صديقتي الغالية وليلتها الرائعة قولوا ماشاءالله

صديقتي الغ الية وليلتها الرائعة""قولوا ماشاءالله""المهم قبل لا ابدا
قولوا
ماشاء الله تبارك الله
قلتوها خلا ص ببدا الحين بسم الله
تقول كنا يوم الاربعاء وزوجي كان هذاك اليوم رايح للحلاق ومحلق
ومتسبح ومتظبط ولابس الملابس الجديده ومتسبح بالعطر
انا هنا شكيت وقلت على وين ان شالله
قال لا حبيبتي عندي موعد مهم وراجع لك ياعسل
قلت طيب المهم طلع العصر والمغرب الا وهو واصل ومعاه
اكياس كثيره وداخل وفاك كشرته عالاخر فديته (هي اللي تقول)
ونطيت بوجهه وقلت امحق ربع ساعه المهم حط الاكياس
وجا بسرعه وضمني قلت خير قال لا بس اشتقت لك
استانست ونفس الوقت شكيت
المهم قال تعالي اوريك ايش جبت لك
رحنا الغرفه وطلع الاغراض اللي بالاكياس ال واو
تيور يجنن واكسسوارات تهبل والشنطه والبوت طقم يطيرون العقل
وصرخت لي؟؟؟؟
قال اكيد لك ياحياتي اجل لمين غيرك!!
وشاري اغراض ثانيه وموت يطيرون العقل
وباقي كيسه بس رفض يفتحها لي قال مفاجاه لك بس بعدين
قلت طيب بس بعدطلعه الروح
المهم قال يالله البسي باخذك مشوار
وين؟؟؟ قال مفاجاه....
رحت بسرعه اخذت لي شاور عالسريع وكانت تقول اشوى
اني شلت شعر سيقاني ويدي ((هنا انا مت عليها من الضحك ياحليلها)
المهم تسبحت بسرعه ودقيت المكياج الفخم واستشورت شعري
خليته سايح ماكان عندي فرصه اسوي شي
ولبست الملابس اللي جابها وتخيلي يا.......طلعت مقاسي وهو في عمره ماعرف مقاسي
المهم تبخرت وتسنعت وطلعت له في الصاله وسوى كذا لما شافني ياحليله استخف
المهم وجاني وعطاني بوسه قال كل هذا لي
قلت اذا ماكان لك اجل لمين ياقلبي((ياعيني))
المهم لبست عباتي وطلعنا
رحنا لمطعم خيالي اول مره اشوف فخامه مثل كذا مره راقي
المهم جلسنا عالطاوله وطلبنا الاكل وهو جالس جنبي وياكلني
وكانت تقولي تصدقين يا....... اول مره يطلعني زي كذا
ولا ياكلني بايده مره انبسطت((ياحليلها))
المهم خلصنا الاكل وطلبنا الحلو واكله وياكلني
وسوالف وضحك وكلام حب وغزل اول مره اسمعه يقوله لي
وخلصنا ورحنا تمشينا في حديقه مره هاديه وفيها ناس قليل مره
ونتلاحق انا وياه وانخش ورا الشجره ويدورني المهم صرنا كاننا اطفال
بس مره وناسه اول مره احس زوجي كذا فديت روحه ((هي اللي تقول))
المهم ركبنا السياره وقال الحين فيه مفاجاه احلى بس بشرط
بربط لك عيونك ضحكت ههه كيف وانا متغطيه هاه كيف
قال اربطها لك فوق الغطاه قلت طيب بعد طلعه الروح
المهم مدري وين دخلنا بس في البدايه كانت صجه عالم
وشوي نمشي نمشي نمشي وبعدين فتح باب وشال الربطه عن عيوني
والا واو احنا بفندق الفيصليه
الفيصيليه مره وحده ماصدقت اول مره يسويها مدري اشبلاه رجلي
واول مادخلت الورود متناثره على الارض والموسيقى الهاديه
وشموع على الارض وفي كل مكان وصندوق احمر مخملي على الطاوله وكبير
المهم دخلنا وفسخت عباتي وراح لبس بجامه جديده اول مره يلبس بجامه
وجلست كاني في ليله دخلتي ههه
وقالي يالله افتحي الصندوق وقولي ايش رايك حياتي
فتحت الصندوق ولقيت قميص نوم وشفته يهبل بس وش يخبي من الجسم استحيت البسه بس عشان مافشله لبسته
والا جالسه امطط فيه كل ماقمت خ
ولقيت طقم ذهب روعه يجنن رحت له وضميته وشكرته
وشوي وراح ابكي
استانس وقال تستاهلين كل خير حبيبتي
المهم رحت وتعدلت بالحمام ((اكرمكم الله))
ويوم طلعت لقيته حاط اغنيه دلوعتي كل الحلا فيها الخ الخ الخ
وماسك فرشه الشعر ويغني لي على باله
وانبسطت وصار اللي صار عاد
المهم تقول حطيت راسي عالمخده واسترجع اللي صار اليوم
وانا مو مستوعبه كيف هو مو كذا صحيح يهتم فيني بس مو لهدرجه
اول مره يسويها ((قلت لها والله مايبين في عينك وش تبين الرجال يسوي بعد مالومه احتار ))
قالت لي ((انطمي بس جايتك في السالفه))
وش هالاهتمام اللي نزل فجاه لازم اعرف السر
المهم نمت ومانمت نص واعيه وانا اسمع احد يناديني
بصوت ضايع شوي ف..ط...و...ر.... يا....ا....ل....ل...ه
ومو مسموع بالظبط وانا متروعه ونطيت بسرعه الا زوجي الحنون
يقول يالله قومي سوي الفطور تاخرت عالدوام
وقال والا اقولك مابي تاخرت ولا تنتظريني اليوم عالغدا بنطلع البر
انا واخوياي زين عودي ارقدي
وانا جالسه عالسرير وماتحركت مو مستوعبه واقول توني بسم الله
في فندق الفيصليه وش جابني فيذا
واشوف لبسي لقيته بجامتي الورديه القطنيه وعلي شرابي
وايقنت انه حلم
واقمت وانا اقول في نفسي انا قايله مو من عوايده يسويلي مفاجات
تعلموني فيه انا اخبر به
انا هنا (( فطست من الضحك ههه))
وترى هي قالت لي كذا نفس الاسلوب يعني في البدايه ماكنت ادري انها حلمانه المسكينه
ياحليلها الله يسعدهاوقلت اخبركم بنفس الاسلوب وترى صدق السالفه حياتي عليها
وهذي هي سالفه الف ليله وليله في فندق الفيصليه
لا تحرموني من تعليقاتكم
منقول,,,
بصراحة ياحلوات اندمجت لآخر درجة وتنهدت من قلبي
وطول الوقت وانا اقول ماشاءالله ربي يهنيها
ولما وصلت للآخر ولقيته حلم
على فكرة
هاذي احلامنا كلنا ......... خ
منقول