عندك هاالات سودا تخرب مكياجك تعالي عندي الحل وبالصور C

1. السلام عليكم ورحمة الله وبركاته


2. بيت القصيد << ترى فلسفتي واايد وهذرتي اكثر تحملوني


3. بسم الله نتدي

السلام عليكم ورحمة الله وبركاته

لاحظت ان في كثير من النساء لا تحسن اخفاء هالاتها السوداء <<< امحق فصحى ههه
جد بنات مرات اصادف بنات حلوين لا اله لا الله .. جمالهم رباني تبارك الرحمن لكن يكون في بشرتها حبوب .. او اثار حبوب .. والمصيبه اذا كان عندها هالات سوداء وغطتهم بكونسيلر فاتح ((( ظناَ))) منها انها اخفت السواد وصار شكلها حلوو في كثير بنات ما يعرفون يحطون الكونسيلر .. ولانهم ما يعرفون الطريقه الصحيحه للكونسلر تلاقينهم يخبصون الدنيا !!
وللاسف المكياج الهدف منه انه يحلي لكن اذا انحط بطريقه غلط يبشع ومرات يضحك !

بيت القصيد << ترى فلسفتي واايد وهذرتي اكثر تحملوني

راح اشرح لكم بالتفصيل والصور الطريقه الصحيحه لاخفاء العيوب وغيرها .. وعسى الله يقدرني واعلمكم كل شي بصوره صحيحه . و ان شاء الله تفهمون علي
وللعلم ترى الطريقه عاديه جدا جدا و بغايه السهوله والتفاهه حتى انتوا اذا قريتوا الموضوع بتقولون بس جذيه .. ما راح تاخذ منكم اكثر من 5 دقايق ! وتراها مو شي غريب ولا اختراع اغلب المحترفات يسون هالطريقه و مو بس المحترفات خل نقول المتمرسات على المكياج بشكل عام
طبعا قبل لا ابتدي بالنسبه للبنات اللي عندهم هالات سوداء لازم لازم لازم تحرص على شرب الماء بشكل منتظم .. يعني اقل شي 6-8 اكواب باليوم .. وتحرص على اكل 4-5 حصص فاكهه بالاسبوع ! وتحرص على السلطه .. لا تقولون ما نحب .. اذا ما تحبين الطمام لا تاكلينه لكن اكلي خيار << كل الناس يحبونه حتى الاطفال حلوو الخيار .. سوي لك سلطه خيار بالروب والنعناع ! اكلي جرز .. خس .. حرصي على اكل السمج= السمك والاكلات البحريه بشكل عام .. لا تقولون زفرر وويع .. والله لو تدروون شنو فوائد الاسماك .. جان ظليتوا طوول عمركم تاكلون سمج .. ما تشوفون الشرق اسيوين يعمرون لا اله الا الله وصحتهم زينه حتى لو كبار وفيهم قوه اغلب اكلهم بحري ! ولو كلش كلش ما تقدرين على الزفره اخذي حبوب خلاصه السمك من الصيدليه << استشيري طبيب انا مالي شغل !! << خاافت تخلي مسؤليتها

بسم الله نتدي

بالنسبه للهالات السوداء .. لا تفكرين تحطين كونسيلر افتح من بشرتك على هالمنطقه ابدا ابدا ابد .. لانه بيقلب على رمادي ويصير شكلك حتى لو حطيتي كونسيلر فاتح وما قلب على رمادي بوقتها .. بعد فتره يقلب .. يعني انتي بالبيت شحلاتج تروحين المناسبه هالاتك رماديه مو بنيه ولا سودا .. وحسافه اذا المكياج حلوو والاساس حلوو الهالات تبشع ..
ف اخذيها قاعده اذا تبين تغطين ...
هالات سوداء
حبوب حمرا (ملتهبه)
حبوب سمرا (الحبوب اللي راسها بني غامج شوي)
اثار حبوب
لا تغطينها ابدا بكونسيلر فاتح !
اتبعي هالخطوات .. (بعدين بتكلم عن كل خطوه بالتفصيل )
1)حطي كونسيلر غامج
2)حطي فوقه كونسيلر فاتح
3)فردي الاساس
4)البودره
5) التنظيفات
6)المسات النهائيه
وسلامتك وتعيشين
بتكلم بكل خطوه بالتفصيل .. والصور والشرح
الخطوه 1 و 2 (( الكونسيلر الغامق والفاتح ))
في كثيرر ماركات ينزلون كونسيلرات بدرجات البيجات والبني .. وبالغالب تكون هذي الكونسيلرات جايه على شكل باليت .. ويكون الكونسيلر كريمي
مثل فورايفر .. وايد حلو هالكونسيلر
لانكوم .. سابقا كان عندهم هالكونسيلر مدري اذا للحين .. اتذكره كان حلو و سهل الفرد
ماك
بوبي براون
كريولان
الطريقه وضع الكونسيلر
يوضع الكونسيلر بالطبطبه = الرتبيت= الطقطقه بخفه ونعومه بحركه سريعه
وليس بالمسح ..او الفرك .. او حركه عنيفه .. شوي شوي على بشراتكم يا بنات
اخذي من الكونسيلر باصبع او بالفرشه (الاصبع افضل عشان حرارة اصبع تساعد وتسهل الفرد ) وطبطبي على المكان اللي تبين اخفاءه .. طبطبي الى ان تحسين ان الكونسيلر انفرد زين و تجانس ويا البشره
بعدين خذي من الكونسيلر الفاتح << ليما اقول فاتح ما اقصد كونسيلر بلون الطابشير .. اخذي كونسيلر بلون بشرتك . وان ولا بد افتح بدرجه وحده ..
ونفس الطريقه طبطبي .. الى ان يتجانس .. ولا تكثرين الكميه
نصيحه ابتدي بكميه قليله وزيدي لو احتجتي مش العكس !
يتبع