو تحبني جان ما طلبت هالشي وانا مو بنت رخيصه عشان ارضا بهالشي ، تهاوشنا هوشات وايد وصكت فيني الدنيا كل يوم ابجي وقلبي يعورني شنو اسوي ,, قالي اعرف بنات وايد وعمري ما حبيتج في يوم جذبت عليه وقلتله نفس الشي اعرف غيره واني ما احبه وعمري ما حبيته قلبي احترق من القهر واهو عصب علي وقال انه بيختبرني واني مو كفو يحبني وما استاهل حبه قال لي ان رفيجه شايف صورتي ويبي يكلمني .. اشرايج تكلمينه ؟ صعبت علي نفسي وقلتله مابي منه شي وسكرته بويهه وافترقنا خلاص .. من فتره لي فتره كان يتصل علي وكنت احقره مع اني ميته ابي ارجع له بس عارفه ان اللي بينا انتهى ومتأكده انه مو متصل يبي يصالحني ... ايام وشهور وانا ابجي ذبحني الشوق له وحتى بعد كل اللي صار بعدي احبه واتساءل اذا اهو كان يحبني فعلا والا لا بس يلعب علي؟ وللحينه يفكر فيني والا نساني؟ الحين لنا 7 شهور متفارقين وحبي له ما تغير ابد وبعدي احبه بس الحيره ذبحتني ، انا ادري ان اللي سويته صح كان لازم ابتعد عنه بعد كل اللي صار بس قلبي يعورني واحبه للحين ، تصعب علي نفسي لما اشوف كل حبيب مع حبيبته وانا بروحي عايشه على ذكرى حب ويمكن حتى ما كانت حب الا من طرفي ... تعبانه وابي انسى بس شلون مو عارفه يوميا ابجي وفي بعض الاحيان يزيد الشوق عندي وافكر اتصل عليه اقوله اي شي بس اخاف يردني والا يقولي شنو تبين ... ساعدوني ابي انسى ساعدوني والله تعبت