طيبتى سبب همومى انكسر خاطر ومالى سند عقبك يابوى

السلام عليكم ورحمه الله وبركاته ..
اغلب البنات فى المنتدى يعروفون قصتى مع اخوى .. ويعرفون وش قد انا مقهوره منه .. ومن افعاله ..
بس اليوم بتكلم معاكم وانا مو قادره اتحمل الظغوط والتعب والهموم اللى ساكنه بداخلى ..
انا ارمله وام 4 بنات و ولد واحد عمره 9 سنين .. الحمدالله موظفه وهذا الشى الوحيد اللى خلانى اعتمد على نفسى ومااحتاج لاحد .. ساكنه فى بيتى وبعد فتره سكنت معاي امى واختى لان صاحب بيتهم طردهم .. وكنا مبسوطين ومرتاحين .. على فكره نسيت اقول لكم انا عندى 4 اولاد بس للاسف انهم اخوان بالاسم .. يعنى ماينفعون بشى ابد .. وماكان هذا مهم بالنسبه لى لانى معتمد على نفسى .. المهم نرجع للموضوع .. اخوى الكبير قرر يتزوج فااقترحت عليه يجى يسكن معانا بما ان البيت كبير ومافيه الا احنا واحسن له من الاجارات... وعشنا فى البيت ومرت الايام .. طبعا مافى احد يصبر على احد .. طبعا شايل ايده من البيت والله مايشترى ولا شى اللهم مره وحده بس اشترى اغراض البيت لما جت زوجته من عند اهلها .. ودفع مره وحده معاي فاتوره الكهرب .. وسكت قررت انى اتزوج ابى لى زوج يكون مسئول عنى يشيل معاى من الهموم وبدا التخريب من جهه اخوي .. وطبعا مايقابل الناس ويوعدهم ومايجيهم .. طبعا امنت انه ماراح يوافق .. وعدلت نظر وكل يوم اتحسب عليه وان شاء الله اشوف فيه يوم .. المهم بديت اعتمد على الناس واطلب فلان وعلان والله يابنات ان الناس صديقاتى وازواجهم يسون لى كل شى ابيه .. واخوانى قاعدين مايحركون ساكن وانا صابره واقول عشان امى .. واخر شى قلت بطلع لى سواق وبجيب لى سياره واخفف من طلباتى للناس .. لانه عيب ياوجه استح .. المهم قدم لى ابوى صديقتى على سواق والله يابنات انى رحت معهم للاستقدام وهم اللى سوا لى اوراقى واخوانى نايمين بالبيت .. وبعد شهرين جاء السواق .. بس مافيه سياره ومااقدر اقدم لان اخوانى مطلعين باسمى سيارات ومااقدر اطلع لى ... فقالت لى صديقتى عندهم سياره اخوها قديمه اقدر استخدمها الين الله يفرجها .. واقدر اشترى سياره .. الامور الحين كويسه وتمام .. الى حد امس ومن هنا تبداء القصه ..
امس قمت الصباح وقلت بروح افطر مع صديقتى فى بيتهم وهى جارتى .. قلت حق بناتى انا طالعه بروح بيت جيرانا .. ولقيت اخوى بالصاله .. سلم على ورديت عليه وطلعت .. والله وكيل ماجلست عند صديقتى الا ربع ساعه .. الا بنتى تتصل تعالى ياماما فيه مشكله بالبيت .. واطلع على طول والقى الاخ كسر سياره الناس ( كسر الزجاج اللى وراء كله ) ومتهاوش مع اختى وقال لاختى والله لو عتبتوا الباب اقتلكم .. وكلام كله سب وهواش .. دخلت البيت وطقيت عليه باب غرفته وتكلمت معاه وانكر يابنات .. ويحلف انه ماهو هو .. مع ان اختى تقول انا شفته شايل الطابوقه اللى لقينها فى وسط السياره .. وبعدها انهديت فيه وطردته هو و زوجته ورحت اتصلت بالشرطه .. ولما سمع طارى الشرطه .. ركب السياره وانحاش .. وكان خايف .. وسويت بلاغ وطلبت تعهد انه مايقرب البيت ولا يجى يمى ولا يهدد ولا يسوى لى شى ..
المهم طول امس عايشه برعب كارهه البيت وخايفه على عيالى واحس انه مجرم .. وخايفه انى يسوى لى شى انا وبناتى ..
ابى منكم مشوراه ايش اسوى .. هو قال راح يطلع من البيت بس انا اعرفه اكيد ماراح يتركنى لحالى لانه من النوع الحقود واكيد بيسوى لى شى او عيالى ..
انا فكرت ابيع البيت واطلع من الديره لان ماعندى فيها احد ابد .. اخون مالهم فايده .. وماعندى زوج او احد مسئول عنى والله ان السواق طلع احسن من اخوانى .. واهل عيالى جابرين بناتى يتنازلون لهم عن ورث ابوهم ولما ارفضوا البنات .. ماصاروا لايتصلون ولا يسالون عنهم ؟
او انى اسكت واجلس فى بيتنا واتوقع انه ماراح يسوى شى ..
انا فى حيره ساعدونى الله يخليكم ..