قصة صاحبتي وش تنصحوها

بنات امس اجتني صاحبتي تشتكي وطلبت انو انزل مشكلتها ووافقت لان هي مو من المنتدى وراح اكتب القصة كاني صاحبتها حتى للسهولة لاني اجدها قصة تستحق ان نكتب عنها وان شاء الله اسلوبي يعجبكم
المشكلة اني قبل 10 سنوات اتقدم لخطبتي ابن خالتي واللي هو زوجي حاليا طبعا هو يعيش في احدى دول الخارج ما اخبي عليكم انا وافقت عليه لان حياتي مع اهلي صعبة والله لو اكتب دواوين عن معاناتي ما راح تخلص بس قلت ابن خالتي راح يدللني وخصوصا انو اكبر مني اب16 سنة وهو اكبر اخوانه وما متزوج كانت علاقتي به ايام الخطوبة روعة كل يوم يتصل فيني وكلام حلو حسيت اني راح ارتاح معاه وتعلقت فيه مع اني ما شايفته الا بالصور وكمان الصور اللي ارسلهن الي قديمات حيل المهم كمل الجواز وسافرت مع امي وخالي
وهنا لقيته يختلف عن الصور تماما بقيت طول الليل ابكي وامي تهديني هذا غير ابن خالتي مو هو اللي بعثلي الصور ..لا وتدرون يا بنات طلع احلى من الصور ..بس لاني كنت راسمتله صورة ثانية احس هالشخص غريب علي .. كان ما مصدق نفسه والله طاير فيني لحد موعد الزواج طبعا انا متملكة باقي بس الدخلة هنا حضر معاه شيخ واي شيخ الله لا يوفقه لان لازم عقد ثاني حتى تكمل معاملة خروجي والفيزا لان الحين احنا في الاردن ومن هالدولة راح اقدم معاملتي هذا طلب زوجي يا بنات ..الشيخ يكره خالي اللي اجه معاي ويموت منه لان هالشيخ يبي ينفرد ابزوجي عشان المادة ويظل يسحب منه على كيفه وهالكلام الله يشهد علي اني شفته ابعيوني والمشكلة زوجي يدري بيه بس ما اعرف ليش ما يطلع الا معاه وما يسمع الا كلامه ..الله اعلم في ليلة الدخلة خلص العقد بمجرد ما زوجي طلع يوصل الشيخ ورجع الا والاقيه متغير 24 درجة حتى انو والله صاح على خالي وطرده من الفندق وامي المسكينة راحت مع خالي والقهر انهم توهم واصلين ما يندلون الشقة اللي زوجي ماخذها
هنا انا حاولت اتكلم معاه ولزمت عليهم يبقون بس طلعوا وبقيت الليل كله دمعتي على خدي وش اللي صارفيهم ؟وصلوا للشقة ولا بعدهم وما عندي حتى تليفون اتصل بيهم ؟ اه يالقهر
وزوجي تدرون وش سوى ..تكلمت معاه ليش سويت كذا جاوبني انا حتى انتي ما ابيكي وهالشيخ راح يزوجني احسن منك ؟!!!!!!!!!!!!!!! بغيت اموت من القهر امي وخالي وبعدين انا ..طيب ليش شنو السبب.. لمن سمعت كلامه ما نطقت ولا حرف معاه وبقى هو جالس برا وانا لبست عبايتي وتحجبت وجلست لحد الفجر وهنا قمت صليت لربي ودعيته انو يخلصني من هالهم اللي انا فيه والصبح اخذني للشقة ودخلت لقيت امي وخالي جالسين وعيونهم كلها قلق وحيرة وش فيني وش اللي سواه معاي هنا انا جلست ابكي وهو طبعا ما يدري عني دخل لغرفته ونام ..بعدين جمعت كل اغراضي واللي اشتراه الي خليتهن ابشنطة وحطيتهن ابغرفته وطلبت منه انو يرجعني لبلدي ..تدرون لما سمع طلبي وش سوى ظل يتوسل فيني انا وش اللي سويته والله ما ادري وش صار معي وراح استسمح من امي وخالي وانا يا بنات كنت مصرة اني ارجع لبلدي لان اذا بدايته كذا اشلون بعدين
امي تكلمت معاي اني لو رجعت كيف راح تكون نظرة الناس الي ولاخواتي والمجتمع ما يرحم لازم اصبر هذا نصيبي صار الزواج وانا والله ما كنت ابغاه كرهته حطمني في اسعد ليلة .
