عطلتنا في ربوع النعيريه

1. وبعده رحنا لأحلى سوق بالنعيرية......س وق المواعين" عشق كل عجوز...ههه


2. وبعده ردينا للمخيم وحصلت زفة من اختي لاني رحت وماعلمتها


3. وهذي حالنا كل ليلة

السلام عليكم ورحمة الله وبركاته
حبيت أول ما أدخل أنزل قصة لأختي وبنت خالي عنود الصيد :ق1:حرم خالد:ق1:
جايبة لكم قصة حقيقية..بس مو أي قصة
لان احداثها تدور في منطقة "النعيرية"....بالسعودية... .
هذي الرحله كانت في اسبوع العيد الوطني وعيد التحرير لدوله الكويت في سنه 2007شهر فبراير
البداية
قررنا في هذي الرحلة إنا نسافر للسعودية عشان نخيم مع عماني كالعادة في كل سنه....في بداية المشوار كنا مقررين إنا نسري بالليل بس أبوي الله يحفظه رد تعبان وأجل السفر لليوم الثاني"ويا ليته ماأجله"
المهم عماني سروا بالليل ووصلوا للنعيرية الساعة 4 الفجر
بس إحنا عقب ماحملنا الأغراض بالسيارة مع الخيام نمنا............لما قعدنا الساعة6 الصبح توكلنا على الله ومشينا
لما وصلنا منفذ النويصيب" بين الكويت ومنطقة الخفجي بالسعودية....انصدمنا....لأن أغلبية أهل الكويت مسافرين للسعودية بعد.... وصراحة كان زحمة....الناس هجيج للسعودية كأنهم منحاشين..خ
إحنا طبعا تنقعنا....بالمركز من الساعة 7 الصبح إلى الساعة 5 العصر....واقسم بالله العظيم اني ما بالغ...كان يوم مو طبيعي
أنا وأمي وأبوي وخواتي الصغار منحشرين بالفان مع الإغراض....بس اختي وأخواني الثلاثة"عسى ربي يحفظهم: مرتاحين لآخر درجة بالمرسيدس...وأنا ابتلشت بالورعان....
المهم بعد ماطلعنا من المراكز....مشينا للنعيرية ووصلنا لها أنا بالضبط ماأذكر الساعة جم؟؟
لما وصلنا كانوا عماني في استقبالنا ولما يسلمون علينا يواسونا بعد الغثة اللي حصلنا عليها
وقعدنا نبني الخيام...صح كان ظلمة شوي بس بنيناهم
المشكلة الكبيرة اللي ابتلشنا فيها" خاصة احنا البنات" ان هالسنة أهلنا ماجابوا الخدامات معانا بسبب الفيزا
من الصبح نقعد نخم الخيمة ونسوي الريوق وبعد الغدا كل البنات يتوجهون للتنكر عشان نغسل المواعين والله اشكالنا تضحك....خاصة لما يمرون عماني...ويضحكون علينا بالذات عمي الصغير الله يهداه كان يقول
"" يالله ياخدامات غسلوا واشتغلوا عدل والا اقطع عنكم المعاشات" وحنا في حال لا نحسد عليها" مصخرة"
ولا البلا لما يجون عيال عماني ويتطنزون علينا ولا بعد كل وحدة فينا مسمينها على اسم خدامتهم...
وانا في حال يرثى لها...كل خمس دقايق داشة الخيمة وأحط الكريم على وجهي وايديني عشان لا يصيرون سمر بس ماكوا فايدة... ?
لما تصير الساعة 4 العصر نتجمع لانه وقت الراحة لنا وناكل بطاط كتكو مع بيبسي مع كاكاو والا حلاو
ولما يأذن المؤذن نبتلش بالوضوء لان الماي بارد حيل....بعد صلاة المغرب نتجمع كل يوم عند وحدة والبنت الجيدة اللي تزين الخيمة وتحط القهوة"اهم شي" والجاي والفصفص والبسكوت والحلويات من شتى الانواع ونسولف ونصور...ونعلق ونسوي مقالب.....
المهم ثاني يوم رحت أنا وأختي اللي اصغر مني نطلب ابوي وانترجاه عشان يخلينا نسوق السيارة...وبعد الحاح طويل وحنْه...وافق ابوي....ورحنا بجولة ع المرسيدس...كنت انا الاولى ولما جاء دور اختي قلت حق ابوي ينزلني عند المخيم لما نزلني وراحوا....لقيت بنات عمي يدوروني صارلهم ساعة لأنهم بيروحون لسوق النعيرية
رحت بسرعة للخيمة ولبست عبايتي ونقابي وأخذت فلوس من امي ورحت مع عمي اللي مودينا ع السوبر وأنا والبنات كلنا قاعدين ورا....وعمي والحريم جدام
لما وصلنا السوق ابتلشنا لأنا لازم ننزل من الباب الخلفي....والسوق كان كله شباب....كان موقف محرج واحنا ننزل من ورا خاصة اشكالنا لأنا 10 بنات
واحنا ننزل كان في شباب واجد بسيارة ورانا وفي واحد منهم يصورنا
بس احنا لفينا وجيهنا وما عطيناه فرصة
..
المهم....احنا قعدنا نتحلطم وكنا معصبين وكل وحدة فينا تقول:ياليتني مارحت
بعده دشينا السوق....اللي كأنه سوق الجمعة...وكل ماجينا عند هندي قعدوا بنات عمي يكاسرونه على السعر ولما يوصلون للسعر اللي يبونه ينحاشون....لأنهم مايبون يشترون شي...."حرام مو كاسر خاطري الا الهندي"
وصراحة السوق مو شي ولا اللي زاد البلا هالشباب اللي مايستحون....ولا في بعضهم كبير كبر ابوي...يغازل...الحمدالله والشكر الله لاتبلانا
بعد ماخلصنا من التجول في السوق الباريسي ردينا للسيارة....بس توقعون وين كنا نمشي؟؟؟؟
بنص الشارع....خاصة احنا واجد وزود علينا حريم عماني....ولفتنا الانتباه....وبعدين مشينا وحدة ورا وحدة كأنا طابور بالروضة....كنت انا قبل الاخيرة....فجأة والبنات وهم يمشون مروا جدام جيب وكان في واحد داخل الجيب وكل مامرت وحدة اللي داخل الجيب يتكلم....لما جا دوري امر جنب الجيب توقعوا من داخله؟؟؟
كان رجال مطوع وجنبه شرطي...قال لي المطوع: لو سمحتي ياأختاه المشي على الرصيف
اول ماقال لي الكلام والله العظيم تفشلت...وبنت عمي لما كلمها المطوع من زود الخرعة قالت له شكرا...خ

