قصة صديقتي مع زوجها وصديقه مشورتكم نصائحكم لها

1. الله رزقها ببنتين ... وعايشه ومرتاحه والحمد لله ..

السلام عليكم ورحمة الله وبركاته ...
صباحكم / مسائكم ,, ورد ورقان ..
أبدخل في السالفة بدون مقدمات ..
عندي صديقه توأم روحي .. لها حدود خمس سنوات متزوجه .. زوجها رجال يخاف الله ويعطيها حقوقها ..
مدلعها ومكرمها ,, مبسوطه مره معاه بالرغم من بعض البهارات الزوجيه بس تمر وتعدي ويظل زوجها صاحب أطيب قلب في العالم ..
تقول يا روعه ما نطلع الا مع بعض ولازم لازم كل يوم يطلعها مشوار .. ان شاء الله بس يلفون في السياره .. المهم لازم خرجه في اليوم ..

الله رزقها ببنتين ... وعايشه ومرتاحه والحمد لله ..

تقول من سنتين تعرف على رجال ملتزم وكويس .. وشبك معاه وسار الرجال يزورهم في البيت وزوجها يزورهم بس كان يمر بمشاكل مع زوجته استمر تقريبا بعد ما تعرف على زوجها ست شهور بعدين انفصل مع زوجته .. المهم بدأ بعدها يجيه حالات بسيطه اكتئاب .. شوي شوي فصل من عمله .. وسار فاضي لا شغله ولا مشغله غير يتصل على زوج صديقتي ويطلع معاه .. سار هالموضوع يوميا .. وتقول اذا طلعت انا وزوجي يجلس يتصل كل شوي الين زوج صديقتي يرجعها البيت ويروح له .. وصديقتي تقول انا تحملت ارحمه لانه يمر بحالة نفسيه سيئه واشجع زوجي يروح له ويبقى معه ..
بعد ست شهور صديقتي ولدت يعني من سنه من الآن ..
بعد ما ولدت راحت لأهلها وبقت 3 اسابيع عندهم .. ومرت باكتئاب ما بعد الولاده ( كلكم تعرفون هالحاله )
تقول كنت اتصل على زوجي الصبح عالساعه 6 اكون مره متضايقه وطفشانه ما يرد علي ( بداية المشكلة )
ويرجع يتصل عالساعه 10 او بعدها هي تحسبه نايم .. وتتفاجأ انه يقولها لا انا ما كنت نايم بس كنت عالبحر مع فلان ....!!
تقول طيب ليه ما ترد علي يقول علشان اراعي مشاعره ...!!
سار هذا الموال يوميا تتصل ترسل ما يرد او حتى يكلمها نص دقيقه ويقول يلا يلا باي باي فلان خلاص جا ...!!
ما قدرت تكمل الاربعين عند اهلها تقول لازم ارجع بيتي زوجي راكض ورا هالرجال وناسيني لدرجة ما راح لها بيت اهلها الا مرات معدوده وبعد ما تكلمه هي ..
يقول فلان تعبان ومحتاج وجودي جنبه ( قالت طيب 5 دقايق من وقتك ما راح تتعب فلان لو جيت شفتني انا وعيالك )
بعد 3 شهور من ولادتها .. الساعه 12 الليل الجرس يدق تقول طالعت من العين السحريه الا وشخص ( عريان )
عفوا على الكلمه .. ويدق الجرس بيحرقه قالت لزوجها وطلع لقاه صاحبه ..!!!!!!!!!! ( طبعا ساير عنده اشد انواع الاكتئاب بمعنى مريض نفسي )
يبكي ويتولول المهم زوجها لبسه من ملابسه وراح معاه .. جلس للساعه 3 الفجر .. ورجع قالها انه تضارب مع اخواته > 3 غير متزوجات وامهم مطلقه وعايشات لحالهم ..
قالها زوجها انه حاول يرجعه البيت ورفضو اخواته يفتحون له الباب وجلسو يترجون زوج صديقتي تكفى احنا نخاف منه وتكفى خله ينام عندك الليله والثانيه تقول تكفى طلع من هنا عريان واحنا لحالنا نخاف منه وده اي مكان ..
وداه مستشفى النفسيه شوي الا وام الولد تتصل على زوج صديقتي تقول بموت واعرف من وين جابو رقم زوجي .. هو قال انهم اخذوه من جوال ابوهم اللي ما يدري عن شي .. وسارت تتصل على زوج صديقتي كل شوي وهو للأسف اتصل عليها كذا مره .. تقول انا زعلت وكبرت الموضوع قلت له صاحبك وجانا عريان اوكي بس توصل لأمه واخواته الى هنا وانا ما ارضى قال امه كلمتني بس مرتين قالت وانت قال ولا مره كلمتها ..
تقول فتحت جواله لقيته كلمها فوق عشر مرات وهي يمكن 15 مره ..
واليوم الثاني رجعو تناقشو واعترف قالت له ليش تكذب وكذا قال نسيت ومن هالحكي ..
بعدين تصالحو .. بعدها بيومين صاحبه جاب لزوج صديقتي هديه ولصديقتي ..!! وللبنات العاب ..
تقول تطورت علاقة زوجي بالرجال لدرجة سار يرجعنا زوجي من المشوار ويطلع معاه او يتحجج بانه طفش ويرجعنا علشان يطلع معاه سار هالموضوع يوميا اتصالاته اصبحت اكثر من 15 مره باليوم ..... تقول صديقتي يوم امررها ويوم ازعل ويوم اتمشكل ويوم احاول اشغل زوجي لكن ( فلان ) مثل الوسواس الخناس ما يترك زوجي دقيقه بحاله .. تقول حتى الساعه 2 او 3 بالليل يتصل ..
مره كلمه من السجن قال انه ضرب اخته وقام اخوه الصغير واشتكاه وسجنوه وتقول انا شجعت زوجي يروح يكفله ويطلعه من السجن ..
