صديقتي و زوجها فكركم ايش الحل

السلام عليكم
اعذروني فراشات بس صديقتي بحاجة ماسة لمساعدتكم و لارائكم
و اتمنى اني الاقي الحل اللي ممكن يساعدها بوضعها السيء
الحكاية و بكل بساطة انها صايرة تشك كثير بزوجها
رغم انه و لله الحمد انسان جدا كويس و محترم و الكل يشهدله بكدا
و هي لحد الان مهي عارفة ايش سبب شكها
دورت وراه جواله او المواقع اللي يدخلها في النت من اللاب توب
كل شي كل شي ممكن يخليها تمسك عليه
بس ما مسكت و لا شي يعني نقدر نقول الرجال نظيف
و اصلا انا للان مني عارفة و لاني فاهمة ليش الشك اللي عاميها دا
لمن سالتها هل في شي حصل منه خلاها تشك تقول لا
بس كدا من كثر الحكايات اللي بسمعها و اللي بقراها
صارت تشك في زوجها
تخيلو اول فترة زواجهم كانت تشيك بين فترة و فترة في السجل حق الجوال
بس الفترة الاخير و من دون اي مبرر صارت يوميا تفتش وراه
يعني اصابها هوس شك و تفتيش وراه
يعني طالما انها بتدور وراه طول الفترة دي و ما لقت شي
معناته الرجال ما عنده حاجة بيعملها من وراها
لا خرجاته كثيرة و لا بيتكلم بالجوال كثير و لا عنده اصحاب و لا شي
يعني طول وقته بالبيت
انا قلتلها يمكن عشاننا طول وقتنا بالدوام و بنرجع مهلوكين
و ما بتقعد معاه كثير و بتنام قبله
فمع النقص اللي حاصل منها خايفة انه شايفله شوفة
مع انه ابدا مو سبب مقنع
فاللي ابغاه منكم انكم تنصحوها بطريقتكم الحلوة
كيف تتصرف مع شكها و ايش الافضل انها تعمل و ايش ما تعمل
لانها تعبانة من الشك اللي هي فيه و نفسها ترتاح
غير انها قرفت الرجال بكلامها عن الخيانة و غيره
بجد اتمنى انكم تساعدوها باالي انا ما قدرت اعملها هو
و على فكرة انا استاذنتها بكتابة الموضوع و هي راح تقرا ردودكم اول باول ان شاء الله