قالي ابي اتزوج عليج

sara81

13-09-2022 - 12:29 pm

.
.
.
السلام عليكم شلونكم خواتي
تعالو بقولكم شسويت بزوجي
الله يسلمكم قبل أمس كنا قاعدين عالعشا آنا و زوجي و عمي و خالتي و حمواتي كلهم و حماي الصغير
و آنا توني طالعه من النفاس صارلي 3 أسابيع تقريبا
المهم عمي قاعد يقول لخالتي خلاص كبرتي و صرتي جده بتزوج عليج
و يقول لبناته دورولي وحده عمرها 19 و زوجوني اياها
جان يقول زوجي المفروض آنا اللي اقول بتزوج أبي وحده عمرها 19
جان أعصب و اقول شنو فرقت سنه يعني ( آنا عمري 20 )
خلصت عشاي و قمت بروح شقتي جان يقول عمي اقعدي اكلي حلا ماعليج من رجلج ..
جان أقول لا مو مشتهيه و أعطي زوجي نظره يعني زعلانه و صعدت ..
المهم أول مادخلت ولا اهو وراي جان يمسكني و يقول شفيج زعلتي قاعد اتغشمر معاج !!!
جان أطقها بجيه (دموع التماسيح طبعاً )
و أقوله ليش جذي حرام عليك احرجتني جدام امك و ابوك و خواتك
غشمرتك ثقيله إذا جذي غشمرتك خلاص لا تتغشمر معاي مره ثانيه ..
راضاني و نسى السالفه بس آنا بقت براسي !!!
المهم أمس كنت سهرانه مع وحده من حمواتي
و حماتي هذي غرفتها قبال شقتي
جان أقولها بسوي دقه بأخوج و بعلمه الغشمره الثقيله شلون
قالتلي شبتسوين ؟؟
توقعوا شنو سويت ؟؟
خليت بنتي عندها و انخشيت بكبتها ..
و اهيا دقت على زوجي كان سهران بالديوانيه
قالتله تعال فوق ابيك شوي ..
المهم لما جأ قالتله بنتك كانت تبجي حيل و لما دخلت الشقه لقيتها بسريرها و أمها مو موجوده !!
انجن الرجال راح يحوس بالشقه دورني بالمطبخ و بالحمام عزكم الله و بالصاله و بغرفة بنتي ..
نزل تحت يدورني بالصالات و بالمطبخ و بالحوش ..
طلع برا بالحديقه يدورني ..
و صعد فوق مره ثانيه يدورني بغرف خواته ...!!!
خليته يحوس نص ساعه يدوورني
و يدق على تليفوني بس آنا مسكرته
آخر شي جأ عند اخته اللي انا منخشه بكبتها ..
جان يقول هذي وين راحت وشكله خايف علي حيل
عاد أخته بعد ماقصرت جان تقول يمكن زعلت من كلامك أمس لما قلت انك تبي تتزوج !!
جان يقول لالا ما اتوقع ما تسويها
و ياخذ تليفونه و يدق على ابوي يبي يسأله إذا جيتهم ولا لأ
بس الحمدلله انه مارد لان هالحجي الساعه 4 الفجر ..
لما شفته خلاص وصل حده جان أبطل باب الكبت و أطلع بكل برود ..
لما شافني انهبل مو مصدق
سكت ماقال ولا كلمه و راح الشقه شكله معصب حده
و آنا و حماتي ميتين من الضحك
رحت وراه جان أقوله إذا غشمرتك ثقيله أنا غشمرتي أثقل
مارد علي و طلع راح الديوانيه ..
خ مسكين جننته
أحسن عشان مايجيب لي طاري الزواج مره ثانيه
شرايكم باللي سويته ...؟؟؟

التعليقات (9)

اميره العمري

13-09-2022 - 03:47 pm

ههه
والله مانتى هينه مره قويه
ان كيدهن لعظيم
اكيد ماراح مره ثانيه يمزح معك خ

عسل معسول

13-09-2022 - 04:48 pm

خوفتي الرجال حرام عليك وأخته معك يوه منكن يالحريم
كل هذا بس عشان يمزح معك
ههه
كيف لو تزوج
الله يسعدكم ويخليكم لبعض ويحفظ لك بنتك..

sara81

13-09-2022 - 05:49 pm

اميره العمري
هلا والله ...
شفتي شلون حبيبتي مانضحك بوجيههم
اذا ضحكتي يتمادون زياده

كيكة الجالكسي

13-09-2022 - 06:50 pm

ههه
حلوه منك رديتي له الصاع صاعين

صمتي يشرح سكوتي

13-09-2022 - 07:51 pm

والله انك شي بصراحه ....

بسمتي صدقة

13-09-2022 - 08:52 pm

المكتوب ماعنه مردود حبيبتي
لوانه بدر منه شي عقب موقفك وانتي منخشه في الكبت (بنقولك خلي الكبت ينفعك )
الرجل مو مثل المراه طيبه وحنونه وتسامح لو بكلمه حلوه ذابت
خليك ثقل واذا قال بعرس لازم نسوي مشاكل ومقالب علشان كلمه قالها لي
وفي النهايه الي بيندم احنا
بالدعاء وكثرة الاستغفار صدقيني بتكسبي زوجك حتى لو قالهاا لك مئة مره مجرد يبغى يستفزك لا اكثر
لاتعودينها مره ثانيه ويجي ردة فعل مو في مصلحتك ( هذا مجرد رائ

عيون سوزي

13-09-2022 - 09:53 pm

روعه يستاهل عقبال ما يجي اليوم الي اخلي زوجي مثل المجنون يمشي يحاكي حاله

خلوووووووووووووووود

13-09-2022 - 10:54 pm

مدري احس حركات اطفال وتقدر تجيبلك مشاكل انتي في غنى عنها
انتبهي نكست تايم حبوبه
الله يسعدك

لبن مراعي؟؟؟

13-09-2022 - 11:55 pm

ههه
والله حركتك خطيرة

دللي زوجك لكي تكسبينه←
مشكلات الماضي تسمم حياة الأزواج→