في الصيف سافرو للجنوب تقول وصلنا الاربعاء تخيلو السبت فلان لحقنا .. ونفس الموال لا طلعنا ولا تمشينا زوجها بس طالع مع هالرجال ..
تقول بيوم كنت تعبانه من بطني من الصبح وقلت لزوجي ان بطني تعبان لازم المستشفى قال اوكي الى بعد العصر قالت له نروح المستشفى قال طيب .. تقول بعد ما طلعو من الصلاه اتصل عليه ما يرد من اربع ونص الى سته وربع آخر شي اتصل عليها قال اجهزي عشر دقايق واكون عندك تقول ركبت السياره وهو مسوي زعلان تقول اعرف زوجي اذا سوا شي غلط يبدأ بالزعل المهم وداها المستشفى وخلصت وكل شي لما رجعو البيت قالها اليوم كنت مع فلان لانه معصب رايح يشتكي اخوه وانا رحت اهديه قالت له طب جوالك صامت قال لا شفته بس ما قدرت ارد لان فلان معاي وتعرفين اخاف على مشاعره ...!!!
تقول قلت له وتدري اني تعبانه وقاعد تهدي فلان في ستين داهيه عنه ما هدي وبعدين هو يغار مني والايش قصة مشاعره قال مو شغلك وبدأت السالفه تكبر بينهم ..
سارت صديقتي تفتح جواله تلاقي اتصالات فلان توصل المكالمه الوحده ل 40 دقيقه ..
وما تكلم علشان زوجها ما ينتبه انها تفتح جواله .. الين قرت رساله من هالشخص .. مكتوب فيها ..
(( السلام عليكم .. اتعلم اني احبك في الله لانك دائما توقف معي وتشجعني وملخص اسباب محبته له سبع نقاط .. اللي اتذكره منها انك دائما تناديني بأ ابا فلان .. وان بعد كل مكالمه اتذكر كلماتك واجهش بالبكاء .. تقول طرطعت وش الكلام اللي يقوله زوجي دخل الشيطان الشك في قلبها الله المستعان وسألته عن الرساله وليتها ما سألته قامت الدنيا وما قعدت بينهم ووصلت انها طلبت الطلاق وقالها روحي لأهلك
وخيرته بينها وبين هالرجال واختاره للأسف قال صاحبي ما ابدله بكنوز الارض وانتي بدالك الف حرمه >> صغر زوجها بعيني ..
واصبح بينهم مشاكل بعد الحب اللي كانو فيه .. هي ما تتحمل وهو ما يتقبل .. الي ان اشتكى لأخوها على اساس ان صديقتي ما تخلي زوجها يطلع مع اصحابه وحكت اخوها بكل شي وقال هو صاحبه بس في تجاوزات حصلت وحاول اخوها يصلح الوضع بس هو يقول استمر مع صاحبي على ما انا عليه وهي تقول ما عاد اتحمل عيشه فيها فلان تقول يا روعه اذا عرف اني مع زوجي برا يسير يتصل كل عشر دقايق على زوجي يقول ( ها خلصت ) ويسير يفتح مواضيع ما لأمها داعي .. وزوجها صراحه معطيه وجه
تقول ادري انه مريض نفسيا بس ما عاد اقدر اتحمله وتقول انا ايش ذنبي في مرضه ان زوجي ما اشوفه علشانه وتقول انا بس اطالب بشوية عدل يعني يطلع معاه مره في الاسبوع او مرتين ويسير يرد علي اذا كان معاه احيانا تتصل من دون ما تعرف انه معاه بس لما يرجع يقولها ..
تقول مره جالسه اشتكي عليه من موضوع قال انا مليت منك ومن شكواك وتقول ادخل عليه بعدها وهو يكلم هالفلان وهذاك يشكي وزوجها يحل مشكلته لما خلص المكالمه قالت له اشوف ما تمل من شكاوي فلان ... تقول احس عقله مقفل ما عاد يبغى يسمع اي شكوى غير فلان ...
وفي اشياء كثير بس نسيت اغلبها والله
الايام هذي سار زوجها يطلع معاه من غير ما يقولها وهي تعرف انه معاه بس مسويه غبيه لان ما سار عنده الاهو بعده عن كل اصحابه ... استشارتني كثير وكثير وانا كنت اصبرها واقولها صاحبه ومن حقه يطلع ..
تقول ادري من حقه يطلع بس مو لدرجة كل ما اطلع مشوار ارجع من نصه علشان فلان وتقول لو احترق زوجي ما يرد علي وهو معاه ويرد مع البقيه عادي تقول بموت لو ما ابتعد هالرجال عنا ...
وهو قاعد يتعالج عند طبيب نفسي من سنه ونص تقريبا تقول يطلع من مشكلة يدخل في الثانيه ولا تتحسن حالته .. وفوق ذا عاطل عن العمل ..
انا بصراحه اشوف الحق معها بس استأذنتها انزل حكايتها .. لان في فراشات حكيمات وبيقولون وين الصح ووين الغلط .. ؟
هل زوج صديقتي على حق باللي يسويه ... يبدي الغريب على بيته واهله ...!!؟؟؟
وهل صديقتي غلطانه لما تزعل والا هى صح ..!؟؟
انا احترت مره وما عرفت ارد عليها لان علاقتهم على وشك الانهيار ... الله يجزاكم الجنه ...
ولا تنسوها من صالح دعائكم .......
واعتذر عن ركاكة الاسلوب بصراحه انا متوتره من عرفت بمشاكلها الاخيره معاه ..
الله يرد لها زوجها ردا جميلا .....
.. لكل من مرت هنا ..