شنبك اللي تفاخر به ترى اللي جابته حرمة

تصيح تقول يا(حرمه)،تحسب إنك تعايرني
شنبك اللي تفاخربه ترى اللي جابته حرمه
تصدق كذبتك دايم مبادئ حيل تقهرني
(نقص عقلك مع دينك)ترى مليت هالكلمه
ياجاهل فتح عيونك ياويلك لو تصاغرني
غضب تهديد وإستلمّه وسمّه اللي تبي سمّه
أنا مليت من ظلمك يا(آدم) وش تصورني
أذا إني ناقصه بعينك وداعي منتهي الحكمه
تراني ساكته بكيفي ،، نصيحه لاتفجرني
غضب شيطان ما اميز مابين الخال والعمه
عيوبي طيبتي وقلبي حنان وشوق يجبرني
علي عكسك تجي قاسي وكلن راضي بسلمه
حسافه وقتي الفايت تذكّر يوم تِسهِرني
على قولة انا عاشق وحبك صابني سهمّه
تذكّر يوم لي تركض ،، تقول يازين آمرني
علي سنة رسول الله أشيل الحمل وآزمّه
فرحت وقلت هذا اللي أبي في ظلّه يسترني
اذا ضاقت بي الدنيا ،، مسح دمعاتي بكمه
ابي انسى به الدنيا وابي بالحب يشعرني
ابيه يكون لي فرحه اذا زاد الزمن همه
لكن للاسف غلطه وهم كذاب ساورني
جزاتي والثمن عمري..وقتلت بخافقي حلمه

و سلامتكم.....