قروب قراشات الرشاقه معا نحو تحقيق الوزن المثالي باذن الله

1. وش رأيكم نخلي هالموضووع مو بس للريجيم لا

السلام عليكم ورحمة الله وبركاته
بسم الله على بركة الله نبتدي
هذا الموضوع خاص بمتابعة قروب فراشات الرشاقة للوصول الى الوزن المثالي باذن الله
والقروب مكون من العضوات التاليات:
1- لين الورد
2- فجر جدة
3- الحروف 1
4- ام رند الحلوه
5- أس الغرام يرة
بس
واحنا نفضل يكون القروب صغير
عشان ننتبه لبعض ونشجع بعض أكثر ونخاصم بعض ها
وانا عن نفسي ان شاء الله بدخل يومي واراقب كل وحده من عضوات القروب واخاصمها واشجعها واصحح لها اخطائها بس بدون زعل لااحد يزعل مني
بالنسبه للنظام المتبع كل وحده بكيفها انا بنزل لكم نظامي واللي حابه تطبقه معي بكيفها واي سؤال فيه انا مستعده اجاوب بكل سرور
والرياضه طبعا لازم نسوي رياضه سواء مشي بالهواء الطلق أو مشي بالسير الكهربائي أو تمارين رياضيه مختلفة لكل الجسم واللي عندها تمارين حلوه تحطها لنا بالموضووع عشان كلنا نستفيد
واي موضووع او معلومه اعجبتك وحسيتي انها بتفيدنا ياليت لو تنسخيها او تقوليها لنا هنا ويفضل نخلي كل المعلومات بلون الأحمر عشان الكل ينتبه وش رأيكم؟
وشعار قروبنا هو : فراشات الرشاقه وان شاء الله بنكون كذا فراشات برشاقتنا وخفتنا وبنودع السمنه وبالنسبة للتوقيع بنسوي لنا توقيع ان شاء الله
وانا ابي كل وحده فيكم ياليت لو توعد نفسها وتوعدنا اذا ممكن بانها تلتزم بالدايت وتستمر إلى ان تصل للوزن المثالي او الوزن المطلوب بالنسبه لها
ونستمر ان شاء الله مع بعض بالموضووع هذا الى ان تصل كل وحده فينا لوزن المثالي أو المطلوب وبعدها لتثبيت الوزن مع بعض ان شاء الله
وعندي مقترح بسيط قولي لي وش رأيكم فيه؟

وش رأيكم نخلي هالموضووع مو بس للريجيم لا

نخلي بعد لخلطات الخاصه بالوجه وبالشعر يعني اهتمامك بنفسك كل وحده تقول كل يوم او اسبوع ايش سوت من هالناحيه ولو عندها خلطه خاصه ياليت تقولنا كلنا اخوات ولازم نفيد بعض ولالا؟
وبعد اهم شي نشجع بعض من ناحية الثقافه الدينيه :حفظ القران وتفسيره والادعيه والصيام وكل العبادات يعني كل وحده بعد من ضمن يومها تقولنا قرات جزء مثلا او حفظت كذا ولو فيه برامج او كتب فادتها تبلغنا وتقولنا نظامها سواء الاسبوعي او اليومي من هالناحية وبعد بالنسبه للصيام وخاصه صيام التطوعي ياليت نشجع بعض فيه وننبه بعض وياليت تشجعوني من هالناحيه لانه مانبي بس ريجيم ومكسب دنيوي لا نبي مكاسب بالاخره واجر ان شاء الله وش رأيكم؟
والحين ابي كل وحده فيكم تحط بياناتها التالية :
الطول:
الوزن الحالي ( او اخر وزن قستيه ):
الوزن الهدف: << وكل وحده تقسمه إلى الهدف الأول ..الهدف الثاني وكذا
المدة اللي تتوقيعها عشان توصلي لوزنك الهدف مع التثبيت:
النظام المتبع:
نوع الرياضه اللي تمارسها :
كم يوم بالاسبوع تسوي رياضه حسب المعتاد:
والبيانات التالية كمان اذا امكن واللي ماتبي بكيفها:
العمر :
الحاله الاجتماعيه:
الوظيفه : << سواء موظفه او ربة منزل ياليت تقولوا وهل لديك التزامات بالبيت من تنظيف وغيره؟
وابي كل وحده ضروري تجاوب على هالسؤالين:
متى تحبي يكون اليوم المفتوح؟ هل كل اسبوع يوم ام كل اسبوعين يومين ولماذا؟ واي يوم باالاسبوع بالضبط؟
ومتى تحبي نقيس كل ماذا؟ كل اسبوع ام اسبوعين وباي يوم؟ << وراح ناخذ برأي الأغلبيه أو الرأي المتفق عليه اذا اقتنعنا جميعا
ملاحظة اخيره: ياليت الكل يدخل يومي ويحكي عن يومه وأي وحده بتغيب لاي ظرف تقولنا عشان مانقلق عليها اوكي
وبس ادري طولتها وهي قصيره بس حبيت اوضح كل شي
يلا توكلنا على الله
حسبي الله لا إله إلا هو عليه توكلت وهو رب العرش العظيم