ساعدوني لأني منهارة مرة

السلام عليكم ورحمة الله وبركاته
كيفكم يا فراشات ...
انا عارفة حتقولو مالكم شغل بالكلام اللي كاتبتو
بس اتمنى تريحوني بكلامكم
مالي بعد الله الا انتو
صراحة انا لسة عروسة ماكملت 4 شهور بس اقرو المكتوب وقولولي ايش اسوي
انا عارفة البعض منكم حيستغرب حيقولو المشاكل هادي ماتجي الا بعد سنة ولا سنتين ...
اول شي انا زوجي اول ولد جا بعد 3 بنات .. واخواتو وبالأخص اختو الكبيرة تبغى تتحكم
في اخوها .. حتقولو كيف عرفت
في بداية زواجي وبالأحرى بعد اسبوع من زواجي اتصلت اختو الكبيرة وصارت تقولو
عن مشكلة سوتها المصورة وركبت الغلط في اهلي واتهمتنا اننا ناس كذابين
وبدل ما يوقف زوجي معايا وقف في صف في اختو وكذب امي واهلي وخلاني ابكي يومها
والمشكلة امي كلمتو بنفسها بس قال اننا كذابين
وتاني شي كل ما نروح عند اهلو ونجلس انا واياه تقعد تلعب بعقلو انو مايخليني احمل
وتبغا يجيب لصق وحبوب ومن ده الكلام ...
وانا راح اقولكم على موقف صار لي يوم الخميس وهوا اللي خلاني ابكي دم واكتبلكم
الموضوع . ترى والله اكتبو وقلبي يحرقني ...
يوم الخميس كانو اهلو بيروحو يتعشو وانا ماكان لي نفس اروح كنت يومها ابكي
عشان بابا دخل في ازمة مادية مرة قوية ... المهم صار سوء تفاهم مرة بسيط واهبل
اختو الصغيرة فهمتني غلط وزعلت ومن البداية شكلها تستنى مني الغلط عشان تسوي مصيبة
المهم اتصل وقتها زوجي يسب ويلعن فيا وماساب شي ماقالو ولا حتى فهمني ولا عرف مقصدي
والله انا اتصلت على اختو اكتر من 10 مرات وماترد ورسلت لها رسالة فهمتها وجهت نظري
واعتذرتلها ولا ردت عليا .. <<< تربية ماما وبابا
خرج زوجي من البيت 3 الظهر وجاني 6 الفجر تخيلو طول الوقت وانا لوحدي وربي اللي خلقني
اني ماحطيت لقمة في فمي ... واستناه من اول عند الشباك وشفتو وهوا جاي ومعاه كيس
فرحت حسبتو جاب لي عشا .. دخل البيت ورمى اشياءو بقوة ورمى الكيس ( اتاريه جاب
لي لصقة منع الحمل ) ودخل غرفة النوم وقفل الباب في وجهي
وربي جلست ابكي انحرقت ... الموهم يوم الجمعة صحيتو ع الصلاة طلعتلو توبو وملابسو الداخلية
وسويتلو غدا ..لمن رجع وشافني حطيت الغدا طالع
فيا وقاللي رجعي الاكل بوديكي عند اهلك بأروح اتغدا عن اهلي<<<< ده كلو وانا مظلومة مدري ايشبو
كان يكلمني عادي في الظهر لمن خرجنا من البيت ....
هنا المصيبة :::::
صباح السبت الناس مدارس اهلي نامو ارسلتلو رسالة كتبتلو متى تجيني
قاللي شوية
والا ولا ربع ساعة يتصل يقولو انا رميت شنطة ليكي عند الباب حطيت لك ملابسك
انا ماراح اخدك وانا ليا تفاهم مع اهلك من كتر المشاكل اللي تسويها
ومن جد فتحت باب شقة اهلي لقيتو حاط الشنطة .
واحلف بالله اللي خلقني
اني ماسويتلو ولا مشكلة كلها شوية عناد وبدلع وغير كدة يقول اكسر كلامو
يعني دحين صار النقاش كسر كلام ..
وهوا يعاير ملابسي يقوللي ماعندك لبس غالي زي الأوادم ومن ده الكلام
وكنت اسكت عشان مابغى مشاكل ...
وكان عند اهلو زواج وماشترالي فستان زي الناس خلاني اتسلف من امي
ومصروف ومايعطيني
مين اللي له حق يزعل
قولولي انا ايش اسوي .
وربي جلست ابكي ماني عارفة ليش اخواتو لعبو في راسو كدة ** حتقولو يمكن ظلمت اخواتو
بعد دوامو راح عند اهلو وكل اخواتو موجودين ** عشان سوء تفاهم محد فاهمني
بس بالله انصحوني
وربي انا احب زوجي بس دحين مصدومة منو مرة
اخر شي اتوقعتو منو .... واكبر خوفي انو يطلق لأنو يهددني من اول<<< عروسة تتهدد بالطلاق
ترى اكتبلكم وانا دمعتي على خدي
اسفة اذا طولت عليكم بس من قهري
ولعلمكم انا كزوجة ماني مقصرة معاه نهائيا لا بيت ولا في حقوقو كزوج