كان يطلعني معاه عشان اتصل بابوي يروح يتصل ساعة وساعتين وانا انتظر واساله منو يكلم يقول زوجة المدير تبعه وانا ولا ادري لان يطلب مني ابتعد اشوية ويروح يتكلم بصوت واطي حيل .. اه يالقهر ..ولما ابي اتكلم مع ابوي ينزل فيني صايح وسب وانا لسا عروس !
صبرت وتحملت وهو مستانس مع الشيخ وطلعات وفوتات حتى انو يخبرني الشيخ يبي ياخذه ويعرفه على بنات حبوبات وانتو تعرفون الباقي المهم رجع زوجي للدولة اللي هو فيها وبقيت انا مع خالي حتى طلعت الفيزا وسافرت لزوجي وكنت اعتقد راح يدللني لان الشيخ ما موجود وامي وخالي مو معانا وصلت يا بنات.. ويا ريتني رجعت لاهلي اول اسبوع طاير فيني والاسبوع الثاني تحطيم يطلع للدوام الساعة 3 الفجر و يرجع الساعة 5 العصر وبعدها ياكل ويطلع لحد الساعة 11 ومرات 12 ما اعرف وين يروح يخبرني انو مع اخوانه بقيت على هالحالة لمدة 9 اشهر وبديت اراقبه عن بعيد لان هو عصبي لابعد الحدود وكنت اخاف لان لو نطقت كلمة غلط يضربني وانا حامل وهو حيل فرحان ابحملي بس ما ادري شنو اللي ماخذه مني ..كان من يتصل اباخوه يتكلم معاه امامي بس في اتصالات يطلع برا البيت ويبقى يتكلم معاهم لحد منتصف الليل ويوم الجمعة لازم يطلع الساعة 9 ضروري بحجة انو يوصل صاحبه للشغل بعد ما خلص من التليفون ثاني يوم الصبح اتصلت على نفس الرقم اللي هو متصل بيه وهنا ..الطامة الكبرى جاوبتني وحدة صوتها انعم من النعومة ..متت من القهر سكرت التليفون وبعد ساعة اتصلت ونفسها ترد علي هنا سالتها عن زوجي وهو عندها جاوبتني طبعا انو ما تعرف شخص بهالاسم وسكتت وتحملت بس واهلي ما يدرون وش فيني اتصل بيهم بس ابكي ويسالوني وش اللي صار فيكي اخبرهم اني مشتاقتلكم ولاخواني الصغار.. قبل ولادتي بشهرين تعبت وكله بالمستشفى هنا وقفت امامه وخبرته انو انا ادري بالشئ اللي مخبيه عني وانو اسمها كذا ورقمها كذا وهي نفسها زوجة المدير اللي كان يتكلم معاها بالاردن كان يخدعني وانا صابرة وهي نفسها صاحبه اللي لازم يوصله كل يوم جمعة ولازم يروحله بعد الدوام وال.........ما سكتت طلعت كل اللي فيني تدرون وش كان جوابه البسي عبايتك وتعالي معاي ورحت ما ادري وين وانا منهارة وكارهة حالي والطريق كله ساكتة لحد ما وصلت لبيت دق الباب ودخلني الا والاقيهم امراة مع بنتها بس تعتقدون منين ؟ من السودان .
انا بنت خالتك ومن لحمك ودمك تفضل هالناس علي ليش ...مليون سؤال على بالي بغيت انجلط والله وهالسودانية معصبة وحيل زعلانة لاني اجيت معاه ..خبرني انو كان متزوجها زواج مسيار وقبل لا يرتبط فيني تركها وانو يساعدها لانهم مسلمين وانا صدقت لان ما اعرف وبدار غربة ولوحدي
الله رزقني اببنوتة حلوة ولله الحمد بس كانت تبكي وايد واللي قاهرني كل يوم والثاني جايني وجايب معاه السودانية وبنتها واطبخي لهم واخدميهم ولما تجي يا بنات والله يبقى بس يطالع فيها وهي استغفر الله انا ما اقصد اذم خلقة الله بس قبيحة حيل حيل ولما تجيني بس يصيح علي جيبيلهم كذا وحطيلهم كذا وبدل ما ياخذني اجيب اغرض للبيت ياخذها معاه كنت صغيرة وما اعرف كيف سكتت على هالحالة وشلون تحملت وحتى للسوق ما اطلع الا كل شهرين ولا اشوف احد ولا اطلع لاخوانه لانه ما عنده وقت .
بنات تعبت والله من الكتابة راح ارتاح وبعدين اكمل القصة اذا عجبتكم جاوبوني واذا لا ..لا تردون ابجواب سئ عشاني