وبعده رحنا لأحلى سوق بالنعيرية......س وق المواعين" عشق كل عجوز...ههه

وبعده ردينا للمخيم وحصلت زفة من اختي لاني رحت وماعلمتها

لما جا بالليل ماكان فينا نوم وكان ودنا نقعد في وحدة من الخيام....بس أهلنا ماجابوا خيمة زايدة...وعمتي الله يجزاها خير....سوت لنا من بقايا بعض الخيام مكان دائري مفتوح على طرف عشان الباب ومغطينه بكنبل بس مو مغطى من فوق عبرنا فيه لآخر يوم
كنا نشوي فيه وكل وحدة تفنتك بالأكل اللي تجيبه
كانت بنت عمي تجيب لنا قهوة فرنسية" الله يهداها تالي الليل قهوة تبي تطير النوم عنا"
وورق عنب ونشوي دجاج ولحم ونقعد نسولف وخططنا للمخيم بعد 5 سنوات وشلون راح يصير

وهذي حالنا كل ليلة

في آخر يوم كانوا عماني رايحيين للسوق عشان يشترون فقع ولما ردوا لقوا عيالهم" الشباب" معفسين الدوانية والمواعين مو نظيفة وقاموا عليهم وزفوهم.....لما كنا احنا"البنات " نتمشى...شفناهم يغسلون المواعين....ماصدقنا؟؟؟
رحت بسرعة للخيمة عشان اجيب الكاميرا.... خذتها بنت عمي مني ونادت اخوها وقالتله: كومار
لما التفت شاف معاها كاميرا وانحاش
قالت بنت عمي بصوت عالي: ابتسموا للكاميرا... وصورتهم كانوا واجد بس اكثرهم انتبهوا وانحاشوا ماصورنا الا اثنين...........المهم انهم تفشلوا
بعدها ردينا للكويت وكنا خايفين من زحمة المراكز بس انصدمنا وطلعوا فاضين "اشوا"
وردينا لديرتنا الحبيبة الكويت بعد مااستانسنا بالعطلة..........وردينا للدراسة من جديد... ?
بس صراحة كانت من أحلى الرحلات اللي سافرتهم للسعودية....مع اني رايحة السعودية مليون مرة
هذي القصة باختصار وكتبتها لكم
وأنتظر ردوودكم وتعليقاتكم ونقدكم....
وشكرا....تقبلوا تحياتي
اختكم
جنون الشيوخ