قصة عذابي

1. السلام عليكم ورحمة الله وبركاته

السلام عليكم ورحمة الله وبركاته

اذيكم يافراشات يارب تكونوا بخير,أنا مخنوقة جدا وخايفة من الأيام الجاية وخايفة من عقاب ربنا ليا, حكايتي بدأت تقريبا من سنتين لما جوزي اتقدملي وسألنا عليه هو وأهله وكل الناس حلفوا بأخلاقهم ومفيش أي حد قال كلمة مش كويسة عليهم بالعكس كل الناس قالوا انهم كويسين ومحترمين وفي حالهم ووافقنا عليه بعد الاستخارة وسؤال الناس وحصلت مشكلة في فترة الخطوبة علي موضوع الشبكة وبابا وصل لحل يرضي الطرفين مع جوزي وهو وافق وكلمني تاني يوم وقالي ان اخواته الكبار مش موافقين علي الحل اللي بابا قال عليه وبابا اكتشف انه كداب وضعيف الشخصية قدام اخواته وكان عايزني اسيبه بس أنا اتمسكت بي وقولتله اني أعرفه أكتر منهم وانه طيب بس بيني وبين نفسي كنت متضايقة من تغيير كلامه وانه مقدرش يقنع اخواته وسابني أنا أواجه المشكلة ووسطت جدي عشان يقنع بابا ان أكمل معاه,خصوصا بعد كلام خالاتي ليا واقناعهم ليا انه ميقدرش يتصرف في حاجة زي دي من غير موافقة أهله,أنا بحكيلكم من البداية لان دلوقتي بابا محملني مسئولية اختياري ومش عايز يتدخل.....أكمل حكايتي وهحاول أحكي كل حاجة عشان تقدروا تعرفوا المشكلة وتساعدوني ان شاءالله.
أنا عندي25سنة متجوزة من سنة ونص عندي بنت عندها 9شهور من أول يوم في جوازي وأنا في مشاكل أسبابها صغيرة بس بتكبر في ثانية وتطور جوزي بيحبني جدا وغيور عليا جدا جدا بشهادة الجميع وبيقولوا هو حاسس اني أجمل منه عشان كدة غيرته ذيادة عن اللزوم مع ان ربنا يعلم انه لما اتقدملي مابصيتش لشكله ولا شهادته مع العلم ان شهادته أقل مني بس أنا بصيت لتدينه وكنت طول عمري بتمني اني ارتبط بواحد يعرف ربنا ويصوني بس للاسف اتخدعت فيه واكتشفت انه مليان عيوب فهو عصبي,غيور,ضعيف الشخصية قدام أهله لدرجة انه ممكن يبيعني أنا وبنتي عشانهم كان بيسمع تطاول اخواته ويسكت كان اخوه الكبير دايما يقول قدامه انه بيضرب مراته,حصلت مشاكل كتيرة وسيبت البيت كتير وانا حاليا عند اهلي من شهر لان حصلت مشكلة وضربني وعملي كدمات في كتفي واتطاول علي والدي وعملناله محضر بس عرفنا ان أخره غرامة وهو مكنش هامه ومن يومين كنت برة البيت مع ماما وقابلنا اخوه التؤام ولما نزلنا من المكان اللي كنا فيه قابلنا جوزي وخطف مني البنت وقاللي انها بعيدة عنه شهر ولما قولتله انها بترضع قاللي هتقضي معايا يوم وهرضعها صناعي عشان تعرفوا انها ماتهموش وانه مش بيخاف عليها ورحنا عملنا محضر وكان معايا المحامي وكانت نفسيتي سيئة جدا مع اني كنت مبسوطة لما نزلت واتمنيت اني اشوفه عشان كان واحشني جدا بس انا دلوقتي مش طايقاه وهو اللي وصلنا لكدة وضيع اللي كان بينا بايده,بس المحامي طلب مني طلب وبترجي ربنا انه يسامحني عليه طلب اني اقول انه اخوه هو اللي خطف البنت مش هو عشان مفيش قانون بيعاقب اب علي خطف بنته وخصوصا اني لسة علي ذمته(يارب سامحني)انا طول عمري مظلومة وعمري ماظلمت وعملت محضر وفي نفس الوقت اخواته جابوا البنت البيت بس اخواتي رفضوا ياخدوها عشان ناخد حقنا بالقانون ومايتعرضليش تاني واتدخله ناس من طرف واحد قريبي وراحوا جابوا البنت مع اخوه الكبير وتؤامه وأنا فقدت أعصابي مع ان المحامي وبابا قالوا لاخواتي والشباب محدش يتعرضلهم عشان حقنا مايضيعش وأنا جريت عليهم وخدت البنت وزعقت فيهم ولان تؤامه شبهوا جدا ناس كتير افتكروا هو وخافوا انه يتعرضلي واحتكوا بيهم واخوه الكبير استغل الفرصة وكسر زجاج عربيته وعمل محضر كيدي لبابا انه هو اللي عمل كدة وبعد تدخل الناس عملت تنازل عن المحضر قصاد انهم يعملوا تنازل بس انا ضميري بيأنبني لان اخوه ملوش ذنب مع انه راح يشهد زور علي بابا بس ربنا هو اللي بيعاقب مش انا,وبابا حاليا مابيكلمنيش لانه بيقولي اني صغرته قدام الناس وضيعت حقنا,نسيت اقولكم ان اخواته اتصلوا بي وباخواته احنا وعند قسم الشرطة وحصل احتكاك بالضرب بين العائلتين,هو قال انه خدلي شقة بعيد عن اخواته بس انا مش مطمنة لانه كان بيقول انه هيتجوز واحنا سمعنا انه اتقدم لواحدة قبل موضوع الخطف أنا عايزة أسأل هو احنا ممكن بعد كل اللي حصل نبدأ حياة جديدة ولا اللي حصل هيكون بينا طوا العمر أنا خايفة علي بنتي ومش عارفة اعمل ايه انا فكرت اننا نسيب البلد لمدة سنة او اكتر ونبدأ حياة جديدة بالرغم ان دي حاجة صعبة جدا عليا وكمان انا خايفة منه دة انا بين اهلي وعمل فيا كل دة فمابالكم لو كنت في بلد مليش فيها اي حد غير ربنا وقولت اني مش هسيب الشقة عشان خاطر اهله ولما نرجع هنعيش فيها انتم ايه رأيكم؟؟؟انا انهاردة هروح للمحامي وهسأله لو في رجوع ايه الضمانات اللي ممكن تحميني وتضمن اماني انا وبنتي بس أنا بثق في أرائكم ياريت ماتبخلوش عليا بيها
أسفة جدا علي الاطالة ومعلش الكلام مش مترتب بس ربنا وحده اللي عارف حالتي شكلها ايه,دعواتكم ليا.