قصتي مع عملية التدبيس

السلام عليكم ورحمة الله وبركاته
كيفكم وشو اخباركم صارلي زمان عن المنتدى
انا قد لمحت عن عمليتي وفيه فراشات سألوني عن التفاصيل وقلت اني بنزل الموضوع هنا
وطولت عليهم لكن سامحوني انشغلت لكن مانسيتكم
المهم:
قصتي مع السمنه طويله عريضه يعني من عرفت نفسي وانا سمينه
ابتدائي ومتوسط وثانوي وكليه كلها درستها وانا بهالشكل
وتزوجت وانا سمينه بعد
المهم بعد فتره من زواجي قررت ان الوضع مايحتمل ولازم اشوف لي دبره
لا تقولون سوي ريجيم لاني اظن مافي ريجيم على وجه الارض الا سويته
انحف شوي وبعدين اتركه ويزيد وزني دبل
الين وصل وزني الى 135 كيلو يعني كان باقي شوي وانفجر
المهم قررت انه مافي حل الا اسوي عملية ربط معده وتحمست اكثر بعدما شفت كم واحد مسويها وماشاء الله نحفو نحافه مو طبيعيه
ورحت سويتها بالمستشفى التخصصي بالرياض
ونصحني الدكتور بالتدبيس لانه فعال اكثر من الانواع الاخرى لانه فيه كذا نوع من العمليه
وبعد عمل التحاليل والفحوصات والذي منه حدد موعد العمليه 18/5/1427ه
عملت العمليه بالمنظار خمس فتحات من 3 الى 1 سم مختلفة في الطول وتمت العمليه على خير
طبعا لازم من الالم لكن اعطوني مهدئات ومسكنات ماقصروا يومين وطلعت من المستشفى
وكنت اشرب سوائل فقط لمدة اسبوعين بعد العمليه بكميات قليله جدا لانه مايمديك تشربين الا بالعله
المهم الاسبوعين هذي نقصت 10 كيلو الصراحه ماصدقت ووزنت اكثر من مره عشان اتأكد
وبعد اسبوعين بدأت بالاكل خفيف جدا يعني كله مهروس وكان فيه معاناه وترجيع بس مو كثير
كان لازم آكل على مهلي يعني الوجبه آكلها بساعتين او ثلاث ومع الوقت خف الترجيع وزادت كميه اكلي
عن اول يعني اول شهر كان معاناه والثاني كذلك ثم تعودت على الوضع وصار عادي عندي
خصوصا انه وزني كان ينزل بسرعه ماحلمت فيها ابدا
والآن مر 11 شهر على العمليه وزني 90 كيلو ومازال ينخفض وشكلي تغير نهائيا وبدأت امشي ساعه يوميا
تدرون الصيف على الابواب ولازم اسوي نيو لوك <<<<مصدقه عمرها
هذه قصتى وآسفه على التأخير والاطاله
والحمدلله من قبل ومن بعد