طريقة زيت جوز الهند النارجيل بالبيت واللي جربتها تقول

السلام عليكم
اخباركم بنات
هذي اول مشاركه واول موضوع لي وحبيت افيدكم
انا بصراحه شعري مو خشن يعتبر ناعم كيرلي بس دايم استشوره
ودايم اشوف خلطات واشياء ودي اسويها للشعر بس اني عجازه وخوافه
بس مره قريت باحد المنتديات زيت جوز الهند وسويته بنفسي بالبيت لأني مااضمن اي شي احطه بشعري اخاف لأن شعري خفيف ويتساقط وماابي اغامر الا بأشياء مضمونه
المهم رحت جبت جوز الهند من السوبر ماركت وبما اني عجازه كنت بخلي المهمه للشغاله تسويه لي
واول ماجيت بفهم الشغاله الطريقه قالت انا دايم اسويه بالفلبين وهي اصلا كان عندها اجازه راحت ورجعت لنا وكانت جايبه معاها الزيت مسويته هناك
عاد انتو تعرفون شعر الفلبينيات ماشاء الله عليهم يحبون يهتمون فيه
المهم الزيت يطري الشعر بشكل كبير ويعطيه لمعه خطيره وبصراحه الشغاله تقول انه يطلع الشعر اذا كان عندك تساقط
بس انا لسه صار لي الحين تقريبا 3 اسابيع استخدمه مره او مرتين بالأسبوع على حسب
وطريقه:
1- تاخذين مثلا 10 حبات وتقشرينها
2- تاخذين الأبيض اللي داخل وتبشرينه وتنقعينها بماي حاار الين ماتحسين انه لون الماي صار كأنه حليب
3- تصفين جوز الهند من الماي وتعصرينه
4- تاخذين الماي اللي نقعتيه فيه اللي مثل الحليب وتغلينه على النار بيطول معاكم تقريبا ساعه او اكثر على حسب الكميه الين ماتشوفينه تبخر ومايبقى لك في القدر الا زيت وهذا هو زيت جوز الهند
خلاص خليه يبرد وكل مره حطيه على شعرك
وريحته حلوه والله ونتيجتها مره حلوه وانا مجربه الليونه اللي صارت بشعري خطيره
ادري انها حووسه شوي بس انا اخاف ماادري ايش يكونون حاطين مع الزيت اللي ينباع اقل شي مواد حفظ العلب اخاف انها تأثر على الشعر وانا مو ناقصه
وبجرب الصبار لأن عندنا النبته واشوف الشغاله دايم تقطع منه وتفتحه ويكون لزج من داخل وتفركه بشعرها
اذا جربتها وشفت نتايج بقول لكم
ادري طولت عليكم وياليت اللي جربتها تقول
ويعطيكم العافيه
اختكم
